“Leyli və Məcnun” operası Düşənbədə tamaşaya qoyulmuşdur

Azərbaycanın Tacikistandakı səfirliyindən aldığımız məlumatda bildirilir ki, bu günlərdə Düşənbədə Sadraddin Ayni adına Dövlət Opera və Balet Teatrının səhnəsində Azərbaycanın dahi bəstəkarı Üzeyir Hacıbəylinin Şərqin və müsəlman dünyasının ilk operası “Leyli və Məcnun” tamaşaya qoyulmuşdur.

Düşənbənin mədəni həyatında əsl bayrama çevrilən tamaşada Tacikistanın dövlət və hökumət strukturlarının rəhbərləri, nazirlər, parlament üzvləri, sabiq prezident və nazirlər, həmçinin, diplomatik korpusun təmsilçiləri, habelə Tacikistanda müvəqqəti və daimi yaşayan azərbaycanlılar və onların ailə üzvləri, yerli və xarici KİV nümayəndələri də iştirak etmişlər.

Azərbaycan xalqının ümummilli lideri, görkəmli dövlət xadimi Heydər Əliyevin 90 illik yubileyinə həsr olunmuş Azərbaycan-Tacikistan dostluq konserti tamaşaçılar və musiqişünaslar tərəfindən böyük rəğbət, sevgi və alqışlarla qarşılanmışdır.

Tacikistan Respublikasının mədəniyyət naziri M.Asrori tədbir iştirakçılarını təbrik etmiş və bildirmişdir ki, son illərdə Azərbaycanın Tacikistandakı səfirliyinin dəstəyi ilə keçirilən mədəni tədbirlərin artması sevindirici haldır. Bugünkü “Leyli və Məcnun” tamaşası Heydər Əliyevin 90 illik yubileyinə həsr olunmaqla yanaşı, Azərbaycan-Tacikistan mədəni əlaqələrinin müsbət müstəvidə inkişafının bariz rəmzidir.

Azərbaycanın Tacikistandakı səfiri Abbasəli Həsənov çıxışında tamaşanın ərsəyə gəlməsində əməyi olan hər kəsə minnətdarlığını bildirərək qeyd etmişdir ki, “Leyli və Məcnun” tamaşasının Düşənbə ictimaiyyətinə təqdim edilməsi səfirlik tərəfindən ulu öndər Heydər Əliyevin 90 illik yubileyinə həsr olunan silsilə tədbirlərdən biridir. Səfir vurğulamışdır ki, hələ sovet dönəmində Sov İKP MK Siyasi Bürosunun üzvü və SSRİ Nazirlər Soveti sədrinin 1-ci müavini kimi yüksək vəzifə tutan ümummilli lider Heydər Əliyev bütün İttifaq respublikaları, o cümlədən, Tacikistan üçün böyük işlər görmüş, müstəqillik illərində də Tacikistana və onun xalqına öz dəstəyini əsirgəməmişdir.

Daha sonra səfir A.Həsənov bidirmişdir ki, mədəni tədbirlər təkcə Düşənbədə deyil, eləcə də Gəncə ilə qardaşlaşmış Xocəndə şəhərində, həmçinin, Tacikistan Respublikasının digər bölgələrində də bundan sonra da davam etdiriləcəkdir. Mədəni əlaqələrimizin dərinləşməsi xalqlarımızı bir-birinə daha da yaxınlaşdıracaq və dövlətlərimiz arasında münasibətlərin hərtərəfli inkişafına müsbət təsir göstərəcəkdir.

İ.NİZAMİOĞLU

Xalq qəzeti.- 2013.- 21 may.- S. 6.