Uşaqlara qüsursuz nitq!

BMT-nin xüsusi proqramı əsasında fəaliyyət göstərən Türkiyənin tanınmış Ritm Konuşma Mərkəzi uşaqlarda nitq qüsurlarını vaxtında aradan qaldırmağı hədəfə alıb. Baş ofisi İstanbul şəhərində yerləşən humanitar qurumun Türkiyənin müxtəlif bölgələrində geniş şəbəkəsi var.

Mərkəzin ölkəmizdəki filialı Səbail rayonunun Badamdar qəsəbəsində açılmışdır. Bu, mərkəzin Azərbaycanda yerləşən rəsmi nümayəndəliyidir və Ritm Danışma Mərkəzi kimi tanınır. Burada balaca uşaqlar, həm də yaşlılar qısa müddətdə kəkələmə, nitqdə ləngimə, hərf pozuntusu və digər nitq qüsurlarından azad ola bilərlər. Uşaqlara əziyyət verən kəkələməni iki həftəyə aradan götürmək mümkündür. Mərkəzin icraçı direktoru Şəlalə Quliyeva bildirdi:

– Mərkəzimiz nitqin inkişafında qüsurları aradan qaldırmaq və onun qarşısını almaq üçün xüsusi təlim-tərbiyə sistemi tətbiq edir. Metodika ilə uşaqlarda olan nitq qüsurlarının növləri, onların patologiyası, fizioloji–psixoloji araşdırılması, təhlili, xəstəliklərin yaranma səbəblərinin öyrənilməsi, müayinəsi və korreksiya işi əhatə olunur. Düzgün və səlis nitqin olmaması uşaqları utancaq, özünə qapanmış, aqressiv edir. Məktəbdə belə uşaqlar özlərini daha çox narahat hiss edirlər, ünsiyyətə girməkdən, kollektivdə olmaqdan çəkinirlər. Bu isə azyaşlıların ümumi inkişafına pis təsir göstərir.

Uşaqlarda düzgün nitq mədəniyyətinin inkişaf etdirilməsi vəzifəsinin uğurla həyata keçirilməsi üçün mərkəzin əməkdaşları əllərindən gələni əsirgəmirlər. Bu mürəkkəb işin öhdəsindən gəlməyə, uşaq və valideynlərin etibarını qazanmağa çalışırıq. Tətbiq etdiyimiz korreksiya proqramı 3 aylıq təlim və məqsədləri nəzərdə tutur. Mütəxəssislərimiz 3-4 yaşdan tutmuş 80 yaşa qədər şəxslərdə kəkələmə, nitqdə ləngimə, hərf pozuntusu, artekulyasiyanın və psixoloji funksiyaların pozuntularının aradan qaldırılması, müsbət sosial-emosional durumun bərpası, dilin və düşüncənin inkişaf etdirilməsi prosedurlarını uğurla aparırlar.

Vaxtaşırı məşqlər türk mütəxəssislərin iştirakı ilə keçirilir. Mərkəz yaxşı maddi-texniki baza, müasir kompyuter texnologiyası ilə təchiz edilib. Bütün dərs vəsaitləri, elektron yazılı və şifahi tədris proqramları Türkiyədən gətirilib.

S.Qarayeva sonda dedi:

– Son zamanlar bəzi müəssisələrdə psixologiya və defektologiya üzrə təhsilləri olmayanlar özlərini psixoloq kimi təqdim edirlər. Onlara müraciət edən insanlar aldadılmış vəziyyətdə qalırlar. Belə halları nəzərə alıb uşaqları nitq problemləri yaşayan valideynləri mərkəzimizə dəvət edirik. Fiziki və mənəvi cəhətdən sağlam gənc nəslin yetişdirilməsi cəmiyyətin gələcəyinə xidmət edir və biz bu işə öz töhfəmizi veririk.

R.TAHİR

Xalq qəzeti.- 2013.- 19 may.- S. 6.