MASALLIDA BİR GÜN

Gözəl bir may günü cənub bölgəsinin gözəl şəhəri Masallıya getmişdik. Gördük ki, bir çox yerində abadlıq-quruculuq işləri görülür, böyüyüb gözəlləşən rayon mərkəzində əsl canlanma hiss olunur. Əsaslı təmirdən sonra yeni görkəmdə gözlər önündə sərgilənən icra hakimiyyəti aparatının binası, qarşı yöndə yaradılmış gözəl meydan diqqət çəkir.

Bayraq Meydanı, “Qəhrəmanlar parkı”, yaxın küçələrdə naxışlı hasarların, səkilərin tikilməsi, yolların asfaltlaşdırılması fərəh doğurur. Yeni meydanın ətrafında landşafta uyğun dekorativ ağaclar, bəzək kolları əkilib. Yaşıllıqların çoxaldılması bu yerlərin gözəlliyini artırır.

Yeri gəlmişkən, bu ilin mart ayından Masallı daha rayon əhəmiyyətli şəhər sayılmır. Prezident İlham Əliyevin imzaladığı sərəncamla rayonun inzibati ərazi bölgüsündə qismən dəyişiklik edilməsi barədə Azərbaycan Respublikası Qanununun tətbiqinə start verilib. Ətraf ərazilərdən yüzlərlə hektar torpaq sahəsi Masallı şəhərinin inzibati ərazisinə birləşdirilir. Bu isə o deməkdir ki, şəhərin abadlığına indən belə daha çox fikir veriləcək, infrastruktur genişlənəcək, müasirləşdiriləcək. Hər il beynəlxalq folklor festivallarının, mötəbər idman yarışlarının keçirildiyi bir bölgə üçün bu, xüsusilə önəmlidir.

Bəxtimizdən həmin gün Masallıda tədbirlər bolluğuna düşdük. Dostlardan biri dedi ki, əslində, iki-üç aydır, demək olar, hər gün rayonun həyatında belə qələbəlik olur. Ulu öndər Heydər Əliyevin 90 illik yubileyi münasibətilə çeşidli və maraqlı tədbirlər bir-birini əvəz edir. Təntənələr davamlı xarakter daşıyır.

Öncə rayonun yuxarı ormanlıq ərazisində “Turizm sərgisi” başlandı. Günəşli bir gün idi və gözəlliklər işım-işım gülümsəyirdi. Məlum olduğu kimi, Masallı ölkəmizin tanınan turizm məkanlarından biridir. Buranın təbii gözəllikləri yurdun zövq sahibi olan vətənpərvər övladlarının zəhməti ilə daha da artırılıb, adamların istirahəti üçün hər cür şərait yaradılıb. Neçə-neçə turizm-istirahət mərkəzi rəsmi lisenziya alıb. Meşə gəzintiləri, Yardımlı şəlaləsinə, Lənkərana, Lerikə səyahətlər, balıqçılıq, atçılıq və sair özəl əyləncələr üçün zəruri imkanlar yaradılıb. Yerli mətbəxin gözəl təamları qonaqlara təmtəraqla təqdim olunur. Təkcə ötən il 17850 nəfər turist Masallıdakı istirahət bazalarında həvəslə dincəlib.

“Nağıl dünyası” adlanan istirahət mərkəzində mövsüm açılışına həsr olunan turizm sərgisi sayca üçüncüdür. Burada əksər turizm obyektlərinin fərqli imkanları nümayiş etdirilirdi. Musiqi sədaları ətrafa yayılırdı. Rayon rəhbərliyi, qonaqlar sərgi ilə yaxından tanış oldular. Obyektlərin şəraiti barədə məlumatlar, sənətkarların əl işləri, ləziz yemək nümunələri, uğurları əks etdirən sənədlər və fotoşəkillər hər kəsdə maraq doğurdu. “İstisu”, “Baba bulağı”, “Cənnət bağı” və sair mərkəzlər sərgidə layiqincə təmsil olunmuşdu.

Rəsmi hissədə öncə rayon mədəniyyət və turizm şöbəsinin müdiri, əməkdar mədəniyyət işçisi Lətifə Mövsümova çıxış etdi. O dedi ki, Masallıda 28 turizm obyekti fəaliyyət göstərir. Hər gün 1200 nəfərin istirahəti üçün şərait var. Qonaqlara üç istiqamətdə marşrutlar üzrə xidmətlər təklif olunur. Buraya əsasən rayonun zəngin təbiəti, flora və faunası, tarixi abidələri daxildir.

“Viləş Otel”in baş direktoru Səbinə İsmayıllı dedi ki, Masallı, doğrudan da, nağıl misallıdır. “Buraya gəldiyim bir ildə rayonla, adamları ilə xeyli doğmalaşmışam. Dövlətin qayğısı sayəsində turizmi inkişaf etdirir və Masallını tanıtmağa çalışırıq. Rayon rəhbərliyi də bizə köməkliyini əsirgəmir”.

Masallı Rayon İcra Hakimiyyətinin başçısı Rafil Hüseynov yeni turizm mövsümünün açılışı münasibətilə bütün iştirakçıları təbrik etdi. Regional inkişaf üzrə Dövlət Proqramının verdiyi imkanların fərəhli nəticələrindən danışdı. “Diyarın təbii gözəllikləri turistlərin cəlb edilməsi üçün yetərli deyil. Gərək nümunəvi mətbəx, səviyyəli xidmət və reklam da olsun. Bu yöndə səylər gücləndirilməlidir ki, qonaq qəbulu imkanları artsın, turist axını güclənsin, Masallının gələcəyi məhz turizm gəlirləri hesabına təmin edilsin. Hər bir turizm obyektinə mövsüm boyu bol müştəri qəbul etməyi arzulayıram”.

Sonra rayonun bədii kollektivləri maraqlı konsert proqramı təqdim etdilər.

Bir qədər sonra Masallı şəhərindəki Gənclər Mərkəzində “Ümummilli lider Heydər Əliyevin azərbaycançılıq məfkurəsinin gənclərin vətənpərvərlik tərbiyəsində rolu” mövzusunda konfrans oldu. Xatırladaq ki, ötən il martın 13-də bölgəyə səfəri zamanı Azərbaycan Prezidenti cənab İlham Əliyev bu mərkəzin açılışında şəxsən iştirak etmiş və bölgə gənclərinin nümayəndələri ilə görüşmüşdü. Görüşdə"Azərbaycan Gəncliyi" Proqramının icrasından, gənclərin vəzifələrindən bəhs edilmişdi. Dövlət başçısı sabahımızın sahiblərinə tövsiyə və tapşırıqlarını da vermişdi.

Konfrans iştirakçıları əvvəlcə ulu öndərin Masallı şəhərindəki möhtəşəm abidəsini ziyarət edərək önünə gül dəstələri qoydular.

Tədbiri Azərbaycan Respublikası Gənclər və İdman Nazirliyinin məsul əməkdaşı Əli Məmmədov açaraq mövzu ilə bağlı fikirlərini bölüşdü. Gənclərimizin seçdiyi ideoloji yolun üstün aspektlərini açıqladı.

Rayon gənclər və idman idarəsinin rəisi Camal Manafov ideyanın önəmi barədə danışaraq mədəniyyətlərarası dialoqda, dövlətçilik ənənələrinin qorunub gələcək nəsillərə ötürülməsində əvəzsiz rolunu nəzərə çatdırdı.

Dəmirçi kənd orta məktəbinin direktoru Aytən Şükürova, Ərkivan kənd orta məktəbinin direktoru Üzeyir Şükürov, Qəriblər kənd məktəbinin müəllimi Kənan Haşımov milli dövlətçiliyin təməlinin azərbaycançılıq məfkurəsi ilə möhkəmləndirilməsindən bəhs etdilər.

Masallı Rayon İcra Hakimiyyəti başçısının müavini Nəsir Muxtarlı Gənclər və idman nazirliyinin təşəbbüsü ilə keçirilən konfransın önəmini dəyərləndirərək dedi ki, mllətin ömrü onun mənəviyyatının, məfkurəsinin ömrü qədərdir. Bu məfkurə dövlətə bağlılığın, sədaqətin gösrəricisidir. Strateji bir xəttdir. Natiq həmçinin məfkurə banisi Heydər Əliyevin 90 illik yubileyi ilə bağlı davam edən tədbirlər haqqında danışdı.

Sonra təkliflər səsləndi. Konfransı yekunlaşdıran Əli Məmmədov daim fəallıqları ilə seçilən Masallı gənclərinə uğurlar dilədi.

Əli NƏCƏFXANLI

Xalq qəzeti.- 2013.- 26 may.- S. 6.