Vətəndaşların müraciətinə həssas münasibət cəmiyyətin inkişafına xidmət edir

Azərbaycan Prezidenti İlham Əliyevin icra strukturları qarşısında müəyyənləşdirdiyi ciddi tələblərdən biri də vətəndaşların qəbulu, onların ərizə və şikayətlərinə ciddiliklə yanaşılması ilə bağlıdır. Binəqədi Rayon İcra Hakimiyyəti də fəaliyyətini bu tələblər çərçivəsində quraraq vətəndaşların qəbulunun təşkili, onların müraciətlərinə vaxtında baxılması, icra aparatında nizam-intizamın gücləndirilməsi üçün zəruri tədbirlər görür. Rayon rəhbərliyinə edilən müraciətlər cavabsız qalmır, vətəndaşların problemlərinin aradan qaldırılması üçün mütəmadi işlər görülür.

Bir müddət bundan əvvəl Binəqədi rayonunda ötən ilin sosial-iqtisadi inkişafının yekunlarına və qarşıda duran vəzifələrə həsr olunmuş hesabat yığıncağında da yuxarıda bəhs edilən məsələ ilə bağlı ətraflı danışılmışdır. Hesabat məruzəsi ilə çıxış edən rayon icra hakimiyyəti başçısının müavini İlqar Süleymanov bildirmişdir ki, dövlət qurumlarında vətəndaşların müraciətlərinə diqqətlə baxılması sahəsində son illərdə mühüm dəyişikliklər baş vermişdir. Bir sıra yeniliklərin tətbiqi, o cümlədən, innovasiya texnologiyalarının imkanlarından geniş istifadə edilməsi bunun bariz ifadəsidir. Prezident İlham Əliyev tərəfindən təsdiqlənən “Azərbaycan Respublikasında rabitə və informasiya texnologiyalarının inkişafı üzrə 2010-

2012-ci illər üçün Dövlət Proqramı” da həmin məqsədin reallaşmasında öz müsbət təsirini göstərir.

Binəqədi Rayon İcra Hakimiyyətində vətəndaşların qəbulu, onların ərizə və şikayətlərinə baxılması sahəsində vəziyyətlə əlaqədar icra hakimiyyəti başçısının müavini İlqar Süleymanov söhbət zamanı dedi:

-Azərbaycanın bu gün sosial-iqtisadi yüksəlişi, beynəlxalq imicinin artması, regionun lider dövlətinə çevrilməsi və dünyanın enerji təhlükəsizliyinin əsas təminatçılarından biri olmasının əsas səbəbi ulu öndər Heydər Əliyevin siyasi kursunun, müəyyənləşdirdiyi inkişaf strategiyasının Prezident İlham Əliyev tərəfindən uğurla davam etdirilməsi və dövrün tələblərinə uyğun məzmun və keyfiyyətcə yeniləndirilməsidir.

“Bizim siyasətimiz şüar, boş-boş vədlər, reallığı əks etdirməyən bəyanatlar deyildir. Bizim siyasətimiz konkret işlərdir. Hər bir insanın qayğısına diqqət yetirmək, hər bir insanın, hər bir rayonun problemini çalışıb həll etməkdir” - deyən ölkə başçısı cənab İlham Əliyev bütün fəaliyyəti boyu daim bu prinsiplərə sadiq olduğunu təsdiq etmişdir. Elə buna görə də Azərbaycan vətəndaşları Prezident İlham Əliyevin simasında özlərinin ən yaxın hamilərini, güvənc yerlərini görür və bununla da fəxr edirlər.

Azərbaycan Prezidenti İlham Əliyev çıxışlarında və ictimaiyyət nümayəndələrilə görüşlərində korrupsiyaya qarşı mübarizənin daha da gücləndirilməsini, bütün sahələrdə şəffaflığın artırılmasını, vətəndaşları narahat edən süründürməçilik hallarının və bürokratik maneələrin aradan qaldırılmasını həmişə diqqət mərkəzində saxlamışdır.Dövlətimizin başçısı bu barədə dəfələrlə demişdir: “Bürokratik əngəllər aradan qaldırılmalı, rüşvətxorluğa və korrupsiyaya qarşı mübarizə daha da ciddi aparılmalı, ictimai nəzarət gücləndirilməlidir. Bütün bunlar çox vacib məsələlərdir”.

Azərbaycan Prezidenti cənab İlham Əliyev vətəndaşların ərizə, şikayət və təkliflərinə qanunvericiliyə uyğun olaraq müəyyən edilmiş müddətlər ərzində və obyektiv baxılmasını, onların haqlı tələblərinin təmini istiqamətində zəruri tədbirlərin görülməsini bütün dövlət orqanları və məmurları qarşısında mühüm vəzifələrdən biri kimi qoymuşdur. Bu məsələyə daim toxunan dövlət başçısının əsas tələblərindən biri vətəndaşı narahat edən problemlərə həssaslıqla yanaşılmasıdır. Cənab İlham Əliyev bununla bağlı demişdir: “Hər bir dövlət məmuru xalqa xidmət etməlidir. Hər bir icra başçısını vəzifəyə təyin edərkən, qəbul edərkən göstəriş verirəm ki, get, xalqa xidmət elə, bu yüksək məsuliyyəti, bu etimadı doğrult. Mənim birinci tələbim xalqa xidmət etməkdir, problemləri həll etmək, şərait yaratmaq, insanları incitməmək, əsassız tələblər irəli sürməməkdir. Yəni belə olmalıdır, ədalət olmalıdır. Birinci növbədə sosial ədalət”.

Dövlət başçısının bu cür mövqeyinin nəticəsidir ki, Binəqədi Rayon İcra Hakimiyyətində də vətəndaşlar təkcə qarşılaşdıqları problemlər barədə deyil, həm də onların aradan qaldırılması yolları haqqında öz təklif və mülahizələrini bildirirlər. Artıq rayonun xidmət qurumlarında süründürməçilik halları xeyli dərəcədə azalmışdır. Hazırda dövlət məmurları vətəndaşların gündəlik qayğılarına daha həssas yanaşır, onların əksər haqlı tələblərini müsbət həll edirlər.

Rayon icra hakimiyyətinə daxil olan ərizə və şikayətlər, müraciətlər həmin gün qeydiyyata alınır, hərtərəfli araşdırılır, ilk növbədə, onların yaranma səbəbləri təhlil edilir, qaldırılan məsələlərin həlli üçün müvafiq tədbirlər görülür.

-Bu gün Binəqədi rayonunda əhalinin həyat şəraitini hər vasitə ilə yaxşılaşdırmaq, adamları narahat edən problemləri aradan qaldırmaq qarşıda duran ən mühüm vəzifələrdəndir. Rayon sakini kimi deyə bilərəm ki, icra hakimiyyəti rəhbərliyi bu məsələyə daim önəm verir.

– Sosial problemlərin uğurlu həllinə nail olmaq üçün təbii ki, əhali ilə əlaqə saxlamaq, narahatlıq doğuran məsələləri öyrənmək, adamların istək və arzularını bilmək vacib amildir. Rayon rəhbərliyi ilə əhali arasında qurulmuş normal münasibət vətəndaşların qəbuluna, onların ərizə və şikayətlərinə həssaslıqla yanaşılmasının məntiqi nəticəsidir. Təsadüfi deyil ki, rayon icra hakimiyyətinin yeni rəhbərliyinin fəaliyyət göstərdiyi bir ildən də az bir dövrdə vətəndaşlardan daxil olmuş müraciətlərin sayı əvvəlki vaxtlarla müqayisədə xeyli azalmışdır. Bunun əsas səbəbi yerlərdə vətəndaşlarla görüşlərin sistemli şəkildə keçirilməsi, bu görüşlər zamanı qaldırılan məsələlərin böyük əksəriyyətinin operativ qaydada həll olunmasıdır. Vətəndaşlarla canlı əlaqənin yaradılmasında səyyar qəbullar daha cox səmərə verir. Bütün qəbullarda rayon icra hakimiyyəti başçısı Xaləddin İsgəndərovla yanaşı, rayonun hüquq-mühafizə orqanlarının, xidmət təşkilatları rəhbərlərinin geniş tərkibdə iştirakı təmin olunur. Səyyar qəbullarda vətəndaşlar tərəfindən edilən bütün müraciətlər qeydə alınır. Rayonun imkanları daxilində olan məsələlərin qısa müddət ərzində həlli adamların razılığına səbəb olur, hər kəsdə minnətdarlıq hissi doğurur.

Binəqədi rayonunun yeni rəhbərliyinin mütərəqqi iş üslubunun diqqətçəkən məqamlarından biri də vətəndaşlarla işin müasir tələblər səviyyəsində qurulması, ərizə və şikayətlərə baxılmasının mütərəqqi üsul və vasitələrinin tapılmasıdır. Azərbaycan Respublikası Prezidentinin 2012-ci il 5 sentyabr tarixli “Açıq hökumətin təşviqinə dair 2012-2015-ci illər üzrə Milli Fəaliyyət Planı”nın və “Korrupsiyaya qarşı mübarizəyə dair 2012-2015-ci illər üzrə Milli Fəaliyyət Planı”nın icrası ilə əlaqədar rayon icra hakimiyyəti başçısının müntəzəm olaraq yerli sakinlərlə görüşləri, o cümlədən səyyar qəbulları təşkil edilir. Vətəndaşların müraciətləri, irad və təklifləri öyrənilərək onların icrası ilə əlaqədar tədbirlər planı təsdiq olunmuşdur. Təsdiq olunmuş qrafikə uyğun olaraq 2012-ci ildə yerlərdə 32 görüş keçirilmişdir. Bu görüşlərdə ümumilikdə 5067 rayon sakini iştirak etmiş və onlar tərəfindən 579 məsələ qaldırılmışdır. Qaldırılan məsələlərin əksəriyyəti ümumi sosial və digər məişət məsələləri ilə bağlı olmuşdur. Keçirilən görüşlərdə vətəndaşların qaldırdıqları 49 məsələ yerində həllini tapmış, həlli vaxt tələb edən 530 məsələ ilə əlaqədar Tədbirlər Planı təsdiq olunaraq aidiyyəti qurumlara göndərilmişdir. Tədbirlər Planı üzrə 362 məsələ icra edilmiş, 37 məsələnin icrası plan üzrə müəyyən edilmiş müddət əsasında hazırda aidiyyəti təşkilatların icraatındadır.

Dövlət başçısı İlham Əliyevin 14 aprel 2009-cu il tarixdə imzaladığı “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”na uyğun olaraq Binəqədi rayonundakı yaşayış evlərinin elektrik enerjisi, təbii qaz, içməli su təchizatının yaxşılaşdırılması istiqamətində tədbirlər davam etdirilir. Bundan başqa, proqram çərçivəsində mərkəzi istilik sisteminə qoşulmuş yaşayış binalarının, təhsil, səhiyyə və mədəniyyət obyektlərinin keyfiyyətli istiliklə təmin olunması, mövcud infrastrukturun müasirləşdirilməsi, yeni təhsil, səhiyyə, mədəniyyət, idman, ekologiya, rabitə, mühəndis-kommunikasiya obyektlərinin inşası, küçə və məhəllələrdə asfalt örtüyün çəkilməsi, tarix-memarlıq abidələrinin bərpası nəzərdə tutulmuşdur. Bütün bunlar isə təbii ki, insanları narahat edən problemlərin aradan qaldırılması, ərizə və şikayətlərin, müraciətlərin azalması deməkdir.

Onu da xatırladım ki, Binəqədi RİH informasiya-kommunikasiya texnologiyalarının ən son imkanlarından istifadə etməklə fəaliyyətini müasir formada qurmağa, vətəndaşların etimadını qazanmağa çalışır. Bu baxımdan Avtomatlaşdırılmış İnformasiya Sisteminin (AİS) yaradılması sənəd dövriyyəsinin real vaxt rejimində (online) həyata keçirilməsinə, beləliklə, fəaliyyətin daha müasir, çevik formada qurulmasına imkan yaratmışdır.

- İlqar müəllin, Binəqədi Rayon İcra Hakimiyyəti başçısının 11 dekabr 2012-ci il tarixli əmri ilə 1646 Sakinlərin Müraciət Xidməti sisteminin yaradılması da sakinlər tərəfindən son dərəcə təqdirəlayiq addımlardan biri kimi qiymətləndirilir. Belə bir sistemin təşkili rayon rəhbərliyinin ölkədə gedən proseslərə adekvat siyasət yürütdüyünün, ölkə başçısının fərman və sərəncamlarından irəli gələn vəzifələrə böyük həssaslıqla yanaşdığının bariz ifadəsidir.

- Qeyd etmək istərdim ki, rayonumuzda 1646 müraciət xidmətinin yaradılması vətəndaşlar üçün daha çevik, müasir müraciət imkanları yaratmışdır ki, bu da ölkəmizin müasir inkişaf səviyyəsinin diktə etdiyi obyektiv tələbatdır. Bu gün inamla deyə bilərəm ki, 1646 Sakinlərin Müraciət Xidmətinin fəaliyyəti daxil olan yazılı müraciətlərin sayının azalmasına, bununla da qismən maliyyə xərclərinə və əməkdaşların əlavə vaxt itkisinə qənaət edilməsinə imkan yaratmışdır. Yeni xidmət hökumət orqanının hesabatlılığını və korrupsiyaya qarşı mübarizədə əhalinin rolunu artıraraq rayonun yerli struktur orqanlarının məsuliyyət hissini gücləndirmiş, mübahisələrin həllinə və əhalinin informasiya əldə etmək imkanlarının genişlənməsinə səbəb olmuşdur.

Xatırladım ki, bu il fevralın 6-dan etibarən Sakinlərin Müraciət Xidməti rayon sakinlərinin istifadəsinə verilmişdir. Bunun ölkədə dövlət qulluqçusu-vətəndaş münasibətlərinin keyfiyyətcə yeni müstəviyə keçməsinə təkan verməsi şübhəsizdir. Sözügedən ideyanın maraqlı cəhətlərindən biri də odur ki, rayon sakinləri üzləşdikləri problemlərin həlli üçün yalnız bir ünvana müraciət edirlər. Həmin müraciətlər qeydə alınır və “bir pəncərə” prinsipi üzrə həllini tapır. Bu, sakinlərin fərdi xərclərinin azalmasına, vaxt itkisinin aradan qaldırılmasına, şəffaflığın və onların rahatlığının təmin edilməsinə imkan verir.

Yeri gəlmişkən, 1646 nömrəsinə edilən bütün zənglər xidmətin səviyyəsinin ölçülməsi məqsədilə avtomatik rejimdə qeydə alınır və lent yazısında yaddaşda saxlanılır. Hər hansı mübahisəli məsələ meydana çıxdığı zaman həmin lent yazısına qulaq asmaq mümkündür.

Sakinlərin Müraciət Xidmətinin 1646 nömrəli telefonuna edilən zənglər ödənişsizdir. Sakinlər bütün stasionar və mobil telefonlardan zəng edə bilirlər. Bu xidmətin fəaliyyətində operativlik, nəzakətlilik və məsuliyyət əsas yer tutur. Vətəndaşlara göstərilən xidmət proqram təminatı yüklənmiş informasiya texnoıogiyaları vasitəsilə reallaşdırılır, mübahisələrin həllini və əhalinin müvafiq informasiya əldə etməsini sürətləndirir.

Telefon xidməti zamanı daxil olan zənglərin, verilən məlumatların və göstərilən xidmətlərin qeydiyyatı aparılır. Məhz bunun nəticəsidir ki, hazırda rayon icra hakimiyyəti rəhbərliyində yerli strukturların fəaliyyətinə nəzarət daha da gücləndirilmişdir.

Mən sözügedən xidmətin qısa müddət ərzində səmərəli fəaliyyətini təsdiqləyən bəzi rəqəmləri də diqqətə çatdırmaq istərdim. 1646 Sakinlərin Müraciət Xidmətində fevral ayının 5-dən 27-dək 398 şikayətə baxılmışdır. Həmin şikayətlərin187-si həll olunmuş, o cümlədən, 139-u tam həllini tapmış, 12-nə qismən, 36-na müvafiq izahat verilmişdir. Hazırda 211 şikayət icraatdadır. Eyni zamanda, 643 müraciət birbaşa cavablandırılmışdır. Bundan başqa, 727 şəxslə əks-əlaqə yaradılmışdır. Bu isə o deməkdir ki, Sakinlərin Müraciət Xidməti tərəfindən göstərilən sayda vətəndaşın qaldırdığı məsələnin həll edilib-edilməməsi araşdırılmışdır. Ümumilikdə, Sakinlərin Müraciət Xidmətinə bu müddət ərzində 1041 zəng daxil olmuşdur.

Rayonda Sakinlərin Müraciət Xidmətinin fəaliyyət dairəsini daha da genişləndirmək üçün hazırda bir sıra tədbirlər həyata keçirilir. İndiyədək sakinlərə xidmət haqqında ətraflı təsəvvür yaradan 10 min ədəd buklet paylanılmışdır. Bundan sonra daha 40 min bukletin paylanılması da nəzərdə tutulmuşdur. Eyni zamanda, rayon icra hakimiyyətinin nümayəndələri tərəfindən yaşayış sahələrində keçirilən yığıncaqlarda xidmətin fəaliyyəti barədə ətraflı məlumat verilir.

Yeri gəlmişkən, hər həftənin cümə axşamı rayon icra hakimiyyətinin qərargah iclasında həllini tapmayan şikayətlərə baxılır və icrası istiqamətində uyğun qərarlar çıxarılır. Ayda bir dəfə isə şikayətlərin icrasına laqeyd münasibət bəsləyən qurumların tabe təşkilatlarına bu barədə məlumatlar verilir. Ümumiyyətlə, Binəqədi Rayon İcra Hakimiyyətinin başçısı Xaləddin İsgəndərov 1646 Sakinlərin Müraciət Xidmətinin fəaliyyətini diqqət mərkəzində saxlayır, xidmətə daxil olan şikayət və müraciətlərə həssaslıqla yanaşılmasına mühüm önəm verir.

Sonda demək istərdim ki, cənab İlham Əliyevin dəfələrlə vurğuladığı kimi, Azərbaycanda hər bir məmurun başlıca vəzifəsi xalqa, vətəndaşlara layiqli və vicdanlı xidmət olmalıdır. Fəaliyyətini məhz bu prinsip əsasında quran Binəqədi RİH də dinamik yüksəliş üçün bütün zəruri tədbirləri həyata keçirməyə, ölkədəki inkişaf prosesinə töhfəsini verməyə çalışır. Ulu öndərin hakimiyyəti dövründə özü üçün güclü istehsal potensialı, zəngin infrastruktur formalaşdırmış Binəqədi rayonu bu gün cənab İlham Əliyevin diqqət və qayğısı ilə böyük uğurlar əldə etmiş, daha da gözəlləşmiş, müasirləşmişdir. Bütün bunlar rayonun həyatında başlanmış yeni intibah mərhələsinin uğurlu başlanğıcıdır. Hazırda hər bir binəqədili dövlət başçımız cənab İlham Əliyevin rəhbərliyi altında qazanılan uğurları həyatında daha qabarıq hiss edir, yüksəliş və tərəqqi kursunu ürəkdən dəstəkləyir.

Söhbəti yazdı: Vaqif BAYRAMOV

Xalq qəzeti.- 2013.- 5 mart.- S. 4.