ABŞERON: Ulu öndərə möhtəşəm ehtiram

10 may 2013-cü il. Abşeron rayonu. Ulu öndərin adına əbədiləşdirilmiş 9,5 hektarlıq yaraşıqlı park. Abşeron yarımadasının “şıltaqlığı” bu dəfə də sinoptikləri təəccübləndirdi — gözlənildiyindən də daha günəşli, mülayim bir sabahın açılmasıyla abşeronlular ümummilli lider Heydər Əliyevin möhtərəm xatirəsini anmaq, 90 illik yubileyini birlikdə qeyd etmək üçün axın-axın parka yığışırdılar.

Əllərində gül dəstələri tutmuş yüzlərlə insanın üzündəki təbəssüm möhtəşəm yubileyin ahənginə uyğunlaşırdı. Rayon tədbirlərində həmişə fəal iştirak edən köhnə tanışlarımdan biri ilə rastlaşdım. Hal-əhvaldan sonra dedi: – Qardaş, sən Allah, bir havanın gözəlliyinə bax! Belə gözəl gündə dünyaya gəlməyin özü də bir xoşbəxtlikdir, həm də hər insana qismət olmayan xoşbəxtlik! Bayramımız mübarək olsun!

Çox keçməmiş Abşeron Rayon İcra Hakimiyyətinin başçısı Zakir Fərəcovun gəlişi ilə tədbir başlayır. O, bacarıqlı əllərin bəhrəsi olan müxtəlif əl işlərinin sərgisini diqqətlə izləyir, bədii özfəaliyyət kollektivlərinin, balaca rəqqasların çıxışlarına maraqla tamaşa edir. Üzündəki məmnunluqdan açıq-aydın görünür ki, abşeronluların Heydər Əliyev şəxsiyyətinə səmimi və sonsuz sevgiləri rayon rəhbərini olduqca təsirləndirib və məmnun edib. “Yüz eşitməkdənsə bir görmək yaxşıdır” atalar sözünə əməl edərək təəssüratlarımı və müşahidələrimi buradaca nöqtələyirəm. Qoy bu təəssüratları və müşahidələri şəkillər tamamlasın.

Səməd HÜSEYNOĞLU

Xalq qəzeti.- 2013.- 12 may.- S. 6.