Heydər Əliyevin 90 illik yubileyi Polşada qeyd edilmişdir

May ayının 12-dən 18-dək Bakı şəhəri Xəzər Rayon İcra Hakimiyyətinin başçısı Gülağa İslamovun rəhbərliyi altında Polşa Respublikası Pruşkuv rayonunun Nadajın şəhərinə 6 nəfərlik nümayəndə heyəti səfər etmişdir. Səfər çərçivəsində Azərbaycan Respublikasının Polşadakı səfirliyinin dəstəyi və Nadajın şəhər icra hakimiyyətinin köməyi ilə silsilə tədbirlər keçirilmişdir.

Nümayəndə heyəti 13 may 2013-cü il tarixində Varşava şəhərinin Saska Kempa Mədəniyyət Mərkəzində Azərbaycan Respublikasının Polşadakı səfirliyi tərəfindən ümummilli lider Heydər Əliyevin anadan olmasının 90 illiyi münasibətilə təşkil olunmuş təntənəli mərasimdə iştirak etmişdir. Tədbirdə çıxış edən nümayəndə heyətinin rəhbəri Xəzər rayonunda aparılan quruculuq və abadlıq işlərindən danışmış, Azərbaycan Respublikasının Prezidenti cənab İlham Əliyevin qayğısı sayəsində tikilən yeni məktəblər, inşa olunan təzə yollar və əhalinin işlə təmin edilməsi istiqamətində görülən işlər barədə ətraflı məlumat vermiş və etiraf etmişdir ki, bütün bunlar ulu öndər Heydər Əliyevin ölkədə yaratdığı sabitlik nəticəsində mümkün olmuşdur.

14 may 2013-cü il tarixində nümayəndə heyəti Nadajın şəhərində yerləşən Eşitmə Fiziologiyası və Patologiyası İnstitutunda olmuşdur. Qonaqlara institutun fəaliyyəti barədə ətraflı məlumat verilmiş, son illər burada əldə olunmuş nailiyyətlərdən söhbət açılmışdır. Xəzər Rayon İcra Hakimiyyətin başçısı Gülağa İslamov öz növbəsində Prezident İlham Əliyevin qayğısı ilə ölkəmizdə tikilən və dünya standartlarına cavab verən yeni xəstəxanalardan, səhiyyə sahəsində görülmüş işlərdən ətraflı danışmışdır.

Sonrakı gün Nadajın şəhərindəki II İohan Pavel adına gimnaziyada ümummilli lider Heydər Əliyevə həsr olunmuş tədbir keçirilmişdir. Nadajın şəhərinin meri Yanuş Qjıb tədbiri açaraq şagird və müəllimlərə bildirmişdir ki, Azərbaycan Respublikasının qurucusu və memarı olan Heydər Əliyevin şəxsi dəvəti ilə XXI əsrin əvvəlində Roma Papası II İohan Pavel ilk dəfə Azərbaycana və Qafqaza səfər etmişdir. Xəzər Rayon İcra Hakimiyyətinin başçısı Gülağa İslamov ümummilli liderin Azərbaycanın tarixindəki rolundan, ölkənin sabitliyi və inkişafı istiqamətində gördüyü işlərdən danışmışdır. O qeyd etmişdir ki, ulu öndərimiz Heydər Əliyev tərəfindən müəyyən olunmuş siyasi və iqtisadi kurs bu gün Azərbaycan Respublikasının Prezidenti cənab İlham Əliyev tərəfindən uğurla davam etdirilir.

Azərbaycan Respublikasının Polşadakı səfiri Həsən Həsənov tədbir iştirakçılarına ümummilli lider Heydər Əliyevin ölkənin ən çətin anında prezident seçilməsindən danışmış, qısa zaman ərzində dövləti siyasi böhrandan, iqtisadi tənəzzüldən çıxararaq stabil və inkişaf edən respublikaya çevrilməsi istiqamətində gördüyü işlər haqqında ətraflı məlumat vermişdir.

Sonra Xəzər Rayon İcra Hakimiyyətinin başçısı II İohan Pavel adına gimnaziyanın şagirdləri tərəfindən “Azərbaycan Şərq və Qərb arasında qapı” mövzusunda ümummilli lider Heydər Əliyev və Azərbaycan haqqında yazılmış inşa müsabiqəsində ilk üç yeri tutmuş şagirdlərə diplom və qiymətli hədiyyələr təqdim etmişdir. Polşalı məktəblilər üzərində “Heydər Əliyev-90” yazılmış köynək və papaq geyinmiş, yaxalarında Heydər Əliyevin rəsmi əks olunan döş nişanları taxmışlar. Tədbirin sonunda gimnaziyanın qarşısında Azərbaycan-Polşa diplomatik əlaqələrinin qurulması şərəfinə ucaldılmış abidə önünə əklil qoyulmuşdur.

16 may 2013-cü il tarixində Xəzər rayonu ilə II İohan Pavel adına gimnaziya rəhbərliyi arasında şagird və müəllim heyətinin mübadiləsinə dair danışıqlar aparılmışdır. İlkin razılığa əsasən 2013-cü il iyun ayının sonları Polşadan 14 nəfərlik şagird heyəti Bakıya gələcəkdir. Qonaqlara bir həftə ərzində Azərbaycanın mədəniyyəti, tarixi, ölkəmizdə polyak izləri, Azərbaycan ailəsi və s. mövzular haqqında ətraflı məlumat veriləcək, şəhərimizin görməli yerlərinə gəzintilər təşkil olunacaqdır. Azərbaycanlı şagirdlərin Polşaya səfəri isə 2013-cü il avqust ayında nəzərdə tutulub.

Azərbaycandan Polşaya səfər edəcək şagird və müəllim heyəti üçün nəzərdə tutulan “Meşə mirvarisi” istirahət mərkəzi ilə tanışlıq səmərəli olmuşdur. Nadajın şəhərinin meri bildirmişdir ki, müasir standartlara cavab verən istirahət mərkəzində Azərbaycandan gələcək müəllim və şagird heyəti üçün hər cür əlverişli şərait yaradılacaq.

Xəzər Rayon İcra Hakimiyyətinin başçısı Gülağa İslamov vida mərasimində Nadajın şəhərinin rəhbərliyinə minnətdarlığını bildirmiş, uğurla başa çatan səfərin qardaşlaşma haqqında bir il öncə iki şəhər arasında imzalanan müqaviləyə uyğun olduğunu vurğulamışdır.

Telman ƏLİYEV

Xalq qəzeti.- 2013.- 22 may.- S. 6.