“Almaniya bir rəssamın gözü ilə”

Almaniya Federativ Respublikasının Bakıdakı səfirliyinin təşkilatçılığı ilə Azərbaycan Dovlət Rəssamlıq Akademiyası, “Qız Qalası” İncəsənət Qalereyası, “Berlin-Bakı” Rəsm Qalereyası, Kapital Bank və “Standard İnsurance” ilə birlikdə Alman-Azərbaycan Mədəniyyət Birliyi tərəfindən “Kapellhaus”da “Almaniya bir rəssamın gözü ilə” adlı sərgi açıldı.

Açılış mərasimində çıxış edən Almaniya Federativ Respublikasının Azərbaycandakı səfirinin müavini Volfqanq Mössinger dedi ki, 2007-ci ildən etibarən Azərbaycanın gənc rəssamları bu müsabiqədə iştirak edir və onların əsərlərinin sərgisi keçirilir. Bu gün artıq 6-cı sərgi təşkil olunur. Bu sərgidə 38 əsər nümayiş olunur. Bu rəsmlərin arasından ən yaxşıları seçilir və 3 qalib təltif olunur. Bu vaxta qədər keçirilən sərgilərdə 300-dən çox gənc rəssam iştirak etmişdir. Sərgi Azərbaycan cəmiyyətində çox böyük marağa səbəb olmuşdur. Hər il olduğu kimi, sərgi eyni mövzuya həsr olunur: “Almaniya bir rəssamın gözü ilə”. Yenə də həmişəki kimi böyük maraqla qarşılanan sərgidə çoxsaylı azərbaycanlı rəssamların əsərləri təqdim olunur. Bütün sponsorlarımıza və münsiflər heyətinin üzvlərinə minnətdarlıq edirik”.

Azərbaycan Rəssamlıq Akademiyasının professorları Fəridə Məmmədova və Səlhab Məmmədov gənc rəssamların sərgiyə təqdim olunan əsərləri barədə fikir, düşüncə və rəylərini bildirdilər. Qeyd olundu ki, bu gün beynəlxalq bayramdır. Gənc rəssamların sərgidə təqdim olunan əsərlərinin mövzuları ölkələrin birliyinə, yəni dünyanın xoşbəxtliyi, əmin-amanlığına həsr olunmuşdur. Bu rəsmlərdə dostluq başlıca yer tutur, deməli yaxın dostluq olan yerdə xoş məram, təbəssüm, razılıq, sülh vardır. Bu əsərlər fəlsəfi məna daşıyır, hər şey dostluq körpüləri əsasında yaranır.

Sərgi başlayandan gənc rəssamlar Almaniyanın üçrəngli bayrağının rəmzi olaraq qrafika və yağlı boya ilə öz rəsmlərində həmin rənglərdən istifadə edirlər. Müsabiqədə birinci, ikinci, üçüncü yerləri tutanlar Almaniyaya bir həftəlik səyahətə gedir, muzeyləri, qalereyaları gəzir və incəsənət universitetində qonaq olurlar. Ölkənin mədəniyyəti və incəsənəti ilə yaxından tanış olur, Almaniya ilə Azərbaycan arasında gənc sənətkarların dostluğu möhkəmlənir, gənclərin dünyagörüşü genişlənir. Ölkələrimiz arasında böyük bir körpü yaranır, gələcəkdə bu gənc rəssamlar sərgilərdə görüşürlər, dostluq edirlər. Bu müsabiqə və sərginin təşkilində sponsorların hamısının köməyi çoxdur. Səfirliyə və sponsorlara minnətdarlıq edirik.

Sonda müsabiqənin qalibləri elan edildi: birinci yerə Xəyalə Yusifova, ikinci yerə Taleh Mirkazımov, üçüncü yerə Tural Eminli layiq görüldülər. Onlara səfirliyin mükafatları təqdim olundu.

Sərgi iyun ayının 10-dək davam edəcək.

A.SADIQOĞLU

Xalq qəzeti.- 2013.- 24 may.- S. 5.