Azərbaycan dünyada ən

dinamik inkişaf edən ölkədir

Dünya dəyişir, millətlər, xalqlar azad firavan yaşamağın yollarını arayırlar. Azərbaycan isə öz yolunu müəyyənləşdirmişdir. Azərbaycan artıq 22 ildir müstəqillik yolunda inamla addımlayır. Ulu öndər Heydər Əliyev deyirdi ki, Azərbaycanın müstəqilliyi əbədidir, dönməzdir. Heydər Əliyevin ideyalarını uğurla həyata keçirən Prezident İlham Əliyevin hakimiyyəti illərində bu müstəqillik daha da möhkəmləndi, Azərbaycan beynəlxalq miqyasda sayılıb- seçilən ölkələr sırasına yüksəldı.

Hər sahədə uğurlar göz qabağındadır. İqtisadiyyatımız dinamik inkişaf etdi, sosial sahədə nailiyyətlərimiz ildən-ilə artdı. İnsanların rifah halı yüksəldi, əməkhaqları, pensiyalar mütəmadi olaraq artırıldı. Yoxsulluğun səviyyəsi aşağı salındı, işsizlik, demək olar ki, minimuma endirildi. Bir sözlə, Azərbaycan Cənubi Qafqazda lider dövlətə çevrildi.

Mədəniyyət, təhsil sahəsində isə uğurların miqyası daha genişdir. Azərbaycan mədəniyyəti dünyanı fəth edir. Bu gün xalqın milli-mənəvi dəyərlərinin qorunması, təbliği sahəsində həyata keçirilən layihələr diqqətəlayiqdir. Bizim muğam və aşıq sənətimiz, Novruz bayramı UNESCO-nun qeyri-maddi mədəni irs siyahısına salınmışdır. Azərbaycan UNESCO kimi nüfuzlu beynəlxalq təşkilatla əməkdaşlığı ildən- ilə genişləndirir. Bakıda keçirilən Mədəniyyətlərarası Dialoq Forumları ənənəvi hal almışdır. Bütün bunlarda Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban xanım Əliyevanın mühüm xidmətləri olmuşdur.

Son illər Azərbaycanda şəhərsalmanın geniş vüsət alması şəhərlərimizin və rayon mərkəzlərinin simasının tamamilə müasirləşməsinə şərait yaratmışdır. Bir Bakıya baxın: son vaxtlar onun siması tanınmaz dərəcədə dəyişmişdir. Yeni parklar, xiyabanlar, yaraşıqlı binalar şəhərimizə məxsusi gözəllik bəxş edib. Hələ “Ağ Şəhər” layihəsi reallaşandan sonra Bakı daha da gözəlləşəcək. Mən hərdən regionlara səfər edirəm. Rayonlarda geniş quruculuq, yenidənqurma işləri gedir. Hər şey yeniləşir, gözəlləşir. Çox sevinirəm ki, ulu öndərin ideyaları belə sürətlə reallaşır.

Qarşıda Dünya Azərbaycanlılarının Həmrəylik Günü, Yeni il bayramları gəlir. Azərbaycan xalqı bu bayramları ruh yüksəkliyi ilə qarşılayır. Xalqımızı, dünyanın müxtəlif guşələrində yaşayan azərbaycanlıları bu bayramlar münasibəti ilə təbrik edir, Azərbaycanımıza əminamanlıq, sülh arzulayıram.

Ömər ELDAROV,

Azərbaycan Rəssamlıq

Akademiyasının rektoru, akademik

Xalq qəzeti.- 2013.- 31 dekabr.- S.3.