Ulu öndərin yubileyi ilə bağlı beynəlxalq elmi-praktik konfrans

AMEA Fəlsəfə, Sosiologiya və Hüquq İnstitutu rəhbərliyinin və institutda fəaliyyət göstərən Heydər Əliyev Məktəbinin təşkilatçılığı ilə ulu öndər Heydər Əliyevin anadan olmasının 90 - cı ildönümünə həsr olunmuş beynəlxalq elmi-praktik konfrans keçirilmişdir.

Tədbir iştirakçıları əvvəlcə Fəxri Xiyabana gedərək ulu öndərin məzarını ziyarət etmiş və abidəsi önünə əklil qoymuşlar. Sonra konfrans institutun akt zalında öz işinə başlamışdır.

Tədbiri giriş sözü ilə açan institutun direktoru, professor İlham Məmmədzadə bildirmişdir ki, Azərbaycan xalqının bütün tarixi ərzində yetişdirdiyi ən böyük şəxsiyyətlərdən biri, görkəmli dövlət xadimi, məşhur siyasətçi, müstəqil dövlətçiliyimizin qurucusu və xilaskarı Heydər Əliyevin anadan olmasının 90 illik yubileyinə həsr olunmuş bu beynəlxalq elmi-praktik konfransda AMEA-nın əməkdaşları ilə yanaşı, respublikanın digər qurumlarını təmsil edən nümayənədələr, habelə bir sıra xarici ölkələrdən gəlmiş alim və mütəxəssislər də iştirak edirlər. Onlar çıxış edərək ulu öndərin şəxsiyyəti, həyat və fəaliyyəti, xüsusən Azərbaycanın dövlət müstəqilliyinin qorunub saxlanması sahəsində gördüyü misilsiz işlər barədə ürək sözlərini deyəcəklər.

Rusiya Fəlsəfə Cəmiyyətinin birinci vitse-prezidenti Aleksandr Nikolayeviç Cumakov (Moskva), Arif Asalıoğlu (Türkiyə), Valentina Qavrilovna Fedotova, Nadejda Nikolayevna Fedotova (Moskva) və başqaları ümummilli lider Heydər Əliyevlə bağlı ürək sözlərini, xatirələrini dilə gətirdilər və onun Azərbaycan dövlətçiliyinin qorunub saxlanması və inkişaf etdirilməsi sahəsindəki böyük rolundan danışdılar.

Konfransda ulu öndərin zəngin və çoxşaxəli siyasi-dövlətçilik fəaliyyətini əks etdirən mövzular ətrafında bir sıra alim- tədqiqatçılar, o cümlədən institut direktorunun müavini, hüquq elmləri doktoru, professor Bəhram Zahidov, şöbə müdirləri Füzuli Qurbanov, İsaxan Vəliyev, Adil Əsədov, Mirağa Cəfərquliyev, Ədliyyə Nazirliyi Bələdiyyələrlə İş Mərkəzinin rəisi Mehti Səlimzadə, institutda fəaliyyət göstərən Heydər Əliyev Məktəbinin təşkilatçılarından Azər Mustafayev, Sənan Həsənov və başqaları çıxış etmiş, ulu öndərin son əlli ildəki dövlətçilik fəaliyyətinə dair öz fikir və mülahizələrini söyləmişlər.

Natiqlər Azərbaycanın müasir dünyada gedən siyasi proseslərin aktoru kimi çıxış etməsini fəxrlə bildirmişlər. Qeyd olunmuşdur ki, Heydər Əliyev Məktəbinin institutda fəaliyyət göstərdiyi 2006-2013-cü illər ərzində həyata keçirilən 7 böyük ümumrespublika layihəsinin ulu öndərin fəaliyyətinin bir sıra istiqamətlərini əhatə etməsi və geniş oxucu kütləsi tərəfindən maraqla qarşılanması bu irsin öyrənilməsinə dəyərli töhfə kimi qiymətləndirilə bilər.

Konfransın işi kütləvi informasiya vasitələrinin marağına səbəb olmuş və qərara alınmışdır ki, ulu öndərin anadan olmasının 90 illik yubileyinə həsr olunmuş konfrans materiallarının çap olunması institutun Elmi Şurasına məsləhət görülsün.

Q.PİRİYEV

Xalq qəzeti.- 2013.- 9 may.- S. 8.