“Ruhun şad olsun, ustad!”

Azərbaycan Mətbuat Şurasında yazıçı-jurnalist Məzahir Süleymanzadənin ümummilli lider Heydər Əliyevin 90 illik yubileyinə həsr olunmuş “Ruhun şad olsun, ustad!” kitabının təqdimatı keçirilib.

Mərasimi giriş sözü ilə açan MŞ sədri Əflatun Amaşov bu kitabda ümummilli lider Heydər Əliyev haqqında tanınmış qələm sahiblərinin, mətbuat işçilərinin xatirələrinin, təəssüratlarının, müsahibələrin yer aldığını diqqətə çatdırıb. Heydər Əliyevi jurnalistlərin dostu kimi tanıdan cəhətlərdən söz açan Ə.Amaşov bildirib ki, onun müəyyənləşdirdiyi mediaya dövlət qayğısı siyasəti jurnalistikanın cəmiyyətdəki yerinə və roluna verilən böyük dəyərdən irəli gəlirdi. Buna görə də qələm sahibləri ulu öndərin xatirəsinə daim ehtiramla yanaşırlar. Belə yanaşmanın bariz nümunələrindən biri də bu gün təqdimatı keçirilən kitabıdır.

“Ruhun şad olsun, ustad!” kitabının redaktoru, Ahıl Jurnalistlər Məclisinin sədri Yusif Kərimov Heydər Əliyevlə təmaslarındakı ayrı-ayrı məqamlardan söz açaraq ulu öndəri diqqətli, alicənab və son dərəcə həssas dövlət xadimi kimi xatırladığını önə çəkib. O, həmçinin 1992-ci ildə bir qrup jurnalistin Naxçıvandan keçərək Türkiyəyə səfərə gedərkən yolüstü Heydər Əliyevlə görüşdüyü anları yada salıb.

“Ruhun şad olsun, ustad!” kitabının müəllifi Məzahir Süleymanzadə Heydər Əliyev şəxsiyyəti barədə fikir bildirməyin son dərəcə çətin və məsuliyyətli iş olduğunu vurğulayıb. Lakin Heydər Əliyevin çıxışları, görüşləri bütün dövrlər üçün aktualdır, xüsusən də gələcək nəslə son dərəcə vacibdir: “Buna görə də yalnız 2001-ci ildə bir qrup tanınmış qələm sahibinin fikirlərini “Prezident Heydər Əliyevin jurnalistika dərsi” kitabımda ümumiləşdirdim. Düşünürəm ki, indi qarşınızda olan bu kitab ulu öndərin 90 illiyinə bir jurnalist hədiyyəsidir və nəşrdə fikirləri yer almış həmkarlarım ümummilli liderimizi jurnalistlərin müəllimi, ustadı kimi xatırlayaraq onun ruhuna olan ehtiramlarını bildiriblər”.

Tədbirdə çıxış edənlərdən MŞ İdarə Heyətinin üzvü, “Paralel” qəzetinin baş redaktoru Tapdıq Abbas, qocaman jurnalist Ələsgər Cabbarov, “Azərbaycan” qəzetinin əməkdaşı Flora Sadıqlı, əməkdar jurnalist Tahir Aydınoğlu və başqaları ümummilli lider Heydər Əliyevi jurnalistikaya və bütövlükdə, söz sənətinə yüksək qiymət verən tarixi şəxsiyyət kimi səciyyələndirərək, ulu öndərin əsasını qoyduğu mətbuata dəstək ənənəsinin hazırda oturuşmuş sistem olaraq fəaliyyət göstərdiyini vurğulayıblar. Onlar təqdimatı keçirilən nəşrin Heydər Əliyev irsinin gələcək tədqiqatçıları üçün dəyərli mənbə olacağına əminliklərini də ifadə ediblər.

Əlipənah BAYRAMOV

Xalq qəzeti.- 2013.- 9 may.- S. 15.