Astara: gözəlliklərin ərsəyə gəldiyi məkan

Astara müstəqil Azərbaycanımızın “cənub qapısı”dır. Sərhəddən ölkəmizin ərazisinə qədəm qoyan hər kəsin diqqətini öncə əyalət şəhərinin əlvan mənzərələri çəkir. Sanki Astara üzə gülür. Təbəssüm saçan parklar, xiyabanlar, geniş meydanlar, boy-boya verən yaraşıqlı binalar yaddaşlara “gözəl xəttlə” silinməz təəssüratlar yazır. Rayonun füsunkar təbiəti isə bir başqa aləmdir. Ulu dağlar, qədim qalalar, zümrüd ormanlıqlar, məlhəm sular əsrarəngiz təsir bağışlayır. Bugünkü Astaranı şöhrətləndirən həm də övladlarının onun hüsnünə yeni naxışlar vurmaları, yurdun gözəlliklərini daha da artırmalarıdır.

Azərbaycan Prezidenti cənab İlham Əliyev sentyabrın əvvəllərində Astarada olan zaman dövləti fəaliyyətində şəxsən böyük önəm verdiyi və maliyyə vəsaitlərini əsirgəmədiyi quruculuq işləri ilə yaxından tanış olmuş və bu yöndə görülən tədbirləri təqdir etmişdir. Astaralılar dövlət başçısının rayona növbəti səfərinin unudulmaz təəssüratlarını yaşayırlar. Onlardan biri də gənc həkim Aytən Şiriyevadır.

-Möhtərəm cənab Prezidentimizi astaralılar adından salamlamaq şərəfi məhz mənə nəsib olduğu üçün özümü xoşbəxt hiss edirəm, -deyə o, ürək sözlərini bölüşdü. -Sevimli Prezidentimizə dedim ki, ötən il rayonumuza tarixi səfəriniz zamanı əsaslı təmir olunmuş Astara Rayon Mərkəzi Xəstəxanasının birinci korpusunun açılışını etmişdiniz. Əsaslı təmir edilmiş xəstəxanamız ən müasir tibbi avadanlıqla təchiz olunmuşdur. Bununla da biz tibb işçilərinə və bütün Astara əhalisinə böyük bir hədiyyə bəxş etmisiniz. İndi isə xəstəxanamızın ikinci korpusunu istifadəyə verirsiniz. Mən beş ildir ki, burada həkim kimi çalışıram. Uşaq həkimi olaraq çox sevinirəm ki, bu korpusda uşaqlarımıza yüksək səviyyədə xidmət edəcək poliklinika və stasionar şöbələr də vardır. İndi bu şəfa ocağında sakinlərimiz yüksək səviyyədə tibbi xidmət alacaqlar. Artıq sakinlərimiz müalicə və müayinə üçün uzağa getməyəcəklər.

Təkcə səhiyyə sferası deyil, həyatımızın bütün sahələri yüksək sürətlə inkişaf edir. Növbəti prezident seçkilərində yorulmaz fəaliyyəti, mətin iradəsi dövlətimizi xoşbəxt və parlaq gələcəyə aparan cənab İlham Əliyevə elliklə səs verdik. Biz ölkəmizin taleyini, öz taleyimizi cənab İlham Əliyevə ürəkdən etibar edirik. Prezidentimizlə fəxr edir və bundan qürur duyuruq!

Sözügedən tibb ocağının yenidən qurulmasına 2012-ci ilin mayında başlanılıb, bu ilin avqustunda başa çatdırılıb. Əsaslı yenidənqurma işlərinin aparılması, əlavə tibbi avadanlıq və inventarın alınması üçün Prezidentin Ehtiyat Fondundan 2 milyon manat vəsait ayrılmışdı. Yenidənqurma və təmir işlərinin görüldüyü ümumi sahə 10 min 674 kvadratmetrdir. Xəstəxananın birinci mərtəbəsində poliklinika, hemodializ, şüa-diaqnostika, təcili tibbi yardım, laboratoriya şöbələri, həmçinin gigiyena və epidemiologiya mərkəzi yerləşir. İnzibati bölmə, poliklinika, fizioterapiya və pediatriya şöbələri ikinci mərtəbədə fəaliyyət göstərir. Burada yaradılan şərait Astara sakinləri ilə yanaşı, ətraf rayonların əhalisinə də yüksək tibbi xidmət göstərmək imkanı yaradır.

Astaralılar Azərbaycan rəhbərinin bir gün sonra Lənkəranda bölgənin gəncləri ilə keçirdiyi görüşü də fəxrlə xatırlayırlar. Bu rayondan olan tələbə Fərhad Həsənli həmin görüşdə çıxış edərək ürək sözlərini söyləmişdi. “Hörmətli cənab Prezident, mən 15 yaşımda bu il ali məktəblərə keçirilən qəbul imtahanında 650 bal toplayaraq Azərbaycan Tibb Universitetinin müalicə işi fakültəsinə daxil olmuşam. Biz gənclərin gələcəkdə ali təhsil ocaqlarını bitirdikdən sonra yenidən bölgələrimizə qayıdıb işlə təmin olunmağımız da vacib məsələlərdəndir. Bu sahədə işlərin sistemləşdirilməsi üçün müəyyən tədbirlərin görülməsini çox istərdim”.

Prezident İlham Əliyev bir daha xatırlatmışdır ki, dünən biz Astarada gözəl xəstəxananın açılışını etdik. Ona görə Astarada həkim işləmək üçün bütün imkanlar vardır. İndi sən təxminən 5-6 il oxuyacaqsan. O vaxta qədər Astarada yeni tibb ocaqları tikiləcəkdir... Sən gərək yaxşı oxuyasan, yaxşı mütəxəssis olasan. Əlbəttə, əgər hesab edirsənsə ki, Astaraya qayıtmalısan, mən buna çox şadam. Çünki bu gün bölgələrdə tikilən xəstəxanalar inkişaf etmiş ölkələrdəki tibb ocaqlarından geri qalmır...

Dövlət başçısının görüşlərdə bildirdiyi kimi, bölgələrin inkişafı hər bir ölkənin real gücünü göstərir. Son illərdə Azərbaycanın bölgələrində aparılan işlər bir daha Azərbaycanın qüdrətli ölkə olduğunu təsdiqləyir. Çünki hər bir yerdə, hər bir bölgədə inkişaf, quruculuq işləri gedir. Ölkəmizin istənilən nöqtəsində, kəndlərdə, qəsəbələrdə də böyük quruculuq işləri gedir. Rayonlar elə bil ki, bir-biri ilə rəqabət aparır. Bu, sağlam rəqabətdir, bizi inkişafa doğru aparan rəqabətdir. Bu vüsətin təməli qəbul edilmiş iki regional proqramla qoyulmuşdur. Yerlərdə insanların təşəbbüsləri, zəhməti və öz dövlətinə olan sədaqəti bu uğuru daha da möhtəşəm edir.

Astarada görülən işlər də, heç şübhəsiz, böyük zəhmətin bəhrəsdir. Düzdür, büdcəmiz də artır, investisiya proqramı da kifayət qədər böyükdür. Ancaq bu maliyyə imkanlarını real həyata çevirmək artıq kadrların, vətənpərvər insanların işidir.

Rayon veteranlar şurasının sədri Rafiq Əliyev:

-Son illər ölkədə baş verən əsaslı dəyişikliklər, aparılan quruculuq işləri, sosial problemlərin həlli məqsədilə həyata keçirilən nəhəng proqramlar, əhalinin həyat şəraitinin ilbəil yaxşılaşması istiqamətində görülən tədbirlər sonsuz fərəh və minnətdarlıq duyğuları yaratmışdır. Növbəti beş ildə də taleyimizi möhtərəm cənab İlham Əliyevlə bağlamağımızdan son dərəcə xoşbəxtik. İnanıram ki, qarşıdakı dövrdə Azərbaycan daha da güclənəcək, regionlar tərəqqi edəcək, insan amilinə daim üstünlük veriləcək.

Bu gün Astara da sürətlə inkişaf edir, gözəlləşir. Dövlətin davamlı qayğısı, rayon rəhbərliyinin böyük idarəetmə potensialı, insanlara həssas münasibət bunu söyləməyə əsas verir... Qəzənfər müəllimin rayonda yaratdığı işgüzar ovqat hər kəsin fəallığının artmasına səbəb olur. Yeni layihələr, maraqlı təşəbbüslər inkişafımıza xidmət edir.

Azərbaycan Prezidenti, Ali Baş Komandan İlham Əliyev səfəri zamanı Lənkəran sərhəd dəstəsinin “Astara” buraxılış məntəqəsinin, sərhəd komendantlığının və zastavasının şəxsi heyəti üçün yeni yaşayış şəhərciyi, həmçinin sərhəd komendantlığı və sərhəd zastavasının əsaslı təmir olunmuş xidməti binalar kompleksinin açılışında iştirak etmişdir. Bu kompleksin ətrafında geniş abadlıq-quruculuq işləri aparılmış, yaşıllıq zolaqları salınmışdır. Şəhərcikdə hər cür şərait yaradılmışdır. Ərazidə uşaq bağçası və istirahət parkı da var.

Prezident İlham Əliyev Astaraya səfəri çərçivəsində Ərçivan-Şuvi-Alaşa-Qapıçıməhəllə avtomobil yolunun açılışında da iştirak etmişdir. Dövlət başçısının bu il 15 iyul tarixli sərəncamı ilə həmin yolun və Siyaku-Rinə yolunun inşasına 3,3 milyon manat vəsait ayrılmışdır. Ərçivan-Şuvi-Alaşa-Qapıçıməhəllə avtomobil yolunun tikintisinə cari ilin aprelində başlanmış və dörd aya başa çatdırılmışdır. Yolun uzunluğu 13,5 kilometrdir. Yol boyunca1 körpü və 20 su ötürücüsü tikilmişdir. Yeni avtomobil yolu 24 min nəfər əhalisi olan 17 yaşayış məntəqəsini əhatə edir.

Astaranın Pəlikəş inzibati dairəsinin ağsaqqalları və ziyalıları dövlət başçısına ünvanladıqları müraciətdə cənab Prezidentin bütün bölgələrə, rayonlara, hətta qəsəbə və kəndlərə səfərlər etməsini, sadə insanlarla görüşərək mövcud problemləri ən qısa müddətdə aradan qaldırmaq üçün sərəncam və tapşırıqlar verməsini hamılıqla alqışlamış və bildirmişlər ki, sentyabrın 4-də Astaraya növbəti tarixi səfəri, açılışlarda iştirakı ən əlamətdar gün kimi onların yadında qalacaq. Ən ucqar dağlıq ərazini əhatə etməklə 13 kəndi birləşdirən Pəlikəş inzibati ərazi dairəsi üzrə nümayəndəliyinin yollarının bərbad vəziyyətdə olması sakinləri çox narahat edirdi. Onlar yazırlar ki, sentyabrın 12-də Deqədi-Pəlikəş yolunun tikintisi ilə əlaqədar Prezident sərəncamını eşidəndə sevincləri yerə-göyə sığmadı, bir-birini təbrik etdilər...

Şümrüd kənd tam orta məktəbinin direktoru Məmmədhüseyn Dadaşov:

-Dağ ərazisində yaşayırıq. Hər dəfə rayon mərkəzinə gələrkən əzablara qatlaşırdıq. İcra hakimiyyətinin başçısı Qəzənfər Ağayev problemimizi lazımi dövlət strukturlarına çatdırdı. Hörmətli Prezidentimizin rayonumuza növbəti səfərindən sonra “Astara rayonunun sosial-iqtisadi inkişafının sürətləndirilməsinə dair əlavə tədbirlər haqqında” və “Astara rayonunun Deqadi-Pəlikəş avtomobil yolunun tikintisi ilə bağlı tədbirlər haqqında” imzaladığı sərəncamlar rayonumuzun bütün əhalisinin böyük razılığına səbəb olmuşdur. Eniş-yoxuşlu, çətin yollarımız abadlaşır, gediş-gəliş rahatlaşır.

Prezident İlham Əliyev “Gilan” İdman Klubu tərəfindən Ərçivan qəsəbəsində inşa edilmiş Boks Mərkəzinin açılışında da iştirak etmişdir. Bu mərkəzin tikintisinə fevralda başlanmış və avqustda yekunlaşdırılmışdır. İdman qurğusunun ərazisində hərtərəfli abadlıq və yaşıllaşdırma işləri aparılmışdır. Süni örtüklü yeni açıq mini futbol meydançası yaradılmışdır. İkimərtəbəli binanın birinci mərtəbəsində işçilər üçün hərtərəfli şəraiti olan otaqlar da var. Burada müasir standartlara uyğun qurulmuş məşq salonu idmançıların ixtiyarına verilmişdir. Boksçuların ötən ay Gürcüstanda keçirilən beynəlxalq turnirdə yüksək nailiyyətlər qazanması bu qayğıya layiqli cavabdır.

Rayonda son dövrdə məktəb tikintisi, qəsəbə və kənd yollarının asfaltlaşdırılması və digər abadlıq-quruculuq işləri xüsusilə geniş vüsət alıb. Son 10 ildə rayonda 30 yeni məktəb inşa olunub, 13 məktəb əsaslı təmir edilib. Təkcə builki “Bilik günü”ndə Astarada 2000 ümumi şagird yeri olan 6 yeni təhsil ocağı qapılarını şagird və müəllimlərin üzünə açıb. Bunlar Şuvi, Vaqo, Siyakü, Rudəkənar, Hamaşom və Asxanakəran kənd məktəbləridir.

Əhalinin təbii qaza olan ehtiyacının ödənilməsi sahəsində görülən işlər daha sevindiricidir. 1450 təsərrüfatı, 4560 nəfər əhalisi olan Şahağac kəndi sovet dönəmində təbii qazla təmin olunsa da, sonralar rayonun digər yaşayış məntəqələri kimi bu kənddə də qaz xətləri tamamilə dağılmışdı. Rayonun qaz təsərrüfatının bərpası və yenidən qurulması istiqamətində aparılan mühüm işlər bir sıra yaşayış məntəqələrinə təbii qazın verilməsini gerçəkləşdirdi. Nəhayət, ötən ay Şahağac kəndi təbii qazdan istifadə edən rayonun 33-cü yaşayış məntəqəsi oldu.

...Astarada bu torpağın şair oğlu İlham İlhami ilə də tanış oldum. Mənə bağışladığı “İzsiz itmərəm” adlı kitabını maraqla oxudum. Şeirlərində astaralıların yurd sevgisini böyük ilhamla qələmə alıb:

Vurğunam hüsnünə

divanə kimi,

Sevirəm mən səni

bir ana kimi.

Eşqinlə alışan

pərvanə kimi

İstərəm hər zaman

yanım, ey Vətən!

Bəli, astaralıların hədəfi yeni-yeni zirvələrdir.

Əli NƏCƏFXANLI

Xalq qəzeti.- 2013.- 7 noyabr.- S.6.