Düşənbədə Azərbaycanın 28 May – Respublika Günü münasibətilə bayram tədbiri keçirilmişdir

Azərbaycanın Tacikistandakı səfirliyi Düşənbədəki “Hyatt Regency” mehmanxanasında 28 May - Respublika Günü münasibətilə rəsmi qəbul keçirmişdir.

Mərasimin əvvəlində Azərbaycanın və Tacikistanın dövlət himnləri səslənmişdir.

Qəbulda Tacikistanın dövlət və hökumət strukturlarının nümayəndələri, deputatlar, səfirlər və beynəlxalq təşkilatların təmsilçiləri, elm, mədəniyyət və incəsənət xadimləri, Azərbaycan diasporunun üzvləri, jurnalistlər iştirak etmişlər.

Azərbaycan Tacikistandakı səfiri Abbasəli Həsənov qonaqları salamlamış, onları bayram münasibətilə təbrik etmişdir.

Səfir Azərbaycan Xalq Cümhuriyyətinin (AXC) yaranması və fəaliyyəti haqqında danışmış, AXC-nin xalqımızın taleyində önəmli yer tutduğunu vurğulamışdır. Bildirmişdir ki, 1918-ci ilin mayın 28-də Şərqdə ilk demokratik respublika olan AXC yaradılmış, cəmi 23 ay yaşamasına baxmayaraq qısa müddət ərzində böyük işlər görmüşdür. Təəssüf ki, çox keçmədən AXC xarici təcavüzə məruz qalmış və Azərbaycan öz dövlət müstəqilliyini itirmişdir. Diplomat bildirmişdir ki, bu il Azərbaycan xalqı və dövləti AXC-nin yaranmasının 95, ümummilli lider Heydər Əliyevin anadan olmasının 90 illiyini qeyd edir. Biz ulu öndərin 90 illiyi ilə əlaqədar silsilə tədbirlər keçirmişik.

A.Həsənov qeyd etmişdir ki, keçmiş SSRİ dövründə sovet rəhbərliyi tərəfindən müxtəlif vaxtlarda Azərbaycanın tarixi torpaqları hissə-hissə alınaraq Ermənistana birləşdirilmişdir. 1991-ci il oktyabrın 18-də Azərbaycan xalqı müstəqilliyini yenidən bərpa etmişdir.

Səfir diqqətə çatdırmışdır ki, Azərbaycan Xalq Cümhuriyyətinin varisi olan dövlətimizin inkişafı, müstəqilliyin qorunub saxlanılması və möhkəmləndirilməsi ümummilli lider Heydər Əliyevin adı ilə bağlıdır. Ulu öndərin 1993-cü ildə Azərbaycanda yenidən hakimiyyətə qayıdışından sonra xalqımız müstəqilliyin ilk illərində üzləşdiyi təhlükələrdən xilas olmuş, bütün sahələrdə islahatlara başlanılmışdır.

Bildirilmişdir ki, bu gün Azərbaycan Prezidenti İlham Əliyev ulu öndərin siyasətini uğurla davam etdirir. Dövlətimizin başçısının apardığı məqsədyönlü siyasət nəticəsində Cənubi Qafqaz ölkələrinin iqtisadiyyatının 80 faizi Azərbaycanın payına düşür. “Əsrin müqaviləsi” adlandırılan Bakı-Tbilisi-Ceyhan əsas ixrac neft, Bakı-Tbilisi-Ərzurum qaz kəməri uğurla fəaliyyət göstərir.

Səfir, həmçinin tikintisi başa çatmaqda olan Bakı-Tbilisi-Qars layihəsi haqqında da məlumat vermişdir. Diplomat Azərbaycan - Tacikistan əlaqələrinin inkişafından da danışmışdır.

Tacikistanın xarici işlər naziri Xamraxon Zərifi Respublika Günü münasibətilə Azərbaycan xalqını təbrik etmişdir. Bildirmişdir ki, Azərbaycan Tacikistanın etibarlı tərəfdaşdır. Tacikistan Prezidenti Emomali Raxmonun ötən ilin iyulunda Azərbaycana rəsmi səfəri zamanı imzalanmış sənədlərin həyata keçirilməsi istiqamətində real iş gedir. Qeyd olunmuşdur ki, bu ilin mart ayında Düşənbə-Bakı Düşənbə birbaşa hava xəttinin açılması çox diqqətəlayiq haldır və bu addım iki ölkə arasında ticarət dövriyyəsinin artmasına, eləcə də sahibkarlar arasında əməkdaşlığın genişlənməsinə xidmət edəcəkdir.

Azərbaycandan dəvət olunmuş muğam ifaçıları Aytən Məhərrəmova və Vüqar Musayev muğam, xalq və bəstəkar mahnılarını məharətlə ifa etmiş, onların çıxışları alqışlarla qarşılanmışdır. İfaçıları tarda Ədalət Behbudov, kamançada Pərviz Fərhadov müşayiət etmişlər. Tacikistan Milli Konservatoriyasının müəllimi, ölkəmizdə keçirilmiş Beynəlxalq Muğam Festivalının iştirakçısı olmuş Xurşed İbrahimov azərbaycanlı musiqiçilərlə birgə “Qarabağ şikəstəsi”ni ifa etmişdir.

Tədbir iştirakçılarına 28 May - Respublika Günü ilə bağlı Azərbaycan, rus, ingilis və tacik dillərində hazırlanmış məlumatlar toplusu, həmçinin Azərbaycanın tarixi, mədəniyyəti, incəsənəti və turizm potensialını əks etdirən buklet və kitabçalar paylanmışdır. Məlumatlar toplusu Düşənbədəki səfirlik və nümayəndəliklərə də göndərilmişdir. Sonra iştirakçılar üçün ziyafət verilmişdir.

Qulu KƏNGƏRLİ

Xalq qəzeti.- 2013.- 26 may.- S. 3.