FÜZULİ: sahibkarlığa şərait də var, qayğı da

Əvvəlcə bəzi statistik rəqəmlərə diqqət yetirək:

Hazırda rayonda 200-dən artıq sahibkarlıq obyekti fəaliyyət göstərir ki, bunların da 130-u son 2 ildə yaradılmışdır.

Bu gün rayonda istehsal olunan kənd təsərrüfatı və sənaye məhsulları istehsalı yüz faiz özəl bölmənin payına düşür.

Keçən il rayonun fermer və sahibkarları 103 min tona yaxın taxıl götürmüşlər. Bu, rayon tarixində ən yüksək göstəricidir və Füzuli, respublika üzrə 100 min ton həddini keçən rayonlardan biri olmuşdur. Halbuki ərazisinin 70 faizi hələ də düşmən tapdağı altındadır.

Azərbaycan Respublikasının Prezidenti İlham Əliyev ötən il dekabr ayının 15-də Füzuliyə tarixi səfəri zamanı son 2 ildə tikilib istifadəyə verilmiş 10 mühüm obyektin, o cümlədən Əhmədbəyli kəndində 3 min ton kənd təsərrüfatı məhsulları saxlayan soyuducu anbarın açılışında iştirak etmiş, bazar iqtisadiyyatına, azad sahibkarlığın inkişafına göstərilən diqqət və qayğını yüksək qiymətləndirmişdir.

Təkcə son vaxtlar yaradılmış sahibkarlıq obyektlərində 500-dən çox rayon sakini daimi işlə təmin olunmuşdur.

Yuxarıda sadaladığımız fakt və rəqəmlərdən də göründüyü kimi, son vaxtlar Füzuli rayonunda həyatın bütün sahələrində əsaslı yüksəliş və dinamik inkişaf əldə edilmişdir. Ən əsası isə odur ki, cəbhə xəttində, düşmənlə üzbəüz dayanmış bu insanların əhval-ruhiyyəsi yüksəlmiş, təşəbbüskar və yaradıcı mühit, sağlam mənəvi-psixoloji ab-hava yaranmışdır.

Ölkə Prezidenti İlham Əliyevin qarşıya qoyduğu mühüm vəzifələr, o cümlədən özəl bölmənin, azad sahibkarlığın daha sürətli inkişafı ilə əlaqədar verdiyi tapşırıq və tövsiyələr Füzuli rayonunda da böyük diqqət, səy və ardıcıllıqla həyata keçirilir. Azad sahibkarlığın inkişafına göstərilən həssas münasibət, bu sahədə yaradılmış münbit və əlverişli şərait, əsassız yoxlamaların, süni maneələrin aradan qaldırılması istiqamətində işlənib hazırlanmış əsaslı və ardıcıl tədbirlər xüsusilə diqqəti cəlb edir. Heç də təsadüfi deyildir ki, son 2 ildə müxtəlif təyinatlı özəl müəssisələrin sayı 2 dəfədən çox artmışdır.

Burada sözsüz ki, ilk növbədə, ölkə başçısının respublikamızda azad sahibkarlığın, bazar iqtisadiyyatının sürətli inkişafına yönəldilmiş ardıcıl və qətiyyətli fəaliyyətini, bu sahəyə göstərdiyi gündəlik diqqət və qayğını, imzaladığı fərman və sərəncamları ayrıca qeyd etmək lazımdır. Füzulidə tanış olduğum, görüşdüyüm, söhbət etdiyim sahibkarlar, iş adamları, fermerlər, yaradılmış azad, rahat və münbit şərait üçün ölkə rəhbərinə hədsiz minnətdarlıqlarını bildirdilər, bütün imkan və səylərini iqtisadiyyatın daha da genişləndirilməsinə yönəldəcəklərini bəyan etdilər.

Burada məsələnin başqa bir tərəfi də diqqəti cəlb edir. Bu da ondan ibarətdir ki, yuxarıda da qeyd etdiyimiz kimi, Füzulidə fəaliyyət göstərən özəl müəssisələrin, sahibkarlıq obyektlərinin böyük əksəriyyəti məhz son 2 ildə yaradılmışdır. Deməli, söhbət yerlərdə işin düzgün təşkilindən, yaradılan əlverişli mühitdən, diqqət və qayğıdan gedir. Böyük məmnuniyyət hissi ilə demək lazımdır ki, Füzuli Rayon İcra Hakimiyyətində, onun yerli strukturlarında bu sahədə ardıcıl və sistemli iş qurulmuş, sahibkarlara, iş adamlarına həssas və qayğıkeş münasibət ön plana çəkilmişdir.

Təsadüfi deyildir ki, son 2 il ərzində burada iş qurmaq istəyən sahibkarlar qarşısında yaşıl işıq yandırılmışdır. Füzuliyə axırıncı səfərimin də əsas məqsədi və mahiyyəti məhz bu idi: bu gün rayonda fəaliyyət göstərən sahibkarlarla iş necə qurulmuşdur? Mövcud imkan və potensial necə üzə çıxarılır, işin daha yaxşı təşkili üçün əlavə imkan və səylər necə səfərbər olunur? Sabahkı qayğılar, arzu və düşüncələr, məqsəd və vəzifələr barədə nə demək olar?

Nəriman Əliyev, “Qarabağ Broyler” MMC-nin rəhbəri:

– Qətiyyətlə deyə bilərəm ki, ötən il dekabr ayının 15-i kollektivimizin hər bir üzvünün, bütövlükdə Füzuli rayonu əhalisinin qəlbində əziz və unudulmaz bir xatirə kimi daim yaşayacaqdır. Məhz həmin gün ölkə Prezidenti İlham Əliyev Füzuliyə tarixi səfər etmişdir. Prezidentlə keçirilən unudulmaz anlar, görüş və söhbətlər, işimizin daha yaxşı təşkili üçün verdiyi qiymətli məsləhət, təklif və tövsiyələr yaddaşımıza əbədi olaraq həkk olunmuşdur.

Müəsisənin tikintisinə 2011-ci ildə başladıq. Yeri gəlmişkən, onu da əlavə edim ki, rayon rəhbərliyi bu təşəbbüsümüzü böyük razılıq və minnətdarlıqla qarşıladı. Sənədləşmə, müvafiq yerin ayrılması və s. məsələlər qısa müddət ərzində öz müsbət həllini tapdı.

“Qarabağ Broyler”in illik istehsal gücü 2,5-3 min ton quş ətidir. Hazırda ayda 150-180 ton ət istehsal edə bilirik. İşçilərimizin sayı isə 100 nəfərdir. Tam gücü ilə işləyəndən sonra isə burada 170 nəfər daimi işlə təmin olunacaqdır.

Onu da əlavə edək ki, Füzuli rayonunda sahibkarların, iş adamlarının azad və sərbəst fəaliyyəti üçün heç bir maneə yoxdur. Kim gücü, imkanı daxilində harada nə açmaq, yaratmaq istəyirsə heç bir süni maneə olmadan fəaliyyət göstərə bilər. Rayonumuzun zəngin təbii sərvətləri, hələ istifadə edilməmiş imkan və ehtiyat mənbələri çoxdur. Bu isə, heç şübhəsiz, azad sahibkarlığın sürətli inkişafı üçün olduqca əhverişli şərait yaradır. Beləliklə, mən iş adamlarını, sahibkarları Füzuliyə dəvət edirəm. Burada sizi xoş və səmimi münasibət, əlverişli şərait, diqqət və qayğı gözləyir. Təki imkan və təcrübənizə, arzu və məqsədlərinizə uyğun olaraq tikin, qurun, yaradın, yeni iş yerləri açın.

Şəhriyar Əliyev, “Şəhriyar” ailəvi istirahət mərkəzinin direktoru:

– Füzulinin gözəl təbiəti, təmiz havası burada həm də istirahət mərkəzlərinin yaradılmasını zəruri edir. Onu da əlavə edim ki, bizim istirahət mərkəzi bu istiqamətdə hələlik birincidir. Şübhə etmirəm ki, gələcəkdə rayonumuzda belə mərkəzlərin sayı çox olacaqdır. Axı, insanlar yaxşı işlədikləri kimi, yaxşı da istirahət etmək istəyirlər. Başqa yerlərə getmək isə həm vaxt, həm də əlavə vəsait tələb edir. Bu cəhətdən rayonumuzun ərazisində yaradılmış belə istirahət mərkəzləri olduqca əlverişlidir.

İstirahət mərkəzində əylənmək, boş və asudə vaxtını maraqlı və məzmunlu keçirmək üçün hər cür şərait yaradılmışdır. Biz bu mərkəzi yaradarkən respublikamızın, eləcə də dünyanın ən məşhur istirahət ocaqlarının müsbət təcrübəsindən yaradıcılıqla istifadə etməyə çalışmışıq. Hələlik burada 50 nəfər daimi işlə təmin olunmuşdur. Əlbəttə, gələcək illərdə mərkəzin imkanları genişləndikcə işçilərin də sayı artacaqdır.

Bu günlərdə maraqlı, həm də düşündürücü bir hadisə ilə rastlaşdım. Əslən Füzuli rayonundan olan köhnə tanışlarımdan biri ilə görüşdüm. Hal-əhvaldan sonra məlum oldu ki, xarici ölkələrdən birindən istirahətdən təzəcə qayıdıb. Təəssüratı zəngin idi, necə deyərlər, dil qəfəsə qoymurdu. Buna sözümüz yoxdur. Kim hara istəsə səfər edə bilər, istiharətini harda istəsə keçirə bilər. Ancaq mənim demək istədiyim mətləb başqadır. Sözarası tanışımdan soruşdum ki, son vaxtlar yolu Füzuliyə düşübmü, yeni yaradılan istirahət ocaqlarından xəbəri varmı?

– Yox, –dedi, sonra da günahkarcasına gülümsəyərək –Dünyanı gəzirik, burdan-bura rayonumuza gedə bilmirik. Ancaq gərək bu yaxınlarda vaxt tapıb mütləq gedəm...

Yenə də təkrar edirəm: mən dünyanı gəzməyin, görməyin əleyhinə deyiləm. Bu, olduqca vacibdir. Ancaq bir atalar sözündə deyildiyi kimi, əvvəlcə evin içi, sonra çölü... Onu da deyim ki, indi, necə deyərlər, evin içi daha abad, gözəl və zəngindir. Deməli, gəlməyə, gəzməyə və görməyə dəyər...

Aydın Hüseynov, kənd təsərrüfatı məhsulları soyuducu anbarının müdiri:

– Etiraf edim ki, Füzuli rayonu ərazisində soyuducu anbar kompleksinin yaradılması barədə çoxdan düşünürdüm. Ancaq konkret olaraq belə bir imkan və şərait yalnız 2011-ci ildə yarandı. Ona görə də dərhal işə başladıq. Müəssisənin açılışına Prezident İlham Əliyevin xeyir-dua verməsi isə unudulmaz bir hadisə oldu. Heç kimə sirr deyildir ki, əvvəllər kənd əməkçiləri bu cəhətdən çox əziyyət çəkirdilər. Üstəlik, bir çox hallarda ili ziyanla başa vururdular, böyük zəhmət bahasına yetişdirdikləri məhsulun bir hissəsi xarab olurdu. Ona görə ki, məhsulları saxlamaq üçün müvafiq yer yox idi. Başqa yerlərə aparmaq isə əlavə vaxt və vəsait tələb edirdi.

Füzuli ənənəvi kənd təsərrüfatı rayonudur. O da fərəhlidir ki, son illər məhsul istehsalı dinamik şəkildə inkişaf edir. Başqa sözlə desək, belə bir böyük soyuducu anbarın tikintisinə ciddi ehtiyac vardı. İllik gücümüz 5 min tondur. Hazırda burada 1800 ton məhsul var. 25 nəfər daimi işlə təmin olunmuşdur. Soyuducu anbar tam gücü ilə işləyəndən sonra isə daimi işləyənlərin sayı 90 nəfər olacaqdır.

Bütün füzulililər kimi, mən də ölkə Prezidenti İlham Əliyevin ötən il dekabr ayının 15-də rayonumuza tarixi səfəri zamanı dərin məzmunlu çıxışının, dediyi müdrik sözlərin, səmimi arzu və tövsiyələrin təsiri altındayam. Böyük qürur və iftixar hissi ilə bildirmək istəyirəm ki, ölkə başçısı Füzuliyə səfəri çərçivəsində bizim müəssisənin fəaliyyəti ilə yaxından tanış olmuş, açılış mərasimində iştirak etmişdir. Bu, əlbəttə, hər birimizin məsuliyyət hissini daha da artırmaqla bərabər, yaddaşımızda unudulmaz xatirələr yaratmışdır. Prezident Füzulinin bərpasını, işğaldan azad olmuş torpaqlarda yaradılmış şəraiti, qısa müddət ərzində burada görülmüş işləri yüksək qiymətləndirərək demişdir: “Füzulidə son illər ərzində görülən işlərlə bağlı sizi təbrik etmək istəyirəm. Sizi əmin etmək istəyirəm ki, Prezident kimi bundan sonra da Füzuli rayonunun inkişafı ilə bağlı səylərimi əsirgəməyəcəm. Daim bu məsələ diqqət mərkəzində olacaqdır. Biz hələ çox-çox görüşəcəyik, çünki Füzulidə gələcəkdə böyük işlər görüləcək, böyük açılışlar olacaqdır”.

Böyük qətiyyət və tam əminliklə demək istəyirəm ki, ölkə Prezidentinin Füzuliyə tarixi səfəri, qısa müddət ərzində görülmüş işlərə verdiyi yüksək qiymət, keçirilən unudulmaz görüş və söhbətlər, yüksək hədəflərə istiqamətlənmiş arzu, tövsiyə və tapşırıqlar hər birimizin qəlbində böyük qürur və iftixar hissi oyatmışdır. Dövlət başçısının bu münasibəti qurub-yaratmaq əzmimizi, sabaha olan inam və ümidimizi daha da yüksəlmiş, bütün imkan və səylər hərəkətə gətirilmişdir. Deməli, cəbhə xəttində yerləşən, düşmənlə üz-üzə dayanan, ona göz dağı olan Füzulinin daha abad, qalib və xoşbəxt günləri hələ qabaqdadır.

Ziyəddin SULTANOV

Xalq qəzeti.- 2013.- 20 mart.- S. 7.