Qələbənin 68-ci ildönümü Nərimanov rayonunda geniş qeyd edildi

Mayın 9-da Nərimanov rayonunda yerləşən “Qardaşlıq məzarlığı” Əbədi Xatirə Kompleksi önündə faşizm üzərində qələbənin 68-ci ildönümünə həsr edilmiş təntənəli mərasim keçirildi.

Nərimanov Rayon İcra Hakimiyyəti tərəfindən təşkil edilən tədbirdə müharibə veteranları, Milli Məclisin deputatları, Rusiya, Ukrayna, Moldova, Belarus, Qazaxıstan, Özbəkistan, Qırğızıstan, Türkmənistan və digər MDB ölkələrinin Azərbaycanda akkreditə olunmuş səfirləri, hərbçilər, gənclər, ictimaiyyət nümayəndələri iştirak edirdilər.

Azərbaycanın dövlət himni səsləndirildikdən sonra Böyük Vətən müharibəsində həlak olanların əziz xatirəsi bir dəqiqəlik sükutla yad edildi. Əllərində MDB dövlətlərinin bayraqlarını tutmuş gənc şahinlər fəxri keçidlə abidənin ətrafına dövrə vurdular.

Tədbirdə çıxış edən Nərimanov Rayon İcra Hakimiyyətinin başçısı Abdin Fərzəliyev 1941-1945-ci illər Böyük Vətən müharibəsində yüz minlərlə azərbaycanlının iştirak etdiyini və onlardan 300 min nəfərin həlak olduğunu, 300 mindən çox soydaşımızın isə cəbhədə göstərdikləri igidliyə görə orden və medallarla təltif olunduğunu diqqətə çatdırdı. Qeyd olundu ki, müharibə illərində Azərbaycan ön cəbhəni yanacaq, silah, ərzaq, geyimlə təmin etmiş, neft və neft məhsullarının 70 faizi Bakıda istehsal olunmuş və Sovet Ordusunun, demək olar ki, bütün hərbi texnikası məhz Bakı nefti ilə işləmişdir.

Azərbaycan rəhbərliyinin İkinci Dünya müharibəsində həlak olanların xatirəsinə ehtiramla yanaşdığını vurğulayan A.Fərzəliyev “Qardaşlıq məzarlığı” Əbədi Xatirə Kompleksinin ölkə Prezidenti İlham Əliyevin xüsusi diqqət və qayğısı sayəsində yaradıldığını qeyd etdi. Bildirildi ki, sahəsi 11 min 220 kvadratmetr olan ərazidə həmin illərdə Bakıdakı hospitallarda vəfat etmiş 1462 qəhrəman döyüşçü dəfn olunmuşdur. Onların arasında müxtəlif xalqların nümayəndələri vardır.

Müharibə veteranlarını faşizm üzərində qələbənin 68-ci ildönümü münasibətilə təbrik edən A.Fərzəliyev Nərimanov rayonunda yaşayan 1941-1945-ci illər müharibəsinin veteranları ilə vaxtaşırı görüşlər keçirildiyini, onlara qayğı göstərildiyini diqqətə çatdırdı, bu tədbirin gənclərin vətənpərvərlik ruhunda böyüyüb tərbiyə almasında xüsusi əhəmiyyət daşıdığını vurğuladı.

Tədbirdə Böyük Vətən müharibəsinin veteranı Abbas Mazanov çıxış edərək ümummilli lider Heydər Əliyevin hakimiyyətə qayıdışından sonra müharibə veteranlarına, onların ailə üzvlərinə diqqət və qayğının xeyli artdığını və 9 May – Qələbə Gününün Azərbaycanda daha möhtəşəm qeyd olunmağa başlandığını diqqətə çatdırdı. Bu siyasətin hazırda Prezident İlham Əliyev tərəfindən davam etdirildiyini vurğulayan natiq göstərilən yüksək diqqət və qayğıya görə müharibə veteranları adından dövlətimizin başçısına minnətdarlıqlarını bildirdi.

MDB ölkələrinin səfirləri adından veteranları təbrik edən Rusiya Federasiyasının ölkəmizdəki səfiri Vladimir Doroxin Azərbaycan dövlətinin rəhbərliyinin keçmiş sovet ölkələrinin müştərək tarixi ilə bağlı mövqeyini yüksək qiymətləndirildiyini qeyd etdi. Səfir, həmçinin Azərbaycanın müharibə illərində verdiyi töhfələri böyük qəhrəmanlıq nümunəsi kimi dəyərləndirdi.

Sonda tədbir iştirakçıları 1941-1945-ci illər müharibəsində həlak olanların xatirəsinə ucaldılmış abidə önünə əklillər və gül dəstələri qoydular.

M.YAQUBZADƏ

Xalq qəzeti.- 2013.- 10 may.- S. 14.