Sabirabadlılar Heydər Əliyevin 90 illik yubileyini ruh yüksəkliyi ilə qeyd etdilər

Sabirabad rayonunda ulu öndər Heydər Əliyevin anadan olmasının 90 illik yubileyinə həsr olunmuş təntənəli mərasim keçirildi.

Dahi şəxsiyyətin xatirəsini həmişə əziz tutan sabirabadlılar onun abidəsini ziyarət etdilər və çiçəklər düzdülər. Məhz Heydər Əliyevin təşəbbüsü və güclü dəstəyi ilə ötən əsrin 70-ci illərində tikilmiş rayon mədəniyyət sarayında ümummilli liderin şərəfli həyat yolu və titanik fəaliyyətinə bir daha nəzər salındı. Sabirabad Rayon İcra Hakimiyyətinin başçısı Nazim İsmayılov 1923-cü ilin 10 mayında Azərbaycanın ən qədim guşələrindən birində — Naxçıvanda başlayıb 2003-cü ilin 12 dekabrında cismən başa çatan 80 illik ömür yolundan ətraflı bəhs etdi. Bildirdi ki, aradan keçən 10 il bu məlum həqiqəti bir daha təsdiqə yetirdi ki, dahi şəxsiyyətlərin yoxluğu yalnız fiziki yoxluqdur, əslində isə onlar öz əməlləri, bəşəriyyətə verdikləri töhfələrlə həmişə yaşayırlar. Sovet Azərbaycanına rəhbərlik etdiyi illər ərzində 14 dəfə Sabirabadda olan ulu öndər ölkəyə rəhbərliyinin ikinci dövründə də 2 dəfə Kürlə Arazın qovuşduğu məkana səfər etmişdi. Şübhəsiz ki, dahi şəxsiyyətlə görüşlər sabirabadlıların qəlbində dərin iz salmış və on illər boyu hafizələrdən silinməyən xoş təəssüratlar yaratmışdır.

Ötən əsrin 70-80-ci illərində Sabirabadın qazandığı uğurlar, birmənalı olaraq ulu öndərin adı ilə bağlıdır. Həmin dövrdə burada onlarla respublika əhəmiyyətli sənaye və kənd təsərrüfatı müəssisəsi yaradılmış, rayon iqtisadiyyatı hədsiz dərəcədə güclənmişdir. Vurğulandı ki, Heydər Əliyev şəxsiyyətinə həmişə ehtiram bəsləyən sabirabadlılar onun ideyalarının ləyaqətli davamçısı və reallaşdırıcısı Prezident İlham Əliyevə də sadiqdirlər.

Sonra rayonun gənc heydərçiləri maraqlı kompozisiya ilə çıxış etdilər, balaca rəqqasların və bədii özfəaliyyət kollektivlərinin çıxışları da rəğbətlə qarşılandı.

Respublikanın tanınmış incəsənət xadimlərinin proqramlarını da böyük maraqla izləyən sabirabadlılar ulu öndərin 90 illiyini təntənəli şəkildə qeyd etməyin sevincini yaşayırdılar.

Səməd HÜSEYNOĞLU

Xalq qəzeti.- 2013.- 7 may.- S. 14.