Ümummilli lider Heydər Əliyevin 90 illiyinə həsr olunmuş voleybol üzrə iki turnirə yekun vurulmuşdur

Mayın 6-da Azərbaycan Voleybol Mərkəzində ümummilli lider Heydər Əliyevin 90 illiyinə həsr olunmuş iki turnirə yekun vurulmuşdur.

AzərTAc xəbər verir ki, turnirləri “Yeni Azərbaycan”, “Səs”, “İki sahil” qəzetləri və Azərbaycan Voleybol Federasiyası birgə təşkil etmişlər.

Əvvəlcə qadın voleybol komandaları arasında təşkil olunmuş turnirin final qarşılaşması keçirilmişdir. Həlledici qarşılaşmada “Azəryol” və “İqtisadçı” komandaları qarşılaşmışlar. Rəqibini 3:0 hesabı ilə məğlub edən “Azəryol” komandası yarışın qalibi adını qazanmışdır. “Nəqliyyatçı” kollektivi isə yarışı üçüncü pillədə başa vurmuşdur.

Daha sonra media nümayəndələri və Yeni Azərbaycan Partiyasının Bakı şəhəri üzrə rayon təşkilatlarının komandaları arasında final oyunu keçirilmişdir. Rəqiblərinə qalib gəlmiş YAP Yasamal və YAP Nərimanov rayon təşkilatlarının komandaları həlledici mərhələdə üz-üzə gəlmişlər. Görüş YAP Yasamal rayon təşkilatı komandasının 3:0 hesablı qələbəsi ilə yekunlaşmışdır. YAP Nizami rayon təşkilatının kollektivi isə bürünc medala sahib olmuşdur.

Sonra mükafatlandırma mərasimi keçirilmişdir. Çıxış edən Yeni Azərbaycan Partiyası sədrinin müavini-icra katibi Əli Əhmədov və Azərbaycan Voleybol Federasiyasının vitse-prezidenti, əməkdar bədən tərbiyəsi və idman xadimi Vaqif Əliyev dinamik inkişaf edən Azərbaycanın qazandığı nailiyyətlərdən bəhs etmiş, ölkəmizdə idmana göstərilən dövlət qayğısından danışmış və idmançılarımızın qazandığı nailiyyətləri yüksək qiymətləndirmişlər.

Qalib komandalara kubok, mükafatçılara isə medallar və diplomlar təqdim olunmuşdur.

Xalq qəzeti.- 2013.- 7 may.- S. 12.