“Azərbaycanı dünyaya tanıdan Böyük İnsan”

Azərbaycan xalqının xilaskarı ulu öndərin respublika üçün gördüyü misilsiz işlər təkcə ölkəmizdə deyil, xaricdə yaşayan azərbaycanlıların da qəlbində əbədi yaşayır.

Qədirbilən xalqımız ümummilli liderin örnək həyat və fəaliyyətini tarixin yaddaşına köçürür: böyük rəhbərə sonsuz hörmət və məhəbbətlə məqalələr yazılır, kitablar nəşr olunur, filmlər çəkilir.

“Tərəqqi” medallı jurnalist Telman Əliyev mərkəzi mətbuatda çalışdığı 50 ildə saysız hadisələrin şahidi olub. Onun qəzetimizdə fəaliyyəti ulu öndərimiz Heydər Əliyevin Azərbaycana rəhbərliyi dövrünə düşdüyü üçün daha maraqlı və rəngarəng olmuşdur. Ümummilli liderlə dəfələrlə görüşmək səadətinə nəsib olan Telman Əliyev Heydər Əliyevin siyasi kursunu təbliğ edən yüzlərlə məqalə yazmışdır. Onun xalqımızın böyük oğlu Heydər Əliyevin anadan olmasının 90 illiyi münasibətilə hazırlayıb oxuculara təqdim etdiyi “Azərbaycanı dünyaya tanıdan Böyük İnsan” kitabı ulu öndərin çoxşaxəli fəaliyyətinin müxtəlif məqamlarını özündə əks etdirir. Kitabda toplanmış məqalələr ilk dəfə “Xalq qəzeti”ndə dərc olunmuşdur.

Azərbaycan Respublikasının əməkdar jurnalisti, “Xalq qəzeti”nin baş redaktoru Həsən Həsənovun elmi redaktorluğu ilə ərsəyə gələn “Azərbaycanı dünyaya tanıdan Böyük İnsan” kitabı müxtəlif nəsillərdən olan yazarların ulu öndərin başdan-başa xalqa xidmətdə keçən həyatının müxtəlif sahələrinə həsr olunmuş yubiley nəşrlərindən biridir. Burada toplanmış 25 məqalənin 4-ü ümummilli liderin hakimiyyətinin birinci, qalan hissəsi isə ikinci dövrünü əhatə edir. Bu kitabın əsas məziyyətini və digər nəşrlərdən fərqini isə ön sözün müəllifi Həsən Həsənov belə açıqlayır: “Qüdrətli ictimai-siyasi və dövlət xadimi Heydər Əliyevin fəaliyyətinin ilk 13 illik dövründə qəzetimizin Mil-Muğan zonasında xüsusi müxbir işləmiş Telman müəllim ulu öndərin bu bölgəyə səfər və görüşlərində onu müşayiət etmiş jurnalistlər qrupu arasında olmuş, bir sıra maraqlı, operativ hazırlanmış korrespondensiya, reportaj, hesabat və informasiyaların müəllifi kimi tanınmışdır. Bu yazılar qəzetimizin saralmış, tarixə çevrilmiş səhifələrində ümummilli liderin xalq arasında keçən unudulmaz günlərinin xronikası kimi qiymətini zaman keçdikcə artırır.

Təcrübəli jurnalist ümummilli lider Heydər Əliyevin Azərbaycan rəhbərliyinə xilaskar kimi qayıdışı, müstəqil dövlətin Prezidenti kimi fəaliyyəti dövründə də sevimli mövzusunu məqalə, şərh, xatirə, oçerk kimi təhlili və publisistik janrlarda davam etdirmiş, qəzetimizin oxucularına aktual səslənən bir sıra yazılar təqdim etmişdir. Müəllif bu materialları ulu öndərin ümumxalq bayramı kimi yaxınlaşan 90 illiyi münasibətilə ayrıca kitabda toplayıb nəşr etdirir. İnanırıq ki, yubiley nəşrləri arasında bu toplu fakt zənginliyi, sənədlilik dəyəri, istifadə gərəkliyi və təsir gücü ilə seçilən bir kitab kimi qəbul ediləcək".

Telman Əliyevin fakt və xatirələrə söykənərək hazırladığı bu kitab müstəqil Azərbaycanın memarı və qurucusu Heydər Əliyevin zəngin idarəetmə və rəhbərlik məharətini öyrənənlər üçün zəngin material verir.

Zərifə BƏŞİRQIZI

Xalq qəzeti.- 2013.- 3 may.- S. 5.