Qəbələdə “e-Hökumət: Gömrük sahəsində innovasiyalar” mövzusunda beynəlxalq elmi-praktik konfrans işə başlamışdır

Mayın 6-da Qəbələ şəhərindəki “Qafqaz Resort” mehmanxanasında xalqımızın ümummilli lideri Heydər Əliyevin 90 illik yubileyi ərəfəsində Azərbaycan Respublikası Dövlət Gömrük Komitəsinin (DGK) təşkilatçılığı ilə gömrük işində informasiya-kommunikasiya texnologiyalarının (İKT) tətbiqi ilə bağlı “e-Hökumət: Gömrük sahəsində innovasiyalar” mövzusunda beşinci yubiley beynəlxalq elmi-praktik konfrans işə başlamışdır.

AzərTAc xəbər verir ki, iki gün davam edəcək konfransda məqsəd e-Hökumət quruculuğu və onun tətbiqi ilə bağlı dünya təcrübəsi, elektron idarəçilik sahəsində dövlət qurumları arasında əməkdaşlığın müasir formalarının müzakirəsi, gömrük işində və iqtisadiyyatın digər sahələrində İKT-nin tətbiqi və innovativ idarəetmə metodları ilə bağlı mövcud vəziyyətin öyrənilməsi və təcrübə mübadiləsinin aparılmasıdır.

Dünyanın 55 ölkəsindən, 5 beynəlxalq təşkilatdan 102 nümayəndənin qatıldığı konfrans iştirakçıları əvvəlcə ümummilli lider Heydər Əliyevin Qəbələ şəhərinin mərkəzində ucaldılmış abidəsini ziyarət etmiş, önünə əklil qoymuşlar.

Daha sonra konfrans öz işinə başlamışdır.

Açılışda Dövlət Gömrük Komitəsinin (DGK) sədri, gömrük xidməti general-leytenantı Aydın Əliyev çıxış edərək Azərbaycanda informasiya-kommunikasiya texnologiyalarının (İKT) tətbiqinə xüsusi diqqət yetirildiyini, gömrük sahəsinin inkişafında İKT-nin mühüm rolu olduğunu demişdir.

A.Əliyev 2013-cü ilin İKT ili elan olunması və yeniləşən texnologiyalara artan tələbatın hər gün yüksəlməsini xatırladaraq, gömrük sahəsində bu istiqamətdə atılan addımların əhəmiyyətini qeyd etmişdir.

Komitə sədri çıxışında gömrük sahəsinin inkişafında ulu öndər Heydər Əliyevin əvəzsiz xidmətlərindən söhbət açmışdır.

Rabitə və informasiya texnologiyaları nazirinin müavini Elmir Vəlizadə bildirmişdir ki, ölkəmizdə İKT sektoru inkişaf edir. Prezident İlham Əliyev bu sahənin tərəqqisinə xüsusi diqqət yetirir. Qeyri-neft sektorunda bu sahə ən prioritet istiqamət hesab olunur və “Azərbaycan 2020: Gələcəyə Baxış” İnkişaf Konsepsiyasında İKT-nın inkişafı mühüm vəzifə kimi qarşıya qoyulmuşdur.

E.Vəlizadə vurğulamışdır ki, İKT potensialını gücləndirmək üçün Azərbaycanda İnformasiya Texnologiyaları fondu yaradılmışdır. Bu Fondun təyinatı ölkəmizin şirkətlərinə qrant və kredit yolu ilə dəstək, eyni zamanda, Azərbaycanda fəaliyyət göstərən xarici şirkətlərə də layihələrdə birgə iştirak şəraitinin yaradılmasından ibarətdir. Həmçinin Azərbaycanda xüsusi yüksək texnologiyalar parkının yaradılması planlaşdırılmışdır. Təqribən 30 hektar ərazini əhatə edəcək bir məkanda ən qabaqcıl texnologiyaların yaradılması, elmi tədqiqatların aparılması və s. nəzərdə tutulur.

Nazir müavini demişdir ki, İKT sahəsində kadr potensialını təmin etmək üçün beynəlxalq səviyyəli İnformasiya Texnologiyaları Universitetinin yaradılması barədə sərəncam qəbul edilmişdir. Bu ildən həmin universitetə ilkin tələbə qəbulu həyata keçiriləcəkdir.

Bildirilmişdir ki, Azərbaycanda Elektron Hökumətin inkişaf etdirilməsi və elektron xidmətlərin göstərilməsinə bütün mərkəzi icra hakimiyyəti orqanları qoşulmuş və 417 dövlət xidmətinin təqribən 205-i artıq Elektron Hökumət portalında yerləşdirilmişdir.

Bu portal vasitəsilə mərkəzləşmiş fəaliyyətin həyata keçirilməsi imkan yaradır ki, bütün dövlət orqanlarında mövcud müxtəlif informasiya-məlumat bazaları bir yerdə birləşdirilərək vətəndaşların istifadəsinə verilsin.

E.Vəlizadə demişdir: “Artıq bu xidmətlərin yerli icra hakimiyyətləri səviyyələrində də həyata keçirilməsi təmin ediləcəkdir. Növbəti mərhələdə isə elektron xidmətlərin göstərilməsi bələdiyyələri də əhatə etməlidir”.

Nazir müavini diqqətə çatdırmışdır ki, Azərbaycan gömrüyündə Elektron Hökumət layihəsi ilə bağlı işlər uğurla davam etdirilir.

“Azərbaycan BMT ilə uzunmüddətli əlaqələrə malikdir” deyən BMT-nin respublikamızdakı rezident əlaqələndiricisi Antonius Broek BMT İnkişaf Proqramı ilə DGK-nın tərəfdaşlığından, həyata keçirilən birgə layihələrdən, əldə olunan müsbət nəticələrdən danışmışdır.

A.Broek bildirmişdir ki, gömrük inzibatçılığının bütün istiqamətləri baxımından DGK böyük işlər görmüşdür. Həmçinin gömrük strukturlarının səmərəli fəaliyyət göstərməsi malların və xidmətlərin daha asanlaşdırılmış qaydada axınına şərait yaratmışdır. Bu da öz növbəsində qlobal ticarət sisteminə çox böyük töhfə vermiş və Dünya Gömrük Təşkilatının ümidlərini doğrultmuşdur. Azərbaycan son 14 il ərzində ən böyük elektron idarəçilik proqramını yaratmışdır. Bu işlərə BMT İnkişaf Proqramı da müvafiq töhfələrini vermişdir.

Dünya Gömrük Təşkilatının potensialın gücləndirilməsi üzrə Avropa regional ofisinin rəhbəri Vitali Mikeladze bildirmişdir ki, innovasiyalar davamlı gömrük islahatları və gömrük xidmətinin müasirləşdirilməsinin əsas təkanverici qüvvəsidir. Yəni, gömrük qarşısında olan çağırışların öhdəsindən gəlmək, bu əsrdə yaranmış ticarət mühiti və digər məsələlərdən irəli gələn müvafiq imkanlardan yararlanmaq şəraitində inkişafdan söhbət gedir.

V.Mikeladze demişdir ki, əsas məsələ gömrük inzibatçılığının dünya miqyasında səmərəliliyini artırmaqdır. Azərbaycan gömrük sahəsində çox uğurlu nailiyyətlər əldə etmişdir və bu sahənin inkişafı məmnunluq doğurur.

Vurğulanmışdır ki, “Elektron Hökumət” konsepsiyası dünya ölkələrinin əksəriyyəti tərəfindən qəbul edilmiş və tətbiq olunmaq üzrədir. Regional ofisin məhz Azərbaycanda açılması ölkənin gömrük xidmətinin əldə etdiyi nəticələrlə bağlıdır.

Sessiyalarla davam edən konfransda “İctimai diplomatiya və e-Hökumət”, “Tranzit yüklərə kompleks nəzarət sistemi”, “e-Dövlət mühitində informasiya təhlükəsizliyinin idarə olunması problemləri” və digər mövzularda məruzələr dinlənilmiş, müzakirələr aparılmışdır.

Konfrans iştirakçıları “ASAN xidmət”-in xüsusi avadanlıqla təchiz edilmiş səyyar avtobusu ilə də tanış olmuşlar.

Xalq qəzeti.- 2013.- 7 may.- S. 12.