Böyük alim Əhməd Mahmudovun ömür yoluna işıq salan kitablar çapdan çıxmışdır

Azərbaycanın görkəmli elm fədaisi, akademik Əhməd Mahmudovun ömür yolu və zəngin yaradıcılığından bəhs edən iki kitab nəşr edilmişdir. AzərTAc xəbər verir ki, “İndiqo” mətbəəsində nəfis şəkildə çapdan çıxmış “Akademik Əhməd Mahmudov” və “Şahtaxtıdan başlanan ömür” adlı bu kitablarda dəyərli alim haqqında dolğun məlumatlar öz əksini tapmışdır.

“Akademik Əhməd Mahmudov” kitabının müəllifi Azərbaycan Milli Elmlər Akademiyasının (AMEA) müxbir üzvü Teymur Kərimlidir.

Kitabın redaktorları AMEA-nın müxbir üzvü, Bakı Slavyan Universitetinin rektoru, professor Kamal Abdullayev və professor Vilayət Quliyevdir.

Redaktorları akademiklər - Ziyad Səmədzadə və İsa Həbibbəyli olan “Şahtaxtıdan başlanan ömür” kitabının müəllifi isə Məmməd Əlizadədir.

Hər iki kitabda akademik Əhməd Mahmudovun yorulmaz elmi fəaliyyətindən, böyük ziyalılığından, xalqına sonsuz sevgisindən, yüksək insani keyfiyyətlərindən, qazandığı nailiyyətlərdən geniş söz açılmışdır.

Müəlliflər haqlı olaraq qeyd etmişlər ki, alimin iqtisadiyyat və onunla bağlı sahələrdəki araşdırmaları nəinki respublikamızda, eləcə də dünyanın ən nüfuzlu elm mərkəzləri yerləşən xarici ölkələrdə yüksək qiymətləndirilir. Akademikin müəllifi olduğu kitablar, monoqrafiyalar, dərsliklər uzun illərdir ki, tələbə, alim və oxucular tərəfindən dəyərli elmi vəsait kimi istifadə olunur. Onun bir sıra əsərləri xarici ölkələrin nüfuzlu elmi jurnallarında nəşr edilmişdir.

Bütün bu və digər faktların yer aldığı kitablarda görkəmli alimin həyat yolunu əks etdirən müxtəlif fotoşəkillər də öz əksini tapmışdır.

Geniş oxucu kütləsi üçün nəzərdə tutulmuş hər iki kitab görkəmli alim, akademik Əhməd Mahmudovu geniş auditoriyaya daha yaxından tanıdacaqdır.

Xalq qəzeti.- 2013.- 31 may.- S. 7.