Söz cəbhəsinin veteranı

Ələsgər CABBAROV - 80

Biz hamımız hörmət əlaməti olaraq, qocaman jurnalist Ələsgər Cabbarova “əmi” deyirik.

Əslində o, bizim ağsaqqalımız, müəllimimiz, ustadımızdır. İxtisasca jurnalist deyil, 57 il bundan əvvəl Azərbaycan Sənaye İnstitutunu bitirib. Amma Ələsgər Cabbarovu mühəndis kimi yox, daha çox qələm adamı kimi tanıyıblar.

Neft-maşınqayırma zavodunda işləyərkən Azərbaycan radiosu ilə əməkdaşlıq edib. Əmək adamlarının fədakarlığını əks etdirən söhbətləri, reportajları, elmi-kütləvi verilişləri dinləyicilər tərəfindən rəğbətlə qarşılanıb. “Elm və həyat” jurnalı yaradılanda, elmi mövzuya yaxşı bələd olan Ələsgər müəllimi də redaksiyaya işə dəvət ediblər. Elmi-kütləvi nəşrdə çalışmaq hər adamın işi deyil. Spesifik xüsusiyyətləri olan “Elm və həyat” jurnalında Ələsgər Cabbarovdan əmək adamı haqqında oçerk hazırlamaq, yaxşı bildiyi istehsalat sahəsi barədə məqalə yazmaq tələb olunmurdu. Burada o, tanınmış alimlərin yazılarını redaktə etməli, respublikamızda və dünyada baş verən elmi-texniki yenilikləri oxucuya çatdırmalı idi. Ələsgər Cabbarov bu işin öhdəsindən layiqincə gəldi və jurnalın oxucu rəğbəti qazanmasında böyük pay sahibi oldu. Onun imzasını tanıyır, yazılarını maraqla oxuyurdular.

İş elə gətirdi ki, Ələsgər müəllimin yazı tərzi, özünəməxsus üslubu, terminlərdən yerində istifadə etmək bacarığı böyük şairimiz Rəsul Rzanın da diqqətini cəlb etdi. Ələsgər Cabbarov həmişə istedadlı gəncləri axtaran, himayə edən bu söz sərrafının Azərbaycan Sovet Ensiklopediyasında işləmək təklifi ilə məmnuniyyətlə razılaşdı və uzun illər Rəsul Rzanın rəhbərlik etdiyi yaradıcı kollektivdə çalışdı.

Ələsgər Cabbarov düz on iki il “Xalq qəzeti”nin bölgə müxbiri olub. Onun müxtəlif illərdə “Sovet kəndi”, “Azərbaycan gəncləri”, “Bakı”, “Səhər” qəzetlərində də çoxlu məqaləsi dərc olunub. Təcrübəli jurnalistin fikrincə, hər bir yazı oxucuya təkcə informasiya yox, müəyyən bilik də verməlidir. O, əlinə qələm alanda, ilk növbədə, bu barədə düşünür. Yoxsa, dili yaxşı bilən, mübtədanın, xəbərin cümlədə yerini müəyyənləşdirməkdə problemi olmayan bir jurnalist üçün bir qəzet səhifəsi həcmində material hazırlamaq nə böyük işdir ki?.. “Elm və həyat” jurnalında, Azərbaycan Sovet Ensiklopediyasında çalışarkən oxucuya bilik vermək bacarığına yiyələnməsi Ələsgər Cabbarovu başqa jurnalistlərdən fərqləndirib. Məhz bu cəhətinə görə “Azərnəşr”də buraxılan bir neçə kitabın redaktorluğu Ələsgər müəllimə tapşırılıb.

Uşaqlıq və gənclik illərini Azərbaycanın səfalı guşələrindən olan Qəbələdə keçirən Ələsgər Cabbarovu bölgələrdə də yaxşı tanıyırlar. O, əlində qələm ölkəmizi kəndbəkənd gəzib. Necə deyərlər, səmimiyyəti, mehribanlığı ilə hər kənddə özunə bir ev tikib, dost qazanıb. Mehriban ailə başçısı, sədaqətli dost, qayğıkeş insan kimi tanınan Ələsgər müəllimin sözünə, məsləhətinə ehtiyac duyanların sayı yüzlərlə, minlərlədir.

Xatirə danışmaq, gənclik illərini xatırlamaq yaşlı adamlara xas olan cəhətlərdəndir. Ələsgər Cabbarov da tez-tez dönüb geriyə baxmağı, keçdiyi ömür yoluna nəzər salmağı xoşlayır. Danışdıqca fərəhlənir, sevinir ki, həmişə xeyirxahlığı, vətəndaşlıq mövqeyi ilə fərqlənib, Vətənini, xalqını sevən bir insan kimi tanınıb.

Ələsgər Cabbarov Azərbaycan Mətbuat Şurası Ahıl Jurnalistlər Məclisinin üzvüdür. Keçirilən tədbirlərdə, aparılan müzakirələrdə həmişə fəallığı ilə seçilir. Onun adını hörmətlə çəkir, çıxışını maraqla dinləyirlər. Duzlu, məzəli söhbətləri də öz yerində. Ən əsası isə odur ki, Ələsgər müəllim bu gün də qələmindən ayrılmayıb, müxtəlif qəzetlərlə əməkdaşlıq edir, yaradıcılıq nümunəsi sayıla biləcək məqalələr yazır. Respublika Ağsaqqallar Şurasının təbliğat informasiya işinə bacardığı köməyə edir.

Ömrünün 6 onilliyi sözə, elmə, faydalı biliyin yayılmasına həsr etmiş ağsaqqal qələm dostumuzu səksən illik yubileyi münasibətilə ürəkdən təbrik edir, ona cansağlığı, yaradıcılıq uğurları arzulayırıq!

Məzahir SÜLEYMANZADƏ,

əməkdar mədəniyyət işçisi,

Azərbaycan Mətbuat Şurası Ahıl

Jurnalistlər Məclisinin sədr müavini

Xalq qəzeti.- 2013.- 14 may.- S. 9.