Nərimanov rayonunda GÜL BAYRAMI

Nərimanov rayonunda ümummilli lider Heydər Əliyevin 90 illik yubileyinə həsr olunmuş Gül bayramı keçirilmişdir.

N.Nərimanov parkında keçirilən tədbirdə məktəblilərin rəsm işləri, pannolar, güllərdən düzəldilmiş butalar və kompozisiyalar bayrama gözəllik gətirirdi. Məktəblilərin hazırladıqları və həvəslə təqdim etdikləri tablolar göz oxşayırdı. Güllərlə bəzədilmiş libasda şəstlə dayanan körpələr bayramı daha da rəngarəng edirdi.

207 saylı tam orta məktəb, 57 saylı tam orta məktəb, Bağça Məktəb Lisey kompleksi, 306 saylı körpələr evi - uşaq bağçasının kompozisiyaları diqqəti cəlb edirdi. Bağçada tərbiyə alan 4 yaşlı Məryəm Qasımovanın əl işi iştirakçılarda böyük maraq doğururdu.

Milli Qəhrəman Rafiq Nəsirəddinov adına 39 saylı tam orta məktəbin şagirdlərinin əl işləri və çəkdikləri rəsmlər isə xüsusilə seçilirdi. Təşkilatçı müəllim, əmək veteranı Felmira Məmmədova şagirdlərin ulu öndərin 90 illik yubileyinə həsr olunmuş builki gül bayramına xüsusi hazırlaşdıqlarını bildirdi.

Məktəbin 7-ci sinif şagirdləri Səriyyə Şirəliyeva, Soltan Tağıyev, Nəzrin Qədirli və Jalə Əliyevanın gül kompozisiyaları isə öz mükəmməlliyi ilə seçilir və müəlliflərinin böyük istedadından xəbər verirdi.

Tədbirdəki konsert proqramı həmin gün insanlarda əsl bayram əhval-ruhiyyəsi yaradırdı.

Elçin ABBASOV

Xalq qəzeti.- 2013.- 10 may.- S. 14.