Böyük xanəndənin virtual muzeyi yaradıldı

 

Aprelin 29-da Beynəlxalq Muğam Mərəkəzində görkəmli muğam ifaçısı, xalq artisti Xan Şuşinskinin üç dilə tərcümə olunmuş virtual muzeyinin memorial saytının təqdimat mərasimi keçirilmişdir. Tədbirdə respublikanın tanınmış elm, sənət adamları, Milli Məclisin deputatları, görkəmli ifaçının sənət dostları, eləcə də ailə üzvləri iştirak etdilər.

Tədbiri giriş sözüylə açan sənətşünaslıq üzrə fəlsəfə doktoru, musiqişünas Səadət Təhmirazqızı sənətkarın keçdiyi zəngin və çoxşaxəli yaradıcılıq yolundan danışdı. Daha sonra çıxış üçün söz alan Musiqi dünyası jurnalının baş redaktoru, professor Tariyel Məmmədov, Milli Konservatoriyanın rektoru, xalq artisti, professor Siyavuş Kərimi, rabitə və informasiya texnologiyaları nazirinin müavini Elmir Vəlizadə və başqaları sevimli xanəndənin bənzərsiz ifaçılıq məharətindən, Azərbaycan incəsənətinə bəxş etdiyi töhfələrdən söz açmaqla bərabər virtual muzeyin yaranmasını müsbət hal kimi dəyərləndirdilər. Rabitə və İnformasiya Texnologiyaları Nazirliyinin maliyyə dəstəyi Mədəniyyət və Turizm Nazirliyi, Xan Şusinski Fondu və Musiqi dünyası jurnalının təşkilati dəstəyi ilə yaradılan virtual muzey on bölmədən ibarətdir. Saytda korifey sənətkarın həyat və yaradıcılığı haqqında materiallar, çoxsaylı foto və lent yazıları, haqqında yazılan məqalələr, keçirdiyi görüşlər, müasirlərinin, sənət dostlarının Xan Şuşinski haqqında fikirləri, şəxsi əşyaları, məktub, orden və medalları yer almışdır.

Muzeyin yaradılmasında əsas məqsəd Qarabağ xanlığının əsasını qoymuş Cavanşirlər nəslindən olan böyük ustadın irsini gələcək nəsillərə tanıtmaqdır. Diqqətə çatdırmışdır ki, bu sayt vasitəsilə dünyanın istənilən yerində yaşayan muğamsevərlər görkəmli sənətkar haqqında tam doğru məlumat əldə edə biləcək, eyni zamanda onun sənət yolunu araşdırmaq istəyən gənc tədqiqatçılar üçün əsl baza rolunu oynayacaqdır.

Tədbirin sonunda ustad sənətkarın oğlu Aslan Cavanşirov ailəsi adından tədbirin təşkilatçılarına, qonaqlara təşəkkürünü bildirdi. Üç saatadək davam edən gecə gənc ifaçıların Xan Şuşinski repertuarından olan ifaları ilə sona yetdi.

 

 

Rafiq SALMANOV

 

Xalq qəzeti.- 2013.- 4 may.- S. 14.