“Avropa Qonşuluğu Barometri” çərçivəsində keçirilən sorğu ölkəmiz haqqında həqiqətləri açıqladı

Biz bəzən hansısa beynəlxalq təşkilatın hesabatında və ya yekun sənədində ölkəmiz haqqında yazılan qərəzli məlumatları görəndə ya qəzəblənir, ya da onları ikili standartlarda ittiham edirik. Bu təbiidir. Çünki hər bir fərd kimi hər bir xalq və dövlət də öz hüquqlarının qorunmasına çalışmalıdır.

Elə Avropa miqyaslı qurumların təməl prinsiplərində də bu məsələlərə böyük önəm verilir. Doğrudur, həmin prinsipləri ayaq altına ataraq Azərbaycanın işğal altında olan torpaqlarına - işğalçı və başkəsən adamların görüşünə gedən avropalılar da az deyil. Buna baxmayaraq təmsil etdiyi qurumun məram və məqsədlərinə hörmətlə yanaşan, onların qorunmasına çalışan avropalılar da çoxdur. Yəni şükürlər olsun ki, bütün beynəlxalq təşkilatlar qərəzli, məkrli və ikiüzlü deyil. Elə “Avropa Qonşuluğu Barometri” çərçivəsində Avropa İttifaqının maliyyələşdirdiyi Avropa Qonşuluğu ölkələrində ictimai rəyin öyrənilməsi ilə bağlı keçirilən media monitorinqinin nəticələrini elan edən siyasətçi və ekspertlər də təmiz məramlı insanlar olduqlarını sübut ediblər. Hətta bir çox avropalılar açıq şəkildə etiraf edirlər ki, bu monitorinqi son illərdə Azərbaycanda keçirilən ən obyektiv, tərəfsiz bir sorğu kimi qiymətləndirmək olar.

Ekspertlər istənilən sorğu və ya reytinq öyrənilməsində olduğu kimi bu monitorinqdə də cəmiyyət həyatının müxtəlif sahələrini əhatə edən mövzular barədə suallara cavab tapmaq istəmiş və tapmışlar. Ölkəmizin siyasi, iqtisadi inkişafı ilə bağlı, ölkədə siyasi güc mərkəzlərinin balansı və eyni zamanda, sosial vəziyyətin öyrənilməsi məsələləri daha çox diqqət mərkəzində olsa da, təşkilatçılar sosial-psixoloji əhval-ruhiyyənin səviyyəsinin, Avropa ölkələrinə münasibətin göstəricisinin müəyyənləşdirilməsi kimi prioritet istiqamətləri də yaddan çıxarmamışdılar.

Avropalı ekspertlər öyrəndilər və bütün dünyaya bildirdilər ki, Azərbaycan vətəndaşlarının 92 faizi öz hökumətinə inanır. Bu isə o deməkdir ki, artıq uzun illər boyu Azərbaycanda həyata keçirilən daxili siyasət cəmiyyətdən adekvat münasibət görür. Bu məqamda bir faktı xatırlatmaq yerinə düşür. Azərbaycan Respublikasının Prezidenti dəfələrlə bəyan edib ki, ölkəmizdə həyata keçirilən dövlət siyasətinin təməlində vətəndaş amili, insanların rifahı dayanır. Sivil və demokratik dövlət kimi Azərbaycan Respublikası ötən illər ərzində sözün həqiqi mənasında məhz bu prinsiplərə sədaqətini ifadə edərək vətəndaş-dövlət münasibətlərinin formalaşdırlmasını, bu münasibətlərin elmi şəkildə tənzimlənməsini təmin edə bilib. Avropalılar bunu ölkənin ümumi iqtisadi inkişafını ifadə edən, sosial vəziyyətin yaxşılaşdırılması tendensiyasını göstərən, bank-maliyyə sektorunun fəaliyyətini əks etdirən rəqəmlərdə əyani şəkildə görə bilir və qiymətləndirirlər.

Gənc müstəqil Azərbaycan dövlətinin həm ölkə daxilində, həm də beynəlxalq aləmdə razılıqla qarşılanan uğurları nədən ibarətdir? Avropa qurumlarının hamısında yaxşı bilirlər ki, 2003-cü ilin payızından sonra ölkəmizdə yoxsulluğun səviyyəsi 50 faizdən 6 faizə endirilib. Prezident İlham Əliyevin ölkəmizdə işsizliyin aradan qaldırılmasına dair elə həmin il elan etdiyi prinsiplər bu gün Azərbaycanda tam şəkildə həyata keçirilib və günün reallığına çevrilib. Geridə qalan illərdə ölkəmizdə aparılan məqsədyönlü siyasət nəticəsində bu gün Azərbaycanda işsizliyin səviyyəsi 5,2 faiz təşkil edir. Bu isə bir sıra Avropa ölkələri ilə müqayisədə kifayət qədər uğurlu göstəricidir. Bir məqamı da xatırladaq ki, 2008-ci ildən etibarən Avropa ölkələrində tüğyan edən iqtisadi böhran qitənin bir çox ölkələrində işsizliyin sürətlə artmasına səbəb olub. Azərbaycanda isə əhalinin rifah halının yaxşılaşdırılması, işsizliyin aradan qaldırılması istiqamətində həyata keçirilən siyasətin nəticələri beynəlxalq aləmdə hamının gözü qabağındadır. Avropalılar onu da görürlər ki, Azərbaycan bu gün dünyanın ən dinamik inkişaf edən ölkələrindən biridir. Ona görə də ölkə əhalisinin 92 faizinin öz hökumətinə inanmasını göstərən nəticələr müasir Azərbaycan həqiqətlərinin dünya ictimaiyyətinə növbəti dəfə çatdırılması baxımından xüsusi əhəmiyyət kəsb edir.

Bəzi mətbuat vasitələrindəki həmkarlarımız yazırlar ki, “Avropa Qonşuluğu Barometri” çərçivəsində həyata keçirilən və yekun qiymətləndirmələri Brüsseldə elan edilən bu sorğunun nəticələrini ölkə daxilində elə şəkildə təbliğ etməliyik ki, bəzi xarici qüvvələrin əlində oyuncağa çevrilmiş müxalifət təmsilçiləri də həqiqətin harada, hayanda olduğunu bilsinlər. Biz həmin çağırışla razı deyilik. Çünki Azərbaycan həqiqətlərini öyrənən bu media monitorinqi Avropanın hansısa ölkəsində deyil, bilavasitə Azərbaycanda keçirilib. Yəni ölkədə yaşayan hər kəsin bu həqiqətlərdən kifayət qədər xəbəri vardır. Adını müxalifət qoymuş bir qrup adam isə sadəcə əvvəllər aldanıb pul aldıqları xarici bosslarının tilovundan çıxa bilmirlər. Həmin tilovdan çıxa bilsələr Azərbaycan həqiqətlərinin nədən ibarət olduğunu etiraf edəcəklər. Bunun üçün isə vaxt lazımdır.

Yeri gəlmişkən, monitorinqin nəticələrində göstərilir ki, Azərbaycan vətəndaşlarının 65 faizi öz həyatlarından razıdır. Bu kiçik göstərici deyil. Çünki Ermənistan əhalisinin böyük əksəriyyəti nəinki öz həyatından narazıdır, hətta gündən-günə cəhənnəmə çevrilən bu ölkədə doğulduğuna peşmandır. Azərbaycanda isə 65 faiz gənc öz dövlətinə, hökumətinə etimad göstərir və ölkənin bütün problemlərini hazırkı hökumətin həll edəcəyinə inanır. Prezident seçkiləri ili olan 2013-cü ildə bu göstəricinin məhz Avropa miqyaslı qurum tərəfindən elan edilməsi seçkinin nəticələri barədə nikbin proqnozlar səsləndirilməsinə əsas verir.

Monitorinqin nəticələrindəki digər göstəricilər də təkcə seçkilərlə deyil, ümumilikdə Azərbaycanın sabahı ilə bağlı yüksək səviyyədə nikbinlik hissləri yaradır. Məsələn, əhalinin 48 faizi ölkədə həyata keçirilən iqtisadi siyasətin doğru istiqamətdə qurulduğunu qeyd edir. Yaxud, rəyi soruşulanların 69 faizi hesab edir ki, Azərbaycanda iqtisadi vəziyyət yaxşıdır. Başqa fakt. Əhalinin 60 faizi ölkədəki demokratik proseslərdən razı olduğunu bildirib. Bütün bunlar isə bir daha sübut edir ki, Avropanın və Qərbin bəzi qeyri-hökumət təşkilatları, ayrı-ayrı fondlar, demokratiya ilə bağlı mövcud olan institutlar, “Human Rights Watch”, “Amnesty International”, “Freedom House” və başqa bu kimi təşkilatların vaxtaşırı Azərbaycanla bağlı səsləndirdiyi tənqidi fikirlər tamamilə qərəzli və əsassızdır. Bugünkü qüdrətli Azərbaycan dövləti iti sürətlə inkişaf edir və mütərəqqi beynəlxalq təşkilatların ekspertləri və onların keçirdiyi rəy sorğularının nəticələri də bu inkişafı səxavətlə, ürək açıqlığı ilə etiraf edirlər. Bütün bu tərəqqi, inkişaf və nailiyyətlərin təməlində isə ulu öndər Heydər Əliyevin işləyib hazırladığı möhtəşəm siyasi kurs dayanır.

İttifaq MİRZƏBƏYLİ

Xalq qəzeti.- 2013.- 5 may.- S. 7.