Binəqədi rayonunda Respublika Günü münasibətilə tədbir keçirilmişdir

Binəqədi rayonunda ictimaiyyət nümayəndələrinin iştirakı ilə Respublika Günü qeyd edildi. Azərbaycan Respublikasının dövlət himninin səsləndirilməsi ilə başlanan tədbirdə rayon icra hakimiyyəti başçısının müavini Vüsal İsmayılov çıxışında 1918-ci ildə Şərqdə ilk demokratik respublika olan Azərbaycan Xalq Cümhuriyyətinin ölkədə elan edilməsini vurğuladı, eyni zamanda həmin respublikanın cəmi 23 ay ömür sürə bildiyini və xarici qüvvələrin təcavüzü nəticəsində süquta uğradığını bildirdi.

Natiq xatırlatdı ki, bu hadisədən sonra təqribən 70 il ərzində SSRİ-nin tərkibində mövcudluğunu davam etdirmiş Azərbaycan, nəhayət, 1991-ci ildə dövlət müstəqilliyini bərpa etməyə nail oldu. V. İsmayılov daha sonra müstəqilliyin bərpasının ilk illərində Azərbaycanın qarşılaşdığı siyasi və sosial-iqtisadi çətinliklərdən, siyasi sistemin dəyişməsi və planlı iqtisadiyyatdan azad bazar iqtisadiyyatına keçidin ağrı-acılarından danışdı. O, Ermənistan-Azərbaycan, Dağlıq Qarabağ münaqişəsinin əsas səbəblərini nəzərə çarpdırdı, müharibə nəticəsində Azərbaycanın torpaqlarının 20 faizinin işğal edildiyini, bir milyondan çox azərbaycanlının qaçqın və məcburi köçkün vəziyyətinə düşdüyünü bildirdi. Bütün bu təlatümlərə və çətinliklərə sinə gərərək Azərbaycanı qaranlıq gecədən aydın sabaha aparmağa qadir ümummilli lider Heydər Əliyevin yalnız hakimiyyətə qayıdışından sonra ölkəmiz müstəqilliyini qoruyub saxlaya bildi, Ermənistanla atəşkəsə nail olunub işğal edilmiş ərazilərin dinc yolla qaytarılması istiqamətində sülh danışıqlarına başlanıldı, geniş miqyaslı sosial-iqtisadi islahatlara start verildi.

Bu gün Azərbaycanın əldə etdiyi nailiyyətləri, aparılmış islahatları, iqtisadi inkişafı düzgün müəyyənləşdirilmiş strateji kursun bəhrəsi adlandıran RİH başçısının müavini həmin siyasətin Prezident İlham Əliyev tərəfindən uğurla davam etdirildiyini vurğuladı.

Hazırda Azərbaycanda qazanılan nailiyyətlərdən danışan V. İsmayılov bildirdi ki, ölkəmizin gələcək milli inkişaf siyasətinin əsas və uzunmüddətli perspektivləri ilə bağlı vahid konsepsiyanın hazırlanması, strateji inkişafın gələcək istiqamətlərinin prinsip və vəzifələrinin müəyyənləşdirilməsi müasir Azərbaycan dövlətinin qarşısında dayanan əsas vəzifələrdən biri hesab olunur. Azərbaycan Respublikası Prezidentinin “Azərbaycan 2020: gələcəyə baxış” İnkişaf Konsepsiyasının hazırlanması barədə" 2011-ci il 29 noyabr tarixli xüsusi sərəncamı məhz bu məsələni qarşıya mühüm vəzifə kimi qoyur.

Sonra tarix elmləri doktoru, professor Anar İsgəndərovun Azərbaycan Xalq Cümhuriyyətinin yaranması, fəaliyyəti və qazandığı uğurlar barədə məruzəsi dinlənildi. Alim əvvəlcə tədbir iştirakçılarını əlamətdar bayram münasibətilə təbrik etdi, 28 May gününün Azərbaycan xalqının tarixinə parlaq səhifə kimi əbədi daxil olduğunu bildirdi. Qeyd etdi ki, 95 il bundan əvvəl, 1918-ci il mayın 28-də Azərbaycan xalqının tarixində çox əlamətdar bir hadisə baş vermişdir. Məhz həmin gün İstiqlal bəyannaməsi qəbul olunmuş, Şərqdə ilk demokratik dövlət olan Azərbaycan Xalq Cümhuriyyəti elan edilmişdir. Artıq 22 ildir ki, xalqımız müstəqil və azad şəraitdə ilk demokratik dövlətin yaranması gününü böyük təntənə və iftixar hissi ilə qeyd edir. Əsrlər boyu müstəqillik, milli azadlıq həsrətində olan xalqımızın ilk demokratik respublikası çox az bir müddət, cəmi 23 ay yaşamasına baxmayaraq, onun fəaliyyət dövrü milli dövlətçilik tariximizin ən yaddaqalan mərhələlərindən biri olmuşdur.

A. İsgəndərov ilk demokratik hökumətin mövcud olduğu qısa zamanda həyata keçirilən taleyüklü islahatlardan danışaraq müstəqil Azərbaycan dövlətinin formalaşıb möhkəmlənməsi üçün görülən misilsiz işləri qeyd etdi. Bildirdi ki, parlament respublikası olan Azərbaycan həmin dövrdə Şərqdə ilk dəfə qadınlara seçki hüququ vermiş, Azərbaycan dili isə dövlət dili elan olunmuşdur.

Natiq 1991-ci ildə yenidən öz dövlət müstəqilliyinə qovuşan Azərbaycanın daha da inkişaf edərək dünya dövlətləri arasında öz layiqli yerini tutmasında ümummilli liderimiz Heydər Əliyevin tarixi xidmətlərini önə çəkdi, Prezident İlham Əliyevin rəhbərliyi ilə qazanılan uğurlar barədə danışdı. Xatırlatdı ki, 1980-ci illərin sonu 1990-cı illərin əvvəllərində SSRİ-nin süqutunun qarşısıalınmaz prosesə çevrilməsi, beynəlxalq aləmdə yaranan əlverişli tarixi şərait, bölgədə cərəyan edən mərkəzdənqaçma meyillərinin vüsət alması, Ermənistan-Azərbaycan münaqişəsi və Dağlıq Qarabağ probleminin həllində o zamankı sovet rəhbərliyinin ermənipərəst mövqeyi, ermənilərin yaranmış boşluqdan bəhrələnərək Azərbaycan torpaqlarını bir-birinin ardınca işğal etməsi və s. hadisələr Azərbaycanda azadlıq hərəkatına rəvac verdi. Azərbaycan öz müstəqilliyini elan etdi. 1991-ci il oktyabrın 18-də respublika Ali Sovetində müstəqillik haqqında Konstitusiya aktı qəbul edildi. Lakin həmin dövrdə respublikaya rəhbərlik edən şəxslərin idarəçiliyinin zəifliyi, siyasi mübarizənin milli vətəndaş qarşıdurması müstəvisinə keçməsi, iqtisadi-siyasi sosial böhranın getdikcə dərinləşməsi Azərbaycanı ciddi təhlükə ilə üz-üzə qoydu, əhalinin gələcəyinə, müstəqil dövlətçiliyinə inamını sarsıtdı.

Ulu öndərimiz müstəqil Azərbaycan dövlətinin sükanı arxasına keçəndən sonra ölkənin milli ruhlu, qlobal düşüncəli və dövlət təfəkkürlü vətəndaşlarını, bütün sağlam qüvvələri ətrafına toplayaraq dövlətin məqsəd və vəzifələrini müəyyənləşdirdi, keçmiş sosialist sistemindən yeni hüquqi dövlət quruluşuna, çoxmülkiyyətli iqtisadiyyata, demokratik normalara və siyasi plüralizmə əsaslanın vətəndaş cəmiyyəti modelinə keçidinin konseptual əsaslarını yaratdı və 1995-ci ildə qəbul olunmuş ölkə Konstitusiyasına daxil etdi.

Dahi şəxsiyyətin milli inkişaf siyasətindən danışan A. İsgəndərov bildirdi ki, demokratik normaları özündə əks etdirən adı çəkilən Konstitusiyanın qəbulu, çoxpartiyalı sistemin bərqərar olunması, onun əsasında ilk parlament seçkilərinin keçirilməsi və demokratik parlament yaradılması, mətbuat və informasiya üzərində bütün dövlət tənzimləyici mexanizmlərinin və senzuranın ləğvi həm milli inkişafı sürətləndirdi, həm də ölkənin dünyadakı demokratik imicini formalaşdıraraq beynəlxalq ictimaiyyətə onunla daha geniş əməkdaşlığa ruhlandırdı.

Ümummilli liderimizin zəngin dövlətçilik təcrübəsi barədə danışan A. İsgəndərov qeyd etdi ki, ulu öndərin müstəqillik dövrünün 1993-2003-cü illəri əhatə edən keçid mərhələsində Azərbaycanın milli inkişaf siyasətinin həm nəzəri əsaslarını qoydu, həm də onu praktiki şəkildə reallaşdıraraq dövlət müstəqilliyinin dönməzliyini təmin etdi. Heydər Əliyevin milli inkişaf təlimi Azərbaycandakı bütün sonrakı proseslərin təməlində dayanır və bundan sonra da dayanacaqdır.

2003-cü ildə Azərbaycan Respublikasının Prezidenti seçilən İlham Əliyev ümummilli lider Heydər Əliyevin müəyyənləşdirdiyi və 1993-2003-cü illərdə həyata keçirdiyi milli inkişaf siyasətinin heç bir alternativi olmadığını, bu strateji inkişaf kursunun bundan sonra da dönmədən davam etdiriləcəyini birmənalı şəkildə bəyan etmişdir.

A. İsgəndərov Prezident İlham Əliyevin apardığı siyasət nəticəsində bu gün müasir Azərbaycanın dinamik inkişaf etdiyini, dünyanın öndə gedən ölkələrindən birinə çevrildiyini bildirdi.

Natiq çıxışının sonunda Azərbaycanın dünya ölkələri sırasında öz layiqli yerini tutduğunu, regionun vacib və strateji əhəmiyyət kəsb edən dövlətinə çevrildiyini, beynəlxalq əhəmiyyətli layihələrin gerçəkləşdirilməsinə misilsiz töhfələr verdiyini bir daha xatırlatdı, yaxın gələcəkdə bu uğurların daha da artırılması istiqamətində məqsədyönlü iş aparıldığını diqqətə çatdırdı.

Sonra tədbir geniş konsert proqramı ilə davam etdirildi. Tanınmış incəsənət ustalarının ifasında səslənən xalq mahnıları, bəstəkarların əsərlərindən parçalar iştirakçılar tərəfindən alqışlarla qarşılandı.

Vaqif BAYRAMOV

Xalq qəzeti.- 2013.- 26 may.- S. 4.