Zaqatalada “Heydər Əliyev və Azərbaycan polisi” mövzusunda konfrans keçirilmişdir

Zaqataladakı Heydər Əliyev Mərkəzində “Heydər Əliyev və Azərbaycan polisi” mövzusunda konfrans keçirilmişdir. Konfrans iştirakçıları əvvəlcə muzeydəki stendlərə baxmış, ümummilli liderin keçdiyi həyat yolu ilə tanış olmuşlar.

Konfransı giriş sözü ilə açan Rayon Polis Şöbəsinin rəisi, polis polkovniki Arif Babayev bildirmişdir ki, Heydər Əliyevin keçdiyi həyat yolu hamımız üçün, sözün həqiqi mənasında, örnəkdir. Heydər Əliyev Azərbaycanın tarixini yenidən yazmış böyük bir şəxsiyyətdir. Bu gün biz fəxrlə qeyd edə bilərik ki, Azərbaycan Prezidenti İlham Əliyevin rəhbərliyi ilə əsası ümummilli lider tərəfindən qoyulmuş Azərbaycan dövlətçiliyinin möhkəmləndirilməsi istiqamətində hüquqi-demokratik islahatların bazası daha da genişləndirilir və zənginləşdirilir. Bu, hüquq-mühafizə sistemində, habelə polis orqanlarında çalışanların qarşısına yeni və mühüm vəzifələr qoymaqla yanaşı, onların məsuliyyətini daha da artırır və bu şərəfli peşədə çalışmaq üçün hər bir polis əməkdaşına stimul verir.

Arif Babayev daha sonra qeyd etdi ki, müstəqil Azərbaycan dövlətinin hərtərəfli inkişafında əvəzsiz tarixi xidmətləri olan, milli dövlətçilik ideyasının bərqərar olunmasına və ölkəmizin beynəlxalq aləmdə nüfuzunun artmasına misilsiz töhfələr vermiş ulu öndər Heydər Əliyevin 90 illik yubileyinin ölkə miqyasında layiqincə keçirilməsini təmin etmək məqsədilə Azərbaycan Respublikası Prezidentinin 2013-cü il 21 yanvar tarixli sərəncamı ilə tədbirlər planı təsdiq edilmişdir. Həmin planın 11-ci bəndinə uyğun olaraq, Azərbaycan Respublikasının Daxili İşlər Nazirliyi tərəfindən təsdiq edilmiş 28 fevral 2013-cü il tarixli xüsusi plana əsasən, Zaqatala Rayon Polis Şöbəsi tərəfindən də bir sıra tədbirlərin həyata keçirilməsi nəzərdə tutulmuşdur. Belə ki, ümummilli lider Heydər Əliyevin həyat yolu haqqında xüsusi mövzular ətrafında söhbətlər aparılmış, onun həyat və fəaliyyətinə həsr olunmuş filmlər nümayiş etdirilmiş, rayon qəzetində “Daxili İşlər orqanlarının və Daxili Qoşunların inkişafı Heydər Əliyevin adı ilə bağlıdır” mövzusunda yazı dərc edilmiş, gənc əməkdaşlara böyük şəxsiyyətin irsinin öyrədilməsi məqsədilə şöbənin şəxsi heyəti və polis veteranlarının görüşləri keçirilmiş, Azərbaycanın ərazi bütövlüyü uğrunda, eləcə də xidməti borcu yerinə yetirərkən həlak olmuş əməkdaşların ailələri ilə görüşlər təşkil edilmiş, onlara xatirə hədiyyələri və maddi yardımlar verilmişdir. Həmçinin ulu öndər Heydər Əliyevin xatirəsinə həsr olunmuş futbol turniri də təşkil olunmuşdur.

Konfransda rayon polis şöbəsi rəisinin şəxsi heyətlə iş üzrə köməkçisi, polis polkovnik-leytenantı Laçın Paşayev “Heydər Əliyev və Azərbaycan polisi” mövzusunda məruzə ilə çıxış etmiş, Azərbaycan polisinin nüfuzunun artmasında, cinayətkarlığa qarşı şərəflə mübarizə aparmasında onlara göstərdiyi diqqət və qayğıdan danışmışdır.

İlqar HƏSƏNOV

Xalq qəzeti.- 2013.- 10 may.- S. 15.