AMİ-nin Qazax filialı müsabiqənin qalibidir

Son vaxtlar Azərbaycan Müəllimlər İnstitutu Qazax filialının müəllim-tələbə kollektivi bir-birindən maraqlı, rəngarəng tədbirlər təşkil etməklə təkcə bu ali məktəbin deyil, bütövlükdə Qazax rayon ictimaiyyətinin diqqətini cəlb etməyə başlayıb.

Filialda yeni il, novruz şənlikləri, bir sıra əlamətdar hadisələr, maraqlı kompozisiyalar, sərgilər, müsabiqələr, yarışlar şəklində təşkil olunur və bir növ ideoloji işin mühüm istiqamətlərindən birinə çevrilir.

Bütün bunları kollektivdə filialın direktoru, dosent Afaq Qasımovanın təşkilatçılığı, təşəbbüskarlığı kimi qiymətləndirirlər. A.Qasımova isə bizimlə söhbətində bildirdi ki, Azərbaycan Müəllimlər İnstitutunun rektoru Aqiyə Naxçıvanlı və rayon icra hakimiyyətinin başçısı Ayaz Əsgərovun kollektivə diqqət və qayğısı, köməyi bizim də fəallığımızı artırıb. Artıq ötən qışdan ən böyük problem olan istilik problemi həll olunub. Gözəl bir idman zalı istifadəyə vermişik. Filialın ilk dəfə yeməkxanası təşkil olunub, həyət-bacada səliqə-sahman yaradılıb, çoxlu ağac, gül-çiçək kolları əkilib. Hələ qabaqda görüləsi işlərimiz çoxdur.

Bu günlərdə filialın kollektivi daha bir sevincli günlərini yaşayıb. Qazax rayonunda ulu öndər Heydər Əliyevin 90 illik yubileyi ilə əlaqədar keçirilən tədbirlərdə, xüsusilə gül bayramında keçirilən müsabiqədə birinci yeri tutaraq rayon icra hakimiyyətinin qiymətli hədiyyələrini almışdır.

Hamlet QASIMOV

Xalq qəzeti.- 2013.- 23 may.- S. 6.