Ağsu: ilin 9 ayı uğurlarla yadda qaldı

2013-cü ilin geridə qalan 9 ayında Ağsuda “Azərbaycan Respublikası regionlarının 2009-2013 cü illərdə sosial-iqtisadi inkişafı Dövlət Proqramı”nda nəzərdə tutulan tədbirlərin icrası istiqamətində uğurlu addımlar atılıb. 9 ayın sosial-iqtisadi inkişafının yekunlarına həsr olunmuş ümumrayon toplantısında geniş hesabatla çıxış edən rayon icra hakimiyyətinin başçısı Ənvər Seyidəliyevin məruzəsində qeyd olunub ki, kənd təsərrüfatı məhsullarının istehsalının və emalının inkişafının dəstəklənməsi davam etdirilib.

2013-cü ilin məhsulu üçün 33741 hektar sahədə payızlıq taxıl əkilib ki, bunun da 14199 hektarını buğda, 19542 hektarını arpa əkini təşkil edir. Taxıl əkini sahələrinə yüksək səviyyədə aqrotexniki qulluq göstərilib. Əkin sahələrinin suvarılması, alaq otlarından təmizlənməsi, mineral gübrə verilməsi, ziyanvericilərə qarşı mübarizə tədbirləri vaxtında icra olunub. “Aqrolizinq” yolu ilə fermerlərə və ailə-kəndli təsərrüfatlarına 204 ton azot və 20 ton fosfor gübrəsi satılıb.

Taxıl biçini optimal vaxtda başa çatdırılıb, 33741 hektar sahənin taxılı biçilib və 84 min ton məhsul əldə olunmaqla orta məhsuldarlıq 24,9 sentner təşkil edib.

Pambıqçılığın inkişafı diqqət mərkəzində saxlanılıb. Rayonun təsərrüfatlarında əkilmiş 15 hektar pambıq sahəsində aparılan aqrotexniki qulluq işləri bol məhsul üçün zəmin yaradıb, mövsümün əvvəlindən sahələrdən 20 ton pambıq yığılıb. Hazırda pambıq yığımı davam etdirilir.

Ötən ilin müvafiq dövrü ilə müqayisədə mal - qaranın sayı və heyvandarlıq məhsulları istehsalı artıb. Nəticə etibarı ilə 3698 ton ət (diri çəkidə), 19548 ton süd, 5806 min ədəd yumurta istehsal edilib.

Cari ilin ötən 9 ayında da Dünya Bankı və Azərbaycan Hökuməti ilə birgə maliyyələşdirilən “Milli Su Təchizatı və Kanalizasiya xidmətləri üzrə İkinci Layihə” çərçivəsində Ağsu şəhərinin su təchizatının yenidən qurulması və kanalizasiya sisteminin yaradılması istiqamətində işlərin icrası davam etdirilib.

Geridə qalan aylarda abadlıq-quruculuq, tikinti-bərpa işləri sürətlə davam etdirilib, sahibkarlığın inkişafı dəstəklənib. “Aqrolizinq” ASC -nin Ağsu rayon “Aqroservis” filialı üçün istehsalat bazası, rayonun Padar kəndində saatlıq istehsal gücü 30 kubmetr olan qum-çınqıl karxanası, Ağsu şəhəri ilə Rirhəsənli kəndinin sərhədində yeni park, Ağsu şəhərində, eləcə də kəndlərdə onlarla ticarət, iaşə, məişət və servis xidməti obyektləri, plastik qapı-pəncərə hazırlayan sexlər, həmçinin digər xidmət və istehsal obyektləri tikilib istifadəyə verilib. Ağsu şəhərində 1 ədəd dövlət fondu yaşayış binasının dam örtüyü əsaslı təmir edilib.

Rayon icra hakimiyyətinin başçısı Ənvər Seyidəliyev hesabat məruzəsində qeyd etdi ki, şəhərin mərkəzi küçələrinin tamamilə yenidən qurulması istiqamətində işlər davam etdirilir. Vətəndaşlara məxsus fərdi evlərin, yardımçı tikililərin, ticarət, iaşə, məişət və digər xidmət obyektlərinin, ictimai və inzibati binaların görkəmi yaxşılaşdırılır, piyada səkiləri salınır, həyətyanı sahələrin küçələrə yaxın hissəsində mişar daşı ilə hasar tikilir, mövcud hasarlar üzlük daşlarla üzlənir.

Hesabat dövründə rayonun Külüllü kəndinin “Bilal əfəndi” adlanan ərazisindən Çiyni kəndinə yeni su xətti çəkilb, 200 abonentin içməli şəbəkə suyu ilə təchizatı və hər bir abonent üzrə su xətlərinin sayğaclalaşdırılması təmin olunub.

Ümumiyyətlə, 2013-cü ilin ötən 9 ayında fəaliyyətə başlayan yeni və bərpa edilmiş müəssisələrdə, aparılan abadlıq - quruculuq işlərində və digər mövsümi işlərdə 285 nəfər işlə təmin olunub ki, onlardan da 285 nəfəri daimi işlə təmin olunanlardır. Xüsusi mülkiyyətin genişləndirilməsi, sahibkarlığın sürətli inkişafı və əhalinin sosial müdafiəsinin gücləndirilməsi istiqamətində həyata keçirilən dövlət tədbirlərinin nəticəsi olaraq hesabat dövründə orta aylıq əmək haqqı ötən ilin müvafiq dövrünün səviyyəsini 8,70 manat üstələyərək 239,70 manat təşkil edib.

Rayon rəhbəri qeyd etdi ki, 2013-cü ilin ötən 9 ayında Ağsuda Sahibkarlığa Kömək Milli Fondunun xətti ilə 66 sahibkara 820,5 min manat güzəştli kredit verilib. Bu kreditlər hesabına 110 yeni iş yerinin yaradılması nəzərdə tutulur. Ümumiyyətlə, 2004-cü ildən hal-hazıra kimi 1049 yeni iş yeri yaradılıb. Nəzərdə tutulan 360 investisiya layihələri maliyyələşdirilib, 4425,7 min manat güzəştli kredit verilib.

Sosial proqramların icrası sahəsində mühüm tədbirlər həyata keçirilib, əhalinin sosial müdafiəsinin yüksək səviyyədə təşkili diqqət mərkəzində saxlanılıb. Bu müddətdə Ağsu rayon ƏSMM-nə ünvanlı sosial yardım almaq üçün 954 ailənin sənədləri qeydiyyata alınıb, 950 ailəyə ünvanlı sosial yardım təyin edilib. Bu da 4547 nəfər ailə üzvünü əhatə etməklə 1 ailəyə ödənilən ünvanlı sosial yardımın orta aylıq məbləği 119 manat təşkil edir.

Bu müddətdə kənd yaşayış məntəqələrinin, eləcə də yeni tikilmiş evlərin qazlaşdırılması məqsədi ilə 135,1 min metr müxtəlif diametrli yeni qaz kəməri tikilib istifadəyə verilib. Nəticədə əhalisinin ümumi sayı 9509, abonentlərinin ümumi sayı 1474 olan 12 kənd yaşayış məntəqəsinin təbii qazla təchizatı təmin edilib. Bütün qazlaşdırılmış mənzillərə SMART-KART tipli qaz sayğacları quraşdırılıb və fərdi qaztənzimləyicilərlə təmin edilib.

Rayonun elektrik təsərrüfatında yenidənqurma işləri davam etdirilib. Şəbəkənin balansında olan 10 kv-luq elektrik verilişi xətlərində 2,2 kilometr əsaslı, 5,7 kilometr məsafədə cari, 0.4 kv-luq elektrik verilişi xətlərində 3,6 kilometr məsafədə əsaslı, 0,6 kilometr məsafədə cari təmir işləri görülüb.

Ötən 9 ayda 180 şagird yerlik Qəşəd kənd tam orta məktəb binasının tikintisi başa çatdırılaraq istifadəyə verilib, 180 şagird yerlik Rəhimli kənd tam orta məktəb binasının tikintisində işlər davam etdirilir. Hər biri 80 şagird yerlik Keşdiməz kənd ümumi orta, Dilman və Muradlı kənd tam orta məktəb binalarının tikintisinə başlanılıb.

Ölkənin sosial-iqtisadi həyatında mühüm rol oynayan rabitə son illər yüksək inkişaf səviyyəsinə çatmış, bu inkişaf həm mövcud rabitə vasitələrinin intensiv istismarı, habelə yeni texnologiyaların və xidmət növlərinin yaradılması ilə səciyyələnir. Bu sahədə rayon Poçtamtı və Telekommunikasiya Qovşağı tərəfindən müəyyən işlər görülüb.

Ənvər Seyidəliyev toplantının sonunda əmin olduğunu bildirdi ki, bütün ağsulular Azərbaycan Prezidenti İlham Əliyevin ətrafında bundan sonra da daha sıx birləşəcək, ölkəmizin sosial-iqtisadi tərəqqisi naminə dövlətimizin geniş miqyaslı iqtisadi strategiyayasının həyata keçirilməsi üçün qarşıya qoyulan vəzifələri vaxtında və uğurla yerinə yetiriləcəkdir.

İlqar HƏSƏNOV

Xalq qəzeti.- 2013.- 24 oktyabr.- S. 6.