Astarada gələcək uğurlara etibarlı zəmin yaradılır

Son vaxtlar Astaranın siması xeyli dəyişmiş, bu subtropik rayon daha da gözəlləşmişdir. Mənzərələr göz-könül oxşayır, abadlıq-quruculuq tədbirləri fərəh doğurur. Bu barədə ilk rübün yekunlarına həsr olunan şura iclasında ətraflı danışılmışdır.

İcra hakimiyyətinin başçısı Qəzənfər Ağayev ön sözündə ölkə miqyasında əldə edilən möhtəşəm nailiyyətləri diqqətə çatdırmış, Astaranın timsalında regionların inkişafının aspektlərini açıqlamışdır.

Hesabat məruzəsində qeyd olunmuşdur ki, 2013-cü ilin I rübündə ümumi məhsul buraxılışı 24 milyon 779,6 min manata çatdırılmış, bunun 51,5 faizi məhsul istehsalı sahələrində, 48,5 faizi isə xidmət sahəsində olmuşdur. 2013-cü ilin 3 ayında rayonda tikinti-abadlıq və quruculuq sahəsində xeyli iş görülmüşdür. İnşaat işlərinin aparılması üçün bütün maliyyə mənbələrindən əsas kapitala 3 milyon 428,3 min manat məbləğində vəsait yönəldilmişdir.

Heydər Əliyev prospekti genişləndirilmiş, yolun hər iki tərəfində yeni hasarlar hörülmüş, müxtəlif üzlüklər çəkilmişdir. Şəhər 1 saylı tam orta məktəbin qarşısında genişləndirmə işləri aparılmış, yeni dizaynda bağ salınmışdır. Bir çox binanın fasadı yenidən qurulmuşdur. Əsas küçələrdəki barılar yenidən tikilmiş, üzlüklər çəkilmiş, Bayraq meydanının ətrafı abadlaşdırılmışdır. Rayon Mərkəzi xəstəxanasının köhnə korpusu və poliklinika şöbəsinin əsaslı təmiri başa çatmaq üzrədir.

İlk dəfə olaraq iş adamı tərəfindən şəhərin mərkəzində 9 mərtəbəli və dövlət vəsaiti hesabına sərhədçilər üçün 6 mərtəbəli yaşayış binalarının tikintisi davam etdirilir.

Dövlət Proqramının icrası ilə əlaqədar Telman kəndində 220 şagird yerlik tam orta məktəb tikilib istifadəyə verilmişdir. 480 yerlik Şuvi, hər biri 360 yerlik Vaqo, Siyaku, Hamoşam, hər biri 220 yerlik Suparıbağ, Şağlazüzə, Asxanakəran, Motlayataq kənd tam orta və 180 yerlik Rudəkənar kənd ümumi orta məktəb binalarının inşası davam etdirilir. Asxanakəran ərazi nümayəndəliyinin Əzərud və Anboba kəndlərində 80 yerlik ibtidai məktəb binasının tikintisi ilə əlaqədar hazırlıq işlərinə başlanmışdır.

Kijəbə qəsəbəsində Lovayın su anbarının əsaslı təmiri, Heydər Əliyev Parkının, Ərçivan qəsəbəsində boks idman kompleksinin tikintisi və yeni parkın salınması davam etdirilir. Ərçivan qəsəbəsində və Şiyəkəranda kəndarası yollara asfalt döşənmiş, Pensər, Şahağac ara yollarının və 11 kilometrlik Ərçivan-Şüvi-Alaşa-Qapıçıməhəllə dairəvi yolunun əsaslı təmirinə başlanmışdır. Burzubənd-Pəlikəş-Şəvqo kəndləri istiqamətində icra hakimiyyətinin köməkliyi ilə yollar təmir edilmiş, Doli kəndinə elektrik enerjisi verilməsi təmin edilmişdir. Şəvqo kəndinə avtomobil yolunun çəkilişi davam etdirilir. Hamoşam, Asxanakəran və Pəlikəş ərazi nümayəndəliklərinə gedən yolların əsaslı təmirinə hazırlıq görülür.

Rayonda kənd təsərrüfatı məhsullarının istehsalı və satışı sahəsində uğurlar var. Yeni salınmış 120 hektar çay plantasiyasında aqrotexniki qulluq işləri aparılmışdır. Yüzlərlə hektarda isə yeni sitrus və subtropik bitkiləri, tərəvəz, dənli paxlalı bitkilər, kartof əkilmişdir. Aprelin əvvəlinə 1903 hektar sahədə yazlıq əkinlər keçirilmişdir. Çəltikçiliyin inkişafı ilə əlaqədar hazırlıq işlərinə başlanmışdır. Ötən illə müqayisədə 30 hektar çox çəltik əkilməsi nəzərdə tutulmuşdur. Aqrolizinq tərəfindən kənd təsərrüfatı məhsulları istehsalçılarına güzəştli qiymətlərlə 170 ton mineral gübrə satılmışdır.

Diri çəkidə 828 ton ət, 7466 ton süd, 1 milyon 509 min ədəd yumurta istehsal olunmuşdur.

Son dövrlərdə rayonda 5480, birinci rübdə isə 126 yeni iş yeri açılmışdır. Rayon Məşğulluq Mərkəzinə iş üçün 103 nəfər müraciət etmiş, onlardan 85-i idarə və müəssisələrdə işlə təmin olunmuşdur.

İlin əvvəlindən 682 evə qaz xətti çəkilmişdir. Mövcud xətlərdə təmir-bərpa işləri aparılmış, 2 yeni qaztənzimləyici şkaf quraşdırılmış, 8 siyirtmə dəyişdirilmişdir. Üç kəndə təbii qazın verilməsi təmin edilmiş, dörd kəndə və Kakalosdakı yeni yaşayış massivinə qaz xəttinin çəkilişinə başlanmışdır.

Rayonda vətəndaşların qəbulu, ərizə və şikayətlərinə baxılması işinin daha da yaxşılaşdırılması sahəsində xeyli iş görülmüş, onların müraciətlərində qaldırılan məsələlərin vaxtında və obyektiv həlli istiqamətində məqsədyönlü tədbirlər həyata keçirilmişdir. Yerlərdə müntəzəm olaraq keçirilən səyyar qəbullar ictimaiyyət tərəfindən razılıqla qarşılanmışdır.

Məruzə ətrafında müzakirələrdə maliyyə idarəsinin müdiri C.Abbasov, mərkəzi xəstəxananın baş həkimi E.Hüseyn, şəhər inzibati ərazi dairəsi üzrə nümayəndə M.Hüseynov, Kijəbə qəsəbə inzibati ərazi dairəsi üzrə nümayəndə R.Babayev iştirak etmişlər.

Şura iclasına yekun vuran icra hakimiyyətinin başçısı Qəzənfər Ağayev qeyd etmişdir ki, ötən müddətdə rayonda xeyli iş görülmüşdür. Sosial-iqtisadi inkişaf və geniş quruculuq işləri əhalinin böyük ruh yüksəkliyinə səbəb olmuşdur. Yerlərdə keçirdiyimiz səyyar qəbullarda qaldırılan məsələlərin operativ şəkildə həll olunması, problemlərin dərindən araşdırılıb aidiyyəti üzrə istiqamətləndirilməsi də müsbət nəticələrini göstərir. Artıq rayonda əhaliyə fasiləsiz enerji verilməsi təmin edilmiş, əsas kəndarası yollar asfaltlaşdırılmışdır. Biz yerlərdə əhali ilə görüşərkən hamı abadlıq və inkişafa görə ölkə Prezidenti cənab İlham Əliyevə minnətdarlığını bildirir.

Astarada qarşıdakı dövrdə görüləsi işlər daha çoxdur. Bununla bağlı iclasda konkret tapşırıqlar verilmiş, uğurların daha da artırılması zərurəti önə çəkilmişdir.

Əli NƏCƏFXANLI

Xalq qəzeti.- 2013.- 1 may.- S. 8.