“İnformasiya təhlükəsizliyi problemləri” I Respublika elmi-praktiki konfransı

AMEA İnformasiya Texnologiyaları İnstitutunda ümummilli lider Heydər Əliyevin anadan olmasının 90 illiyinə həsr olunmuş və iki gün davam edən “İnformasiya təhlükəsizliyi problemləri” I Respublika elmi-praktiki konfransı keçirilmişdir. Bu barədə Rabitə və İnformasiya Texnologiyaları Nazirliyinin rəsmi saytı məlumat yaymışdır.

Tədbirdə AMEA prezidenti, akademik Akif Əlizadə konfransın məqsəd və əhəmiyyətindən söz açıb. İnformasiya resurslarının dayanıqlı, etibarlı və təhlükəsiz fəaliyyətinin təmin olunmasının zəruriliyini ifadə edən AMEA prezidentinin sözlərinə görə, hər bir dövlətin maraqları yalnız coğrafi məkanda deyil, virtual aləmdə də qorunmalıdır.

Konfransın ənənəvi xarakter almasının zəruriliyini ifadə edən AMEA prezidenti informasiya təhlükəsizliyi problemlərinin araşdırılması ilə bağlı Azərbaycan Milli Elmlər Akademiyasının qarşısında duran başlıca vəzifələrdən də bəhs edib. Tədbirin alim və mütəxəssislərin bu sahədə elmi nailiyyətlərinin təbliği, bilik və təcrübə mübadiləsinin aparılması baxımından mühüm əhəmiyyət kəsb etdiyini vurğulayıb.

Rabitə və informasiya texnologiyaları naziri Əli Abbasov informasiya təhlükəsizliyi sahəsində dövlət siyasətindən söz açıb. Müasir dövrdə kibertəhlükəsizliyin qlobal problemə çevrildiyini və bu problemə qarşı beynəlxalq müstəvidə mübarizə tədbirlərinin gücləndirildiyini deyən nazir geniş miqyas alan təhlükələrlə bağlı əldə olunan statistikanı diqqətə çatdırıb. Beynəlxalq səviyyədə kibertəhdidlərə qarşı mübarizə tədbirlərindən də danışan Ə.Abbasovun sözlərinə görə, burada əsasən 3 aspekt, o cümlədən informasiya azadlığı, şəxsi informasiyanın qorunması və informasiyanın təhlükəsizliyi həmişə bir-biri ilə rəqabətdə olduğundan beynəlxalq razılaşmalarda problemlər yaradır.

Daha sonra insan hüquqları üzrə müvəkkil, professor Elmira Süleymanova, AMEA-nın akademik-katibi, İnformasiya Texnologiyaları İnstitutunun direktoru, AMEA-nın müxbir üzvü, professor Rasim Əliquliyev, AMEA-nın vitse-prezidenti İsa Həbibbəyli, Azərbaycan Texniki Universitetinin rektoru, professor Havar Məmmədov da çıxış edərək informasiya cəmiyyətinin qurulmasında aparılan islahatlardan, görülən işlərdən söz açıblar.

Konfransda “İnformasiya təhlükəsizliyinin humanitar problemləri” və “İnformasiya təhlükəsizliyinin texnoloji problemləri” üzrə seksiya iclaslarında informasiya təhlükəsizliyinin müxtəlif istiqamətlərində aktual məsələləri əhatə edən məruzələr dinlənilmişdir.

2013-cü ilin ölkədə “İnformasiya-kommunikasiya texnologiyaları ili” elan edilməsi ilə bağlı Azərbaycan Respublikası Prezidentinin sərəncamı ilə təsdiq edilmiş Tədbirlər Planına uyğun olaraq keçirilən tədbirin təşkilatçıları Rabitə və İnformasiya Texnologiyaları Nazirliyi, Xüsusi Dövlət Mühafizə Xidmətinin (XDMX) Xüsusi Rabitə və İnformasiya Təhlükəsizliyi Dövlət Agentliyi, Azərbaycan Milli Elmlər Akademiyası və AMEA İnformasiya Texnologiyaları İnstitutudur.

M.MÜKƏRRƏMOĞLU

Xalq qəzeti.-2013.- 21 may.- S. 6.