Nəsillərə örnək olan ömür yolu

 

Ulu öndər Heydər Əliyevin 90 illik yubleyi ilə əlaqədar Ağcabədi rayon Mədəniyyət evində elmi-praktik konfrans keçirilmişdir.

Ağcabədi Pedaqoji Kollecinin təşkil etdiyi tədbirin iştirakçıları və qonaqlar əvvəlcə Heydər Əliyevin rayon mərkəzində ucaldılmış əzəmətli heykəli önünə gül dəstələri qoymuş, ulu öndərin xatirəsinə dərin hörmət və ehtiramlarını bildirmişlər. Sonra tədbir rayon mədəniyyət evində davam etdirilmişdir.

Konfransı Ağcabədi Rayon İcra Hakimiyyətinin başçısı Şahin Məmmədov açmış, ümummilli lider Heydər Əliyevin hamıya örnək olan ömür yolundan, Azərbaycanın dövlət müstəqilliyinə hazırlanması və suverenliyin qorunmasındakı tarixi xidmətlərindən danışmışdır.

Azərbaycan Dövlət Pedaqoji Universitetinin türk və Şərqi Avropa xalqları tarixi kafedrasının professoru, tarix elmləri doktoru Mübariz Əmirov Heydər Əliyevin Azərbaycanın dövlətçilik tarixində rolu mövzusunda məruzə ilə çıxış etmişdir.

Azərbaycan Milli Elmlər Akademiyasının müxbir üzvləri, professorlar Vəli Əliyev və Vaqif Abbasov, Təhsil Problemləri İnstitutunun professoru, əməkdar müəllim Akif Abbasov, Azərbaycan məktəbi jurnalının şöbə müdiri, professor İsfəndiyar Novruzlu ulu öndərin ölməz ideya və əməllərindən, bu yolun ölkə Prezidenti İlham Əliyev tərəfindən uğurla davam etdirildiyindən danışmışlar.

Ağcabədi Pedaqoji Kollecinin direktoru, pedaqoji elmləri namizədi, dosent Vaqif Hüseynov elmi-praktik konfransda iştirak etdiklərinə görə görkəmli alimlərə və rayon rəhbərliyinə minnətdarlığını bildirmişdir.

Tələbələrin hazırladığı və ulu öndərə həsr olunmuş şeir kompozisiyası iştirakçılar tərəfindən maraqla qarşılanmışdır.

 

 

Ziyəddin SULTANOV

 

Xalq qəzeti.- 2013.- 3 may.- S. 8.