Regionlarda içməli su layihələrinin icrası intensivləşir

“Azərsu” Açıq Səhmdar Cəmiyyəti Bakı şəhərinin, eləcə də respublikanın iri şəhər və rayon mərkəzləri ilə yanaşı, kənd və qəsəbələrinin də içməli su təchizatının yaxşılaşdırılmasına xüsusi diqqət yetirir. Səhmdar cəmiyyətin təxirəsalınmaz tədbirlər proqramına uyğun olaraq hazırda bölgələrdə içməli su çatışmazlığı müşahidə olunan kənd və qəsəbələrdə mühüm işlər görülür.

Proqram çərçivəsində Oğuz rayonunun Xaçmaz, Böyük Söyüdlü, Kərimli, Bayan, Bucaq, Muxas və Baş Daşağıl kəndlərinin içməli su təchizatının yaxılaşdırılması layihələri uğurla başa çatdırılmış və Novruz bayramı ərəfəsində yeni infrastruktur istismara verilmişdir. Martın 11-də Böyük Söyüdlü, Kərimli, Bayan, Bucaq, Muxas və Baş Daşağıl kəndlərinə, martın 12-də isə Xaçmaz kəndinə suyun verilməsi ilə əlaqədar açılış mərasimləri keçirilmişdir.

“Azərsu” ASC-nin “Birləşmiş Sukanal” MMC-nin direktoru Etibar Məmmədov bildirmişdir ki, “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”na uyğun olaraq bölgələrdə su təchizatı və kanalizasiya infrastrukturu yenidən qurulur və bu sahədə işlər şəhər mərkəzləri ilə yanaşı, kənd və qəsəbələri də əhatə edir. Qeyd olunmuşdur ki, Prezident İlham Əliyevin ölkəmizin hər bir şəhər və kəndinin 24 saat fasiləsiz və keyfiyyətli içməli su ilə təmin edilməsi barədə tapşırıqlarına uyğun olaraq bu istiqamətdə bölgələrdə genişmiqyaslı işlər həyata keçirilir. Hazırda “Azərsu” ASC-nin sifarişi əsasında ölkənin 24 şəhər və rayon mərkəzində, həmçinin 300-dən artıq kənd və qəsəbəsində su layihələrinin uğurla icra olunduğunu diqqətə çatdıran E. Məmmədov 2013-cü ildə isə 10-a yaxın şəhərdə yeni layihələrə start veriləcəyini bildirmişdir. Bu tədbirlərin tərkib hissəsi olan Oğuz rayonunun 7 kəndinin içməli su təchizatının yaxşılaşdırılması nəticəsində içməli sudan əziyyət çəkən 17 mindən artıq sakinin problemi öz həllini tapmışdır. Gələcəkdə isə rayonun digər kəndlərində də su layihələrinin icrası planlaşdırılır.

Mərasimdə çıxış edən Oğuz Rayon İcra Hakimiyyətinin başçısı Eyvaz Qurbanov həyata keçirilən layihənin rayonun sosial-iqtisadi inkişafına töhfə verdiyini qeyd etmiş və “Azərsu” ASC-nin regionlarda su təchizatı və kanalizasiya sistemlərini yenidən qurulması üzrə fəaliyyətinin yüksək qiymətləndirmişdir. Göstərdiyi diqqət və qayğıya görə rayon ictimaiyyəti adından ölkə başçısına minnətdarlığını bildirən E. Qurbanov son illər Oğuzda infrastruktur layihələrinin icrasının sürətləndiyini söyləmişdir: Bu gün istismara verilən içməli su layihələrinin sakinlərə ən gözəl bayram hədiyyəsi kimi dəyərləndirən natiq bu işlərdə əməyi olan hər bir şəxsə oğuzlular adından təşəkür etmişdir. O, hazırda kəndlərlə yanaşı, Oğuz şəhərində də su və kanalizasiya sistemlərinin tamamilə yenidən qurulmasını, eləcə də rayonuda həyata keçirilən təbii qaz, yol layihələrinin turizmin inkişafına böyük təkan verəcəyini və bunun da əhalinin sosial vəziyyətinin yaxşılaşmasına səbəb olacağını bildirmişdir.

Açılış mərasimlərində çıxış edən kənd sakinləri neçə illərdir davam edən və kəndlərin ən böyük qayğılarından olan içməli su məsələsinin həllinə göstərdiyi diqqət və qayğıya görə ölkə rəhbərliyinə, “Azərsu” ASC-nin kollektivinə minnətdarlıqlarını bildirmişlər.

Yeri gəlmişkən, 2012-ci ildə icrasına başlanmış layihə çərçivəsində bulaq və çaylarda sugötürücü qurğular tikilmiş, ümumi uzunluğu 80 kilometr olan magistral su xətti çəkilmişdir. Rayonun 7 kəndini fasiləsiz içməli su ilə təmin etmək məqsədilə ümumi tutumu 4600 kubmer olan 11 ədəd su anbarı tikilmiş, 223 kilometr uzunluğunda paylayıcı su şəbəkəsi yaradılmışdır. Bundan əlavə, kəndlərdə hər bir evə birləşmə verilmiş və 3425 ədəd su sayğacı quraşdırılmışdır. Layihənin icrası nəticəsində Oğuz rayonunun Xaçmaz kəndinin 7140, Böyük Söyüdlü kəndinin 1140, Kərimli kəndinin 3240, Bayan kəndinin 1770, Bucaq kəndinin 1480, Muxas kəndinin 1415 və Baş Daşağıl kəndinin 1265 sakininin içməli su təchizatı əsaslı şəkildə yaxşılaşdırılmışdır.

Xatırladaq ki, “Azərsu” ASC Ağdam, Tərtər, Füzuli, Ağcabədi, Zaqatala, Balakən, Salyan, Xızı, Şabran, Siyəzən, Lerik, Yardımlı və Gədəbəy rayonlarının içməli su çatışmazlığı müşahidə olunan kəndlərində də qısa müddətdə belə layihələr həyata keçirmişdir. Görülmüş tədbirlər nəticəsində 2012-ci ildə həmin rayonların 32 mindən çox sakininin içməli su problemi öz həllini tapmışdır.

Mirbağır YAQUBZADƏ

Xalq qəzeti.- 2013.- 14 mart.- S. 7.