Lerikdə yubiley tədbirləri

Azərbaycan xalqının ümummilli lideri Heydər Əliyevin 90 illik yubileyi münasibətilə Lerik rayonunda fəaliyyət göstərən bütün idarə, təşkilat və müəssisələrdə, ərazi icra nümayəndəliklərində maraqlı tədbirlər təşkil olunur. Ümumtəhsil məktəblərində müxtəlif müsabiqələr, idman yarışları, dahi rəhbərin həyat və fəaliyyətinə həsr edilmiş xüsusi dərslər keçirilir.

Şanlı yubileylə əlaqədar elmi-praktik konfrans daha geniş əhatəli olmuşdur. Əvvəlcə Heydər Əliyev meydanında rayon ictimaiyyətinin nümayəndələri ulu öndərin abidəsini ziyarət etmiş, önünə gül dəstələri qoymuşlar. Sonra iştirakçılar rayon mədəniyyət evində unudulmaz böyük şəxsiyyətə həsr olunmuş kitablardan ibarət sərgiyə baxmışlar.

Azərbaycan Respublikasının Dövlət himni səsləndirilmişdir.

Lerik Rayon İcra Hakimiyyətinin başçısı Rövşən Bağırov “Heydər Əliyev və müasir Azərbaycan dövlətçiliyi” mövzusunda geniş məruzə etmişdir. O bildirmişdir ki, Heydər Əliyev elə nadir tarixi şəxsiyyətlərdəndir ki, onun zəngin irsi hələ uzun müddət tədqiqatçıların diqqət mərkəzində olacaq. Ulu öndər Azərbaycan xalqının müstəqillik mübarizəsindəki misilsiz xidmətləri ilə hələ sağlığında ikən canlı əfsanəyə çevrilmiş, bütün dünya azərbaycanlılarının sonsuz sevgisini qazanmışdı.

Ötən əsrin 60-cı illərinin sonlarında çətin iqtisadi durumda olan Azərbaycana rəhbərlik məhz Heydər Əliyevə etibar edildi. Doğma xalqının böyük təəssübkeşi totalitar rejim şəraitində Azərbaycanı Sovet İttifaqının ən qabaqcıl respublikalarından birinə çevirməyə nail oldu. Xalqın tarixində Heydər Əliyev dövrü başlandı. Bu, hərtərəfli, köklü yeniləşmə dövrü, dinamiklik, işgüzarlıq dövrü idi. Heydər Əliyevin Azərbaycana birinci rəhbərliyi dövründə həyata keçirdiyi əzəmətli quruculuq işlərinin çox böyük tarixi əhəmiyyəti ondan ibarət idi ki, xalqımızda milli qürur, milli mənlik şüuru oyandı. Dahi rəhbərimiz 1982-1987-ci illərdə nəhəng Sovet İttifaqının məsul rəhbərlərindən oldu. İstefa verdikdən sonra siyasi təzyiqlərlə üzləşdi. Həyatının təhlükə qarşısında olmasına baxmayaraq, 1990-cı ilin yanvarında sovet qoşunlarının Bakıda törətdiyi qanlı faciə ilə əlaqədar Azərbaycanın Moskvadakı nümayəndəliyində bəyanatla çıxış edərək xalqına qarşı törədilmiş cinayətin təşkilatçıları və icraçılarının cəzalandırılmasını tələb etdi, bu ağır günlərdə xalqının yanında olduğunu bildirdi.

Azərbaycan dövlət müstəqilliyi qazandıqdan sonra ölkədə çox çətin ictimai-siyasi vəziyyət yarananda, hərbi böhran, anarxiya baş alıb gedəndə xalq çıxış yolunu böyük təcrübəyə malik görkəmli dövlət xadimi Heydər Əliyevin şəxsində gördü və qətiyyətlə onun siyasi hakimiyyətə qayıtmasını tələb etdi. Heydər Əliyevin 1993-cü ildə Azərbaycan rəhbərliyinə qayıdışı ilə vətəndaş müharibəsinin qarşısı alındı, torpaqların işğalı dayandırıldı, respublikanın parçalanması təhlükəsi aradan qalxdı, ölkə həyatında dönüş yarandı. Tədricən ictimai-siyasi sabitlik təmin olundu, ölkə inkişaf relslərinə çıxarıldı. 1994-cü il sentyabrın 20-də “Əsrin müqaviləsi”nin imzalanması və onun gerçəkləşdirilməsi Azərbaycan üçün həyati əhəmiyyəti kəcb edərək müstəqilliyimizin dönməzliyinə möhkəm təminat oldu. Bu gün Heydər Əliyevin fəaliyyəti də, şəxsiyyəti də Azərbaycan xalqının tarixində dərin iz buraxaraq, əsl dövlət idarəçiliyi məktəbinə çevrilmişdir. Azərbaycan xalqının hələ neçə-neçə nəsli bu böyük məktəbdən, Heydər Əliyevin zəngin siyasi irsindən ölkəmizin inkişafı, xalqımızın rifahı naminə faydalanacaq.

Konfransda Yeni Azərbaycan Partiyası Lerik rayon təşkilatının sədri Elxan Qənbərov “Heydər Əliyevin Yeni Azərbaycan Partiyasının yaradılmasında rolu”, Lerik Rayon Təhsil Şöbəsinin müdiri Balaşirin Nəsirov “Heydər Əliyev və Azərbaycan təhsili” mövzularında məruzə etmişlər.

Milli Məclisin deputatı İqbal Məmmədov, Azərbaycan Dövlət Pedaqoji Universitetinin professoru Elman Quliyev, şair Balayar Sadiq tədbirdə çıxış etmişlər. Daha sonra Yeni Azərbaycan Partiyası sıralarına yeni qəbul olunmuş gənclərə partiya vəsiqələri təqdim edilmiş, yubiley münasibətilə keçirilmiş müsabiqə və idman yarışlarının qalibləri mükafatlandırılmışlar.

Həmin gün rayonun mərkəzi meydanında Azərbaycan xalqının ümummilli lideri Heydər Əliyevin 90 illik yubileyi münasibəti ilə konsert proqramı nümayiş etdirilmişdir.

Əli NƏCƏFXANLI

Xalq qəzeti.- 2013.- 8 may.- S. 15.