Ölkə əhalisinin “mavi yanacaq”la

təminatı yaxşılaşdırılır

Son illər ölkəmizdə geniş infrastruktur layihələri həyata keçirilir ki, bu da əhalinin sosial-məişət şəraitinin getdikcə yaxşılaşdırılmasına imkan yaradır. Təkcə onu qeyd etmək kifayətdir ki, ölkə əhalisinin elektrik enerjisi, qaz, içməli su ilə təminatı əsaslı şəkildə yaxşılaşmış və bu istiqamətdə işlər hazırda da sürətlə davam etdirilir.

Əhalinin “mavi yanacaq”la təminatı istiqamətində görülən işlər də bu baxımdan diqqəti cəlb edir. Təsadüfi deyil ki, Nazirlər Kabinetinin 2013-cü ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında ölkə Prezidenti İlham Əliyev bu vacib məsələyə toxunaraq demişdir: “Qazlaşdırma Azərbaycanda təxminən 90 faizə yaxındır. Son illərdə bütün şəhərlər qazlaşdırılıbdır. Bu da hesab edirəm ki, tarixi nailiyyətdir... Kəndlərin əksəriyyətində qazlaşdırma işləri təşkil edilibdir. Ancaq hələ ki, qaz almayan kəndlər də vardır. Mən daim bu məsələlərə nəzarət edirəm. Əminəm ki, bir il, maksimum iki il ərzində əksər kəndlərimizə təbii qazın verilməsi təmin ediləcəkdir”.

Xatırladaq ki, dövlət başçısı İlham Əliyev tərəfindən təsdiq olunmuş “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı” və “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”nda paytaxtda və bölgələrdə qazlaşdırma ilə bağlı konkret tədbirlər nəzərdə tutulmuşdur. Həmin tədbirlərin icrası ilə bağlı mühüm işlər görən ARDNŞ-in “Azəriqaz” İstehsalat Birliyi 2013-cü ilin doqquz ayını da yüksək nailiyyətlərlə başa vurmuşdur. Belə ki, bu dövrdə əhalinin və digər istehlakçıların normal və təhlükəsiz qaz təchizatının təmin olunması, yaşayış məntəqələrinin qazlaşdırılması və qaz təminatının bərpası, qaz təchizatı şəbəkəsinin əsaslı təmiri istiqamətində mühüm işlər görülmüşdür. Bu da ölkə Prezidenti İlham Əliyevin qazlaşdırılma barədə tapşırığının uğurla yerinə yetiriləcəyinə inamı daha da möhkəmləndirmişdir.

Əvvəlki illərdə olduğu kimi, hazırda da ölkənin qaz təsərrüfatının inkişafı istiqamətində genişmiqyaslı tədbirlər həyata keçirilir, istismar müddəti başa çatmış müxtəlif diametrli qaz kəmərləri təmir-bərpa edilir, həyətlərdə olan qaz xətləri küçəyə çıxarılır və onların üzərində sayğacların quraşdırılması işləri davam etdirilir. Qaz itkilərinin azaldılması məqsədilə əhali istehlakçılarının mənzillərində istismar edilən istismar müddəti başa çatmış mexaniki sayğaclar yeni “smart-kart” tipli sayğaclarla əvəz olunur, sayğacsız təbii qazdan istifadə edən abonentlərin mənzillərinə yeni sayğaclar quraşdırılır, istismara yararsız vəziyyətdə olan qaz tənzimləyiciləri yeniləri ilə əvəz edilir. Bundan əlavə, qaz şəbəkəsində səmərəli texnika və texnologiyanın tətbiq edilməsinin əhatə dairəsi genişləndirilir.

Bütün bu işlərin nəticəsidir ki, cari ilin 1 oktyabr tarixinə ölkə üzrə təbii qazla təmin olunan abonentlərin sayı 1milyon 580 min 474-ə çatmışdır ki, bunun da 1 milyon 561 min 399-u əhali, 19 min 75-i isə qeyri-əhali abonentidir. Həmin abonentlərin 684 min 154-ü Bakı şəhəri, 896 min 320-si isə regionların payına düşür. 2013-cü il sentyabrın 1-nə olan məlumata əsasən, əhali abonentlərinin mənzillərində 793 min 383 ədəd “smart-kart” tipli sayğac quraşdırılmışdır. Yeri gəlmişkən, “smart-kart” tipli qaz sayğaclarının əhatə dairəsinin genişlənməsi və ödənişlərlə bağlı əməliyyatların artması ilə əlaqədar yarana biləcək texniki problemlərin qarşısını almaq məqsədilə əsaslı yeniliklər tətbiq edilmiş, bu sahədə müvafiq islahatlar aparılmışdır. Kütləvi ödənişlərin artması daha güclü proqram təminatına ehtiyac yaratdığından mart ayından etibarən yenilənmiş proqram təminatının tətbiqinə başlanılmışdır. Bu isə təxminən 1 milyon abonentə keyfiyyətli xidmət göstərməyə imkan verəcəkdir.

“Azəriqaz” İstehsalat Birliyinin ən mühüm fəaliyyət istiqamətlərindən biri də yaşayış məntəqələrinin qazlaşdırılmasıdır. Birliyinin fəaliyyətə başladığı 2009-cu ildən ötən dövrdə ölkə üzrə qazla təmin olunmuş yeni əhali abonentlərinin sayı təqribən 400 mini keçmişdir. Bununla yanaşı, cəbhə bölgələrinə yaxın yaşayış məntəqələrinin və sərhəd rayonlarının qazlaşdırılmasına da xüsusi diqqət yetirilmiş, Ağdam və Qazax rayonlarının qazlaşdırılması tam başa çatdırılmışdır.

Cari ilin ötən dövründə də paytaxt Bakıda, eləcə də regionlarda qazlaşdırma ilə bağlı tədbirlər davam etdirilmişdir. Belə ki, “2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”na uyğun olaraq paytaxtın Xəzər, Sabunçu, Qaradağ və Suraxanı rayonlarının qaz təchizatının yaxşılaşdırılması, qaz kəmərlərinin və məişət qaz sayğaclarının fərdi həyətlərdən çıxarılması, qaz kəmərlərinin yenidən qurulması məqsədilə 201,2 kilometr boru xətti quraşdırılmışdır. Qeyd etdiyimiz kimi, dövlət başçısının müvafiq tapşırığına əsasən bu iş bölgələrdə də intensiv şəkildə davam etdirilmiş, bir sıra kənd və qəsəbələr “mavi yanacaq”la təchiz olunmuşdur. “Azəriqaz” İstehsalat Birliyindən aldığımız məlumata görə, cari ilin ötən doqquz ayında ölkə üzrə 6970,2 kilometr uzunluğunda yeni qaz kəmərləri çəkilmiş, 1018,3 kilometr uzunluğunda xətlər isə əsaslı təmir edilmişdir. Bütövlükdə isə 2013-cü ilin doqquz ayında ölkə üzrə 163 yaşayış məntəqəsi qazlaşdırılmış, təxminən 100 mindən artıq yeni əhali abonenti qazla təmin edilmişdir.

Yeri gəlmişkən, “Azəriqaz” İB-nin fəaliyyətə başladığı 2009-cu ildən ötən dövrdə ölkə üzrə 23 min 127,9 kilometr yeni qaz kəməri quraşdırılmışdır ki, bunun da 21 min 735,2 kilometri regionların, 1210 kilometri Bakı şəhərinin, 182,7 kilometri isə magistral kəmərlərin payına düşür. Hesabat dövründə ölkənin ayrı-ayrı regionları üzrə 2890,2 kilometr, Bakı şəhəri üzrə isə 3940,4 kilometr uzunluğunda qaz xətləri əsaslı təmir edilmişdir. Bundan əlavə, son beş ildə ölkə üzrə 141,6 kilometr uzunluğunda magistral qaz xətləri əsaslı təmir edilmişdir. Bu da dövlət başçısı İlham Əliyevin rəhbərliyi ilə ölkəmizdə həyata keçirilən uğurlu sosial siyasətin məntiqi nəticəsidir.

ARDNŞ-nin “Azəriqaz” İstehsalat Birliyində layihə-smeta sənədlərinin ekspertizası, razılaşdırılması və texniki şərtlərin hazırlanması sahəsi üzrə göstəricilər artmaqdadır. Belə ki, 2013-cü ilin yanvar-sentyabr aylarında layihə-konstruktor bürosu tərəfindən 3770 layihə-smeta sənədi hazırlanaraq birliyə və digər sifarişçilərə təhvil verilmişdir ki, bunun da 123-ü fərdi yaşayış evləri, 674-ü kənd və qəsəbələrin qazlaşdırılması, 804-ü obyektlərin təmiri, 2134-ü sənaye və kommunal, məişət obyektləri və qeyri-yaşayış sahələri, 35-i inzibati binalar, anbar binaları və s. tikinti işləri üzrədir. İlin ötən doqquz ayı ərzində 2290 fiziki və hüquqi şəxsin müraciəti əsasında hazırlanan qeyri-yaşayış sahəsinin (obyektlərin) layihə-smeta sənədləri razılaşdırılmışdır. Bundan əlavə, hesabat dövründə birliyin sifarişi ilə hazırlanmış 1446 layihə-smeta sənədi razılaşdırılmışdır.

Cari ilin yanvar-sentyabr aylarında birlik üzrə əmək şəraitinin yaxşılaşdırılması, əməyin mühafizəsi və təhlükəsizlik texnikası qaydalarına riayət olunması, işçilərin sağlamlığının qorunması, ekoloji qanunvericiliyə əməl edilməsi və beynəlxalq standartların tətbiq edilməsi istiqamətində də bir sıra təqdirəlayiq işlər görülmüşdür. Bu məqsədlə ayrı-ayrı struktur bölmələrdə əmək şəraitinin yaxşılaşdırılmasına yönəldilmiş tikinti işləri davam etdirilmiş, işçilər xüsusi geyim və fərdi mühafizə vasitələri ilə tam təmin olunmuş, idarəetmə aparatının aidiyyəti mütəxəssisləri tərəfindən yerlərdə aparılmış yoxlamalar zamanı aşkar edilmiş çatışmazlıqların aradan qaldırılması üçün zəruri tədbirlər görülmüşdür.

Mirbağır YAQUBZADƏ

Xalq qəzeti.- 2013.- 6 noyabr.- S.6.