Zaqatalada ümummilli lider Heydər Əliyevin 90 illiyi münasibətilə silsilə tədbirlər keçirilmişdir

Tədbirlərdə rayon icra hakimiyyətinin başçısı Mübariz Əhmədzadə, hüquq-mühafizə orqanlarının rəhbərləri, YAP rayon təşkilatı fəalları və ictimaiyyət nümayəndələri iştirak etmişlər. İlk tədbirdə Zilban kəndində yeni tikilmiş tibb məntəqəsinin, Mazıx kənd bələdiyyəsinin yeni tikilmiş inzibati binalarının və Kəpənəkçi kənd bələdiyyəsi və ərazi nümayəndəliyinin inzibati binasının əsaslı təmirdən sonra açılış mərasimləri keçirilmişdir.

Tədbir iştirakçıları Zaqatala şəhər 1 saylı tam orta məktəbdə ulu öndərin 90 illik yubileyinə həsr olunmuş ədəbi-bədii gecədə iştirak etmiş, Heydər parkında ulu öndərin abidə kompleksini ziyarət etmiş, Azərbaycanın dahi oğluna öz ehtiramlarını bildirmişlər.

Heydər parkında gül bayramı keçirilmişdir. Ayrı-ayrı müəssisə və təşkilatların, ümumtəhsil məktəbləri və uşaq bağçaları kollektivlərinin, uşaq yaradıcılıq mərkəzi üzvlərinin rəngbərəng güllərdən, yarpaqlardan, bəzək bitkilərindən hazırladıqları və ulu öndərə həsr etdikləri bir-birindən maraqlı kompozisiyalar, portretlər, tablolar, əl işləri bayram iştirakçılarının böyük marağına səbəb olmuşdur. Ümummilli liderə sevgi və məhəbbət, dövlət rəmzlərimizə hörmət, sülhə çağırış, nurlu günəş, aydın səma güldən hazırlanmış kompozisiyaların əsas mövzusunu təşkil edirdi.

Heydər Əliyev mərkəzində “Azərbaycan dünyaya günəş kimi doğacaq” mövzusunda elmi-praktik konfrans keçirilmişdir. Konfrans Azərbaycan Respublikasının dövlət himninin səsləndirilməsi ilə başlanmış, ulu öndərə həsr olunmuş film nümayiş etdirilmişdir. Elmi-praktik konfransda rayon icra hakimiyyətinin başçısı Mübariz Əhmədzadənin geniş məruzəsi dinlənilmişdir.

Məruzədə rayon rəhbəri xalqımızın dahi oğlu, ümummilli liderimiz Heydər Əliyevin Azərbaycanın idarəçilik sükanı arxasına keçdikdən sonra qısa müddətdə milli dövlətçilik doktrinasını irəli sürərək onun sürətli icrasına başladığını, üzləşdiyi çətinliklərə, maneələrə, dövlət çevrilişi cəhdlərinə cəsarətlə sinə gərərək mübarizlik, əyilməz iradə, dəmir məntiq, özünə inam və siyasi uzaqgörənlik kimi iradi keyfiyyətlərdən məharətlə bəhrələnərək xalqımızı vətəndaş qarşıdurmasından, müstəqilliyimizi itirmək təhlükəsindən xilas etdiyini, müasir tariximizə dövlətçiliyimizin xilaskarı, qurucusu kimi daxil olduğunu qeyd etmişdir.

Daha sonra natiq ümummilli liderimiz Heydər Əliyev tərəfindən yaradılmış möhkəm təməl üzərində Azərbaycan Respublikası Prezidenti İlham Əliyevin apardığı uğurlu daxili və xarici siyasət nəticəsində ölkəmizin artıq dünyanın ən önəmli dövlətlərindən biri kimi tanındığını xüsusi vurğulamışdır.

Heydər Əliyev siyasi irsinin zəngin bir xəzinə olduğunu bildirən natiqlər bu xəzinədən xalqımızın məvəvi cəhətdən daim bəhrələnəcəyini və ondan Azərbaycan dövlətinin siyasətində həmişə istifadə olunacağını vurğulamışlar.

Tədbir “Əliyevlər ailəsinin Azərbaycanın inkişafında rolu” və “Ulu öndərin son çıxışı” video filmlərinin nümayişi ilə yekunlaşmışdır.

İlqar HƏSƏNOV

Xalq qəzeti.- 2013.- 9 may.- S. 8.