Lənkəranda ümümmilli liderin yubileyinə həsr olunmuş tədbirlər davam edir

İqtisadi İnkişaf Nazirliyinin təşkilatçılığı ilə Lənkəranda “Heydər Əliyev və Azərbaycan regionlarının inkişafı” mövzusunda konfrans keçirilmişdir.

Heydər Əliyev Mərkəzində ümummilli liderin büstü ziyarət edildikdən sonra öz işinə başlayan konfransda müasir Azərbaycan dövlətçiliyinin memarı Heydər Əliyevin həyat və fəaliyyətinə həsr olunmuş film nümayiş etdirilmişdir.

Tədbiri açan Lənkəran Şəhər İcra Hakimiyyətinin başçısı Taleh Qaraşov bu gün ölkəmizin qazandığı hər bir uğurun təməlində ulu öndər Heydər Əliyevin müəllifi olduğu inkişaf strategiyasının dayandığını vurğulamışdır. Qeyd edilmişdir ki, ulu öndərin siyasi təcrübəsi, biliyi, cəsarəti və müdrikliyi nəticəsində qısa müddətdə ölkəmiz çətin sınaqlardan keçərək dinamik inkişaf yoluna qədəm qoymuşdur. İcra başçısı qeyd etmişdir ki, 1969-1982-ci illər Lənkəranın qızıl dövrü adlandırılır. Həmin dövrdə Lənkərandan keçmiş İttifaqın mindən çox şəhərinə sənaye və kənd təsərrüfatı məhsulları göndərilirdi. Ulu öndər Lənkərana 6 dəfə səfər etmişdir. Bu səfərlərin hər biri yeni mühüm obyektlərin açılışları ilə yadda qalmışdır. Həmin dövrdə Lənkəranda sənaye, mədəniyyət, məişət müəssisələri, mikrorayon, hava limanı, Xanbulançay dəryaçası... tikilib istifadəyə verilmişdir. Ümummilli liderin ideyaları, siyasi kursu bu gün də uğurla davam etdirilir. Möhtərəm Prezidentimiz İlham Əliyevin rəhbərliyi altında Azərbaycan günbəgün inkişaf edir, regionlar sosial-iqtisadi cəhətdən çiçəklənir, böyüyür, yenilənir. T.Qaraşov həmçinin cənab Prezidentin keçən il Lənkəranın sosial-iqtisadi inkişafı ilə əlaqədar imzaladığı 4 sərəncam sayəsində şəhərdə, rayonun qəsəbə və kəndlərində aparılan genişmiqyaslı quruculuq və abadlıq işlərindən danışdı.

İqtisadi inkişaf nazirinin müavini Niyazi Səfərov ümummilli liderin dövlətçiliyimizin möhkəmləndirilməsi, iqtisadiyyatımızın inkişafı istiqamətində gördüyü işlər barədə geniş məlumat vermişdir. O vurğulamışdır ki, nailiyyətlər sonrakı illərdə də ölkə iqtisadiyyatının dayanıqlı inkişafı üçün möhkəm zəmin yaratmışdır. Bu gün Heydər Əliyev siyasi xəttinin möhtərəm Prezidentimiz cənab İlham Əliyevin rəhbərliyi ilə ölkəmizin iqtisadi inkişafı davamlı xarakter almışdır.

Tədbirdə nazirliyin məsul əməkdaşları Fərrux Dadaşov və Zaur Qasımov, Bakı Biznes Tədris Mərkəzinin direktoru Akif Fərruxov, İqtisadi İslahatlar Elmi-Tədqiqat İnstitutunun direktor müavini Rofət Hüseynəliyev və Masallı rayonundan tanınmış sahibkar Fəxrəddin Baxışov çıxış etmişlər. Natiqlər ulu öndərin yorulmaz fəaliyyəti nəticəsində Azərbaycanda milli iqtisadiyyatın və sahibkarlığın inkişafı barədə geniş məlumat vermişlər.

Sonda sahibkarları maraqlandıran suallar cavablandırılmışdır.

***

Bir gün sonra isə Lənkəran Şəhər İcra Hakimiyyəti YAP şəhər təşkilatı ilə birlikdə “Azərbaycanın tərəqqi yoluna nur saçan günəş - ümummilli lider Heydər Əliyev” adlı konfrans keçirmişdir.

T.Qaraşov Prezident sərəncamına əsasən respublikamızın hər yerində olduğu kimi, Lənkəranda da ulu öndərin 90 illik yubileyi münasibətilə silsilə tədbirlərin keçirildiyini söyləmişdir. Qeyd etmişdir ki, ötən yüzillikdə xalqa rəhbərlik kimi böyük tarixi missiyanı yerinə yetirən şəxsiyyətlər arasında dünya şöhrətli siyasətçi, görkəmli dövlət xadimi, xalqımızın ümummilli lideri Heydər Əliyev müstəsna yer tutur. Əsrin üçdə biri ərzində Azərbaycanın rəhbəri olmuş ulu öndər yalnız Vətənə sədaqətlə xidmət etməyi düşünərək bütöv bir xalqın taleyini yaşamışdır. Heydər Əliyevin böyük zəhmət, yorulmaz fəaliyyət hesabına qurub-yaratdıqları xalqımızın misilsiz sərvətinə çevrilmişdir.

İcra başçısı qeyd etmişdir ki, 1993-cü ildə məhz Heydər Əliyev zəkası, qətiyyəti və zəngin dövlətçilik təcrübəsi Azərbaycanı vətəndaş müharibəsindən, parçalanmadan, dünya xəritəsindən silinmək təhlükəsindən xilas etdi və tədricən uğur yoluna çıxardı. Buna görə də nə qədər ki, Azərbaycan var, ulu öndər Heydər Əliyev də əbədi yaşayacaqdır.

Sonra Lənkəran ŞİH başçısının birinci müavini, YAP şəhər təşkilatının sədri İlqar Dadaşovun məruzəsi dinlənilmişdir. Müzakirələrdə rayon ağsaqqalı Sərhəd Məmmədov, xalq artisti Qabil Quliyev, təhsil şöbəsi müdirinin müavini Güloğlan Bağırov və başqaları iştirak etmişlər.

Sonda YAP sıralarına yeni qəbul olunmuş bir qrup gəncə partiyanın üzvlük vəsiqələri təqdim edilmişdir.

***

Ulu öndərin şanlı yubileyi ilə bağlı Lənkəranın mədəniyyət müəssisələrində də silsilə tədbirlər olmuşdur. C.Cabbarlı və H. Rzayeva adına uşaq musiqi məktəblərində maraqlı konsert proqramları təqdim edilmişdir. Şagirdlər ümummilli liderə həsr olunmuş mahnı və şeirlər oxumuşlar.

Əli NƏCƏFXANLI

Xalq qəzeti.- 2013.- 4 may.- S. 8.