Mənim “Ağ Şəhər”im

Yeni-yeni prospektləri, rahat yolları, möhkəm təməl üzərində inşa edilən körpüləri və keçidləri, yeni park və xiyabanları qənirsiz gözəlliyi ilə insanlarda xoş duyğular yaradır. Bu hələ harasıdır. Böyük Bakının Baş Planı ilə tanış olsanız görərsiniz ki, yaxın gələcəkdə bu şəhər öz simasını sürətlə dəyişəcək. Bu şəhərdə Qara Şəhərin yerində salınacaq Ağ Şəhər Bakının füsünkar gözəlliyinə yeni bir çalar əlavə edəcək.

“Qaraşəhər” adlanan sənaye zonasında həyata keçirilən Bakı Ağ Şəhər layihəsi dünyanın ən iri, müasir layihələrindən biridir. Bu şəhər ölçülərinə görə Monakodan böyük və “İçərişəhər”in ərazisindən 11 dəfə artıq olan 221 hektar ərazini əhatə edəcək və o, Qafqaz regionunun ən iri layihəsinə çeviriləcəkdir. Layihə başa çatdıqda, Ağ Şəhərin əhalisini sayına görə Andorra Knyazlığının əhalisi ilə müqayisə etmək mümkün olacaqdır.

Bakı Ağ Şəhər bir-biri ilə qonşu olan 10 kvartalı birləşdirəcək. Hər bir kvartalın uğurlu inşası bütün Baş Planın həyata keçirilməsi üçün həlledici rol oynayacaq.

Tikintinin ümumi sahəsi 3,7 milyon kvadratmetr təşkil edəcəkdir. Burada 18 000 yaşayış və kommersiya vahidi olacaqdır. Mütəxəssislərin fikrinə görə, burada 48 000 iş yerinin açılması nəzərdə tutulub. Bakı Ağ Şəhər mövcud olan Bulvar xəttini daha 1,3 kilometr uzadaraq, onu dünyada ən uzun bulvara çevirəcəkdir. Ölçülərinə görə Bulvardakı çarxdan iki dəfə böyük və Parisdəki məşhur Seyretmə Çarxından (“Grande Roue de Paris”) iri olan 65 metrlik Seyretmə Çarxı Dəniz Sahilinin yaraşığı olacaqdır. Bakı Ağ Şəhərin 4 hektar ərazidə yerləşəcək Fəvvarələr Meydanı ölçülərinə görə mövcud Fəvvarələr Meydanından (2 hektar) böyük olacaqdır.

Bakı Ağ Şəhərin bütün inciləri - çox vaxt baxış dəhlizinin sonunda yerləşən və tikililər arasında hündürlüyü və özünəməxsusluğu ilə seçilən binalar, keçid kompozisiyaları və körpülər şəhər mühitinə rəngarənglik qatan unikal elementlər olacaqdır. Bu ərazidə regionun ən iri ticarət mərkəzi – “Baku City Mall” yerləşəcəkdir.

Nobel prospektindəki piyada keçidi vasitəsilə Bulvardakı “Baku City Mall” ticarət mərkəzi ilə birləşən müasir əyləncə və ticarət mərkəzi Bakı Ağ Şəhərin Fəvvarələr Meydanına yaraşıq verəcəkdir. Fəvvarələr Meydanında yerləşəcək yeni metro stansiyası mövcud Azadlıq - Xətai xəttinin davamı olacaqdır.

Ağ Şəhərdə aşağıdakı ticarət və infrastruktur obyektləri, idarə və təşkilatlar olacaq: məktəb, 5 uşaq bağçası, 1 kinoteatr, 1 kitabxana, 3 mədəniyyət kompleksi, 1 inzibati idarəetmə binası, 2 polis bölməsi, 1 yanacaqdoldurma məntəqəsi, 1 baytarlıq stansiyası, 1 xəstəxana, 5 sağlamlıq mərkəzi və s.

Nəqliyyat məsələlərinə Babək prospektinin genişləndirilməsi də daxildir (Ağ Şəhər demək olar ki, Babək və Nobel prospektlərinin arasında yerləşir). İctimai yerlərdə isə 40 min avtomobil tutumlu yeraltı və yerüstü dayanacaqlar olacaq. Bulvar boyunca isə tramvay xətti fəaliyyət göstərəcək. Gələcəkdə xətt bütün dənizkənarı əraziləri əhatə edə bilər.

Bunlar hələ Ağ Şəhərlə bağlı göstəricilərin heç də hamısı deyil. Bu şəhər öz gözəlliyi və müasirliyi ilə yaxın gələcəkdə yeni həyata qovuşacaq.

M.MÜKƏRRƏMOĞLU.

Xalq qəzeti.- 2013.- 19 may.- S. 7.