Xalqın qəlbində yaşayan lider

Səbail rayon rəhbərliyi və ictimaiyyəti nümayəndələrinin, Milli Məclis üzvlərinin, elm və mədəniyyət xadimlərinin, çoxsaylı qonaqların iştirakı ilə Beynəlxalq Muğam Mərkəzində keçirilən ümumrayon yubiley mərasimində ulu öndər Heydər Əliyevin Azərbaycan xalqı qarşısında tarixi xidmətlərindən geniş söhbət açıldı.

Səbail Rayon İcra Hakimiyyətinin başçısı Asif Əsgərov ümummilli lider Heydər Əliyevin həyat və fəaliyyəti, onun Azərbaycan tarixindəki rolu barədə məruzə etdi. Natiq qeyd etdi ki, Heydər Əliyev zəmanəmizin görkəmli siyasi və dövlət xadimi kimi bütün dünyada yaxşı tanınmış, sağlığında tarixə düşmüş nəhəng şəxsiyyətdir. Taleyin hökmü ilə iki dəfə xilaskarlıq missiyasını üzərinə götürərək hakimiyyətə gələn böyük lider Azərbaycanın müqəddəratının həll olunduğu təhlükəli və mürəkkəb məqamlarda xalqın köməyinə çatmış, ona dayaq olmuş, Vətənini zamanın ağır məngənəsindən xilas etmişdir.

Heydər Əliyev irsinin araşdırılması ilə məşğul olan bir çox müəlliflər ulu öndərin adını dünyanın siyasət nəhəngləri Mustafa Kamal Atatürk, Şarl De Qoll, Corc Vaşinqton, Uinston Çorçill, Konrad Adenauer ilə birlikdə çəkirlər. Heydər Əliyev isə həm keçmiş sovet, həm də müstəqillik dönəmində Azərbaycanın inkişafı, onun dünya dövlətləri cərgəsində layiqli yeri tutması üçün həyatını şam kimi əritmiş, adını əbədi olaraq tarixə yazmışdır.

Azərbaycan 1993-cü ildə vətəndaş müharibəsindən, parçalanmaqdan yalnız Heydər Əliyevin qətiyyəti hesabına xilas oldu. Dahi şəxsiyyət canından çox sevdiyi xalqına möhkəm dövlətçilik təsisatlarına malik, demokratik və bəşəri dəyərlərə sadiq, dünya birliyində nüfuzlu yer tutan müasir, müstəqil Azərbaycanı bəxş etdi. Ölkəmizin qazandığı bütün uğurlar, inkişaf və tərəqqi Heydər Əliyev dühasının bəhrəsidir. “Mən həmişə fəxr etmişəm, bu gün də fəxr edirəm ki, mən azərbaycanlıyam” — kəlamı da tarixin ən böyük azərbaycanlısı, ulu öndər Heydər Əliyevə məxsusdur.

Daha sonra bildirildi ki, ümummilli liderin xalqın birliyi və xoşbəxtliyi yolunda göstərdiyi titanik fəaliyyət hər bir soydaşımız üçün örnək olmalıdır. Biz Azərbaycanı sevməyi Heydər Əliyevdən öyrənməliyik. “Azərbaycan mənim ürəyimdir, nəfəsimdir” – deyən böyük öndərimiz millətimizin və dövlətimizin əbədiyaşarlığı üçün əvəzsiz bir siyasi xətt, ideoloji baza miras qoyub getdi. Heydər Əliyevin həyat və fəaliyyəti böyük bir məktəbdir və daim öyrənilməkdədir. Cəmiyyətə xidmət nümunəsi olan bu böyük şəxsiyyət həmişə xalqa arxalanır və deyirdi: “Xalq mənim dayağım, gücüm və inamımdır”. Ümummilli liderin ideyaları daim yaşayacaq. Azərbaycan xalqı, bütün türk dünyası onu heç vaxt unutmayacaq.

Prezident İlham Əliyevin apardığı daxili və xarici siyasət bir daha sübut edir ki, ulu öndərin qətiyyətli səyləri nəticəsində müstəqilliyi tam təmin olunan dövlətimiz durmadan inkişaf edir, çiçəklənir və qüdrətli dövlətə çevrilir. Dahi rəhbər vaxtilə demişdir: “Nə qədər ki, Azərbaycan var, mən də varam! Mən isə Azərbaycanda həmişə olacağam”. O, doğrudan da, həmişə bizimlə olacaq, çiçəklənən Vətənimizin hər güşəsində onun abidəsi ucalacaqdır. Onun ən böyük abidəsi isə xalqın qəlbindədir.

Mərasimdə xalq artisti Alim Qasımov və əməkdar artist Fərqanə Qasımova muğam dəstgahı səsləndirdilər. Müğənni Ramin Qasımov, əməkdar artist Fərid Əliyev,V.Mustafazadə adına “Sevil” ansamblı, C.Cahangirov adına xor kollektivi ulu öndərin ən çox sevdiyi mahnıları, xalq artistləri Mənsum İbrahimov və Nəzakət Teymurova “Leyli və Məcnun” operasından parçanı, xalq artisti Brilyant Dadaşova ulu öndərə həsr olunmuş mahnıları ifa etdilər.

R.TAHİR

Xalq qəzeti.- 2013.- 3 may.- S. 8.