“Heydər Əliyev və Azərbaycan iqtisadiyyatı” mövzusunda yaradıcılıq müsabiqəsi başa çatmışdır

Azərbaycan xalqının ümummilli lideri Heydər Əliyevin 90 illik yubileyi ilə əlaqədar İqtisadi İnkişaf Nazirliyi tərəfindən silsilə tədbirlər həyata keçirilmişdir.

Bu tədbirlərdən olan və İqtisadi İnkişaf Nazirliyinin ulu öndər Heydər Əliyevin 90 illik yubileyi ilə bağlı KİV nümayəndələri arasında təşkil etdiyi “Heydər Əliyev və Azərbaycan iqtisadiyyatı” mövzusunda yaradıcılıq müsabiqəsinə mayın 11-də yekun vurulmuşdur. Bununla əlaqədar Bakı Biznes Mərkəzində keçirilmiş tədbirdə İqtisadi İnkişaf Nazirliyinin aidiyyəti qurumlarının, Azərbaycan Mətbuat Şurasının əməkdaşları və KİV nümayəndələri iştirak etmişlər.

Qeyd edək ki, İqtisadi İnkişaf Nazirliyi tərəfindən Bakı Biznes Mərkəzinin təşkilati, Azərbaycan İnvestisiya Şirkətinin və “Azərlotereya” ASC-nin maliyyə dəstəyi ilə təşkil olunmuş müsabiqəyə ümumilikdə müxtəlif qəzet, sayt və agentliklərdə yerləşdirilmiş 28 məqalə və televiziya süjetləri təqdim edilmişdir. Müsabiqənin yekunları ilə bağlı keçirilmiş tədbirdə İqtisadi İnkişaf Nazirliyinin Aparat rəhbəri Samir Vəliyev çıxış edərək müasir Azərbaycanın memarı Heydər Əliyevin 90 illik yubileyi ilə bağlı İqtisadi İnkişaf Nazirliyi tərəfindən həyata keçirilmiş tədbirlər barədə məlumat vermişdir.

Qeyd edilmişdir ki, ümummilli lider Heydər Əliyevin 90 illik yubileyi ilə əlaqədar İqtisadi İnkişaf Nazirliyi tərəfindən Bakıda və regionlarda müxtəlif tədbirlər, konfranslar, sahibkarlar üçün Heydər Əliyev dərsləri, yaşıllaşdırma aksiyası, şahmat və futbol turnirləri keçirilmiş, KİV nümayəndələri arasında “Heydər Əliyev və Azərbaycan iqtisadiyyatı” mövzusunda yaradıcılıq müsabiqəsi təşkil olunmuşdur. Müsabiqəyə təqdim edilmiş məqalə və süjetlər İqtisadi İnkişaf Nazirliyində yaradılmış və Azərbaycan Mətbuat Şurasının da təmsil olunduğu müsabiqə komissiyası tərəfindən qiymətləndirilmiş və qaliblər müəyyən edilmişdir. Tədbirdə qaliblər elan olunmuş, onlara diplomlar və pul mükafatları təqdim olunmuşdur.

Ümumiyyətlə isə, bütün müsabiqə iştirakçıları diplomlarla təltif olunmuş, onlara pul mükafatları təqdim edilmişdir.

İ.RÜSTƏMOV

Xalq qəzeti.- 2013.- 12 may.- S. 7.