Nəsimi rayonunda ümummilli lider Heydər Əliyevin yubileyi ilə bağlı şənlik

Ölkəmizin hər yerində olduğu kimi Nəsimi rayonunda da ümummilli liderimiz, dahi şəxsiyyət, müasir Azərbaycan dövlətinin xilaskarı və qurucusu Heydər Əliyevin 90 illiyi böyük təntənə ilə qeyd edilir.

Ulu öndərimizin yubileyi ilə əlaqədar Nəsimi Rayon İcra Hakimiyyəti İctimai Televiziya ilə birgə S.Vurğun küçəsi ilə Vaqif prospektinin kəsişməsində yerləşən parkda böyük tədbir keçirdi.

Əvvəl ümummilli liderimizin həyat və fəaliyyətindən bəhs edən film nümayiş etdirildi.

Tədbirdə bildirildi ki, əsası ulu öndərimiz Heydər Əliyev tərəfindən qoyulmuş və Azərbaycanın hərtərəfli inkişafına və xalqımızın rifahına yönəlmiş müdrik siyasət bu gün möhtərəm Prezidentimiz İlham Əliyev tərəfindən uğurla həyata keçirilir. Ölkəmizdə böyük infrastruktur layihələri həyata keçirilir, sosial-iqtisadi sahədə, elmdə, mədəniyyət təhsil və idmanda böyük uğurlara nail olunur. Azərbaycan hazırda regionun lider dövlətinə çevrilmiş və onunla dünyanın aparıcı dövlətləri və nüfuzlu beynəlxalq təşkilatları hesablaşırlar.

Ölkəmizdə əldə edilən bu nailiyyətlərdə Nəsimi rayonunun da öz yeri, öz payı vardır. Hazırda “2011 – 2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”nda və həmin proqrama əlavələrdə Nəsimi rayonu üzrə nəzərdə tutulmuş tədbirlər uğurla həyata keçirilir. Son illər rayonda sənaye məhsulu istehsalı 3,5, tikinti-quraşdırma işləri 4,3 dəfə artmış, göstərilən nəqliyyat xidməti 7, rabitə xidməti isə 9,4 dəfə yüksəlmişdir.

Rayonun tam orta məktəblərinin 18-i əsaslı təmir edilmiş, 13 məktəbdə əlavə korpuslar inşa edilmiş, 11 səhiyyə müəssisəsi əsaslı təmir olunmuşdur.

Rayonda genişmiqyaslı abadlıq, quruculuq və yenidənqurma işləri davam etdirilir. Bütün bunlar ölkəmizdə aparılan uğurlu islahatların, xalqımızın maddi-rifah halının daim yaxşılaşmasına yönəlmiş işlərin, Azərbaycanın daha da qüdrətlənməsinə istiqamətlənmiş fəaliyyətin nəticəsi və dahi Heydər Əliyev siyasətinin təntənəsidir.

Ölkəmizin tanınmış müğənnilərinin iştirakı ilə böyük konsert proqramı nümayiş etdirildi.

Ayaz HƏMİDOĞLU

Xalq qəzeti.- 2013.- 9 may.- S. 11.