ARDNŞ-in İnsan Resursları Departamentində QHT-lərin iştirakı ilə müşavirə

Azərbaycanda korrupsiya və rüşvətxorluğa qarşı mübarizə son illər daha ciddi xarakter almışdır. Azərbaycan Respublikasının Prezidenti cənab İlham Əliyev iqtisadiyyatdakı inhisarçılıq meyillərinin qarşısını almağı, azad rəqabət mühitinin yaradılmasını təmin etməyi, vergidən yayınma hallarına qarşı təsirli tədbirlər görməyi, qiymətlərin süni şəkildə şişirdilməsinə yol verməməyi, əsassız yoxlamalara son qoymağı, ölkə həyatının bütün sahələrində rüşvətxorluğa və korrupsiyaya qarşı daha ciddi və sistemli mübarizə aparmağı mühüm vəzifə kimi qarşıya qoymuşdur. Ona görə də bu gün ölkəmizin hər yerində bu məsələ ciddi nəzarətdədir və bununla bağlı mühüm tədbirlər həyata keçirilir.

ARDNŞ İnsan Resursları Departamentində qeyri-hökumət təşkilatlarının iştirakı ilə keçirilən müşavirə də bu mühüm məsələyə həsr olunmuşdu. Yüksək və işgüzar şəraitdə keçirilən müşavirədə müxtəlif ictimai birliklərin, assosiasiyaların, fondların, şirkətlərin, konfederasiyaların, mərkəzlərin və digər qeyri-hökumət təşkilatlarının rəhbərləri və nümayəndələri iştirak etmişlər.

Toplantıda giriş sözü ilə çıxış edən ARDNŞ İnsan Resursları Departamentinin rəisi Asif Bəkirli departamentin yaranması və fəaliyyəti barədə ətraflı məlumat vermişdir. O, bildirmişdir ki, ARDNŞ işə qəbul prosedurlarını təkmilləşdirməklə daha şəffaf prinsiplərə söykənmiş və bu işdə obyektivliyi əsas götürmüşdür. İmtahanların keçirilməsi və testləşdirmə prosesi beynəlxalq təcrübə və standartlara uyğunlaşdırılmışdır. ARDNŞ sistemində işə götürülən hər bir vətəndaş öz bilik, bacarıq və səriştəsinə güvənərək imtahanlarda iştirak edib müvəffəqiyyət qazanmışdır. Hazırda bu proses uğurla davam etməkdədir. İşçilərlə əlaqələr yüksək səviyyədə qurulmuşdur. ARDNŞ-də fəaliyyət göstərən hər bir əməkdaş öz seçimi ilə təhsilinə, biliyinə, iş təcrübəsinə, bacarıq və səriştəsinə uyğun olaraq karyera inkişafını təmin edə biləcək.

A.Bəkirli bildirmişdir ki, ARDNŞ xarici və daxili təqaüd proqramları həyata keçirərək potensial kadrların formalaşmasına əsas vermişdir. Daha sonra departamentin fəaliyyətini və strukturda olan dörd şöbənin işini əks etdirən təqdimat keçirilmişdir.

Müşavirədə çıxış edən QHT-lərin Antikorrupsiya şəbəkəsinin koordinatoru, “Konstitusiya” Araşdırmalar Fondunun prezidenti Əliməmməd Nuriyev bildirmişdir ki, peşəkar kadrların seçilməsində ədalətlilik və obyektiv prinsiplərin olması Azərbaycan dövlətinin maraqlarını və onun gələcəyini təmin edir. O qeyd etmişdir ki, bu nümunəvi tədbir dövlət qurumları və vətəndaş cəmiyyəti arasındakı münasibətlərin möhkəmlənməsinə müsbət təsir göstərir. Bunun nəticəsində vətəndaşlarda qanuna və qanunun aliliyinə inam artır.

Daha sonra Azərbaycan Respublikası Prezidenti yanında Dövlət Qulluğu Məsələləri üzrə Komissiyanın sədr müavini Fuad Mayılov maddi sərvətlərin insan kapitalına, intellekt məhsuluna çevrilməsinin vacib bir ictimai məqsəd olmasından bəhs etmişdir.

Qeyd olunmuşdur ki, hüquqi dövlət və vətəndaş cəmiyyəti quruculuğunda bizə peşəkar kadrlar lazımdır. Son dövrlərdə Azərbaycan iqtisadiyyatının çox sürətlə inkişaf etməsi peşəkar kadrların hazırlanması və üzə çıxarılmasının nəticəsində mümkün olmuşdur. Bütün sahələrdə olduğu kimi, kadrların hazırlanması sahəsində də korrupsiya və rüşvətxorluqla mübarizə sənayemizin və iqtisadiyyatımızın inkişafına səbəb olmuşdur.

Müşavirədə “Konstitusiya” Araşdırmalar Fondu, Sahibkarlığın və bazar iqtisadiyyatının inkişafına yardım Fondu, Korrupsiyaya qarşı mübarizə Fondu, Sahibkarlar Təşkilatları Milli Konfederasiyası, İqtisadi və Sosial İnkişaf Mərkəzi, Sahibkarlığın və bazar iqtisadiyyatının inkişafına yardım Fondu, Effektiv Təşəbbüslər Mərkəzi, “Hüquq və İnkişaf” İB, “Demokratiyanı Öyrənmə” İB, Neftçilərin Hüquqlarının Müdafiə Təşkilatı, “Cəmiyyət və Vətəndaş Münasibətlərinin İnkişafı” İB, “Azərbaycan Hüquq İslahatları Mərkəzi” İB, İqtisadi və Sosial İnkişaf Mərkəzi, “Ümid” İB, İqtisadi Tədqiqatlar Mərkəzi, “Ekoaləm” İB, Sosial-Strateji Tədqiqatlar və Analitik Araşdırmalar Mərkəzi, “Demokratik Təsisatlar və İnsan Hüquqları” İB və “Qadınlar Arasında Həmrəylik” İB-nin nümayəndələri iştirak etmişlər.

Müşavirə iştirakçıları belə tədbirlərin tez-tez keçirilməsini məqsədəuyğun hesab etdiklərini bildirmişlər. Tədbirdə ədalətlilik və obyektivlik prinsipinin cəmiyyətin bütün sferalarında öz əksini tapmasının vacibliyi vurğulanmışdır.

Müşavirədə iştirakçıların sualları ətraflı cavablandırılmışdır. Müzakirələrdə qeyd olunmuşdur ki, korrupsiya və rüşvətxorluqla mübarizənin gücləndirilməsi həm təhsil, həm səhiyyə, həm də sənaye sahələrində yüksək nəticə verməkdədir.

Görüşün sonunda tədbir iştirakçıları müsbət rəylərini ifadə etmiş və bu kimi işlərdə vətəndaş cəmiyyətinin rolunun gücləndirilməsində göstərdiyi təşəbbüsə görə ARDNŞ rəhbərliyinə öz təşəkkürlərini bildirdilər.

M. MÜKƏRRƏMOĞLU

Xalq qəzeti.- 2013.- 16 mart.- S. 7.