Zərdablılar dövlət qayğısına əməli işlə cavab verirlər

Zərdab Rayon İcra Hakimiyyətində keçirilmiş yığıncaqda qeyd olunmuşdur ki, respublikada gedən sürətli və davamlı inkişaf prosesi 2013-cü ilin 9 ayının nəticələrinə görə rayon üçün də səciyyəvi olmuşdur. Prezident İlham Əliyevin Zərdaba səfərlərinin və prezident seçkilərində qalib gəlməsinin xoş təəssüratları ilə yaşayan, zərdablılara göstərdiyi diqqət və qayğıdan güc alan rayon əhalisi 2013-cü ilin 9 ayını da uğurlu göstəricilərlə başa vurmuşdur.

Zərdab Rayon İcra Hakimiyyətinin başçısı Lütvəli Babayev qazanılmış uğurlar və qarşıda duran vəzifələr barədə hesabatla çıxış edərək bildirmişdir ki, 2013-cü ilin 9 ayında rayon iqtisadiyyatının əsas sahələrində 80 milyon manatlığa qədər məhsul istehsal edilmişdir ki, bu da keçən ilin müvafiq dövründən xeyli çoxdur. Həyata keçirilən tədbirlər nəticəsində 9 ay ərzində rayonda 272 daimi iş yeri yaradılmışdır. Rayonun gəlirləri 10 milyon 600 min 235 manata qarşı 10 milyon 296 min 547 manat və ya 102,9 faiz icra olunmuşdur. Bundan əlavə, 9 ay ərzində qarşılıqlı hesablaşmalardan rayon büdcəsinə 6 milyon 754 min 705 manat vəsait daxil olmuşdur.

Rayon iqtisadiyyatının aparıcı qüvvəsi olan kənd təsərrüfatında da inkişaf və irəliləyiş davam etdirilmişdir. Bu il 475 hektardan indiyədək 42,6 ton pambıq yığılmışdır. 5811 hektardan 15422 ton arpa, 11323 hektardan 31675 ton buğda — ümumilikdə 47097 ton taxıl istehsal olunmuş, məhsuldarlıq ötən illə müqayisədə 1,7 sentner, məhsul isə 9 min tona qədər artmışdır. 5 toxumçuluq təsərrüfatında 206 hektar sahədən 35 sentner olmaqla 684,4 ton toxumluq taxıl istehsal olunmuşdur. Bostan, kartof, tərəvəz məhsulları istehsalında da əsaslı irəliləyiş olmuşdur. Hazırda 2014-cü ilin məhsulu üçün 1241 hektarda arpa, 81 hektarda buğda əkilmişdir ki, bu da keçən ilin eyni dövründən 126 hektar çoxdur.

2012-ci ilin eyni dövrünə nisbətən mal 295 baş artaraq 54011-ə, xırda mal 822 baş artaraq 110968-ə, ət istehsalı 283 kiloqram artaraq 3282,2, süd 2,8 ton artaraq 16312,2 tona, yumurta min ədəd artaraq 6 milyon 92 min ədədə, yun istehsalı 700 kiloqram artaraq 160,5 tona çatmışdır.

Rayon Suvarma Sistemləri İdarəsi 2013-cü ilin 9 ayı ərzində 17134 hektar taxıl, 15593 hektar yonca, 475 hektar pambıq, 535 hektar bostan-tərəvəz, 12 hektar çəltik sahəsində, 1932 hektar həyətyanı sahədə, 1168 hektar meşə və çoxillik əkinlərdə suvarma aparılmışdır.

“Aqrolizinq” ASC-nin rayon Aqroservis filialı 56 adda texnika vasitəsilə müxtəlif xidmətlər göstərmişdir.

Məruzəçi 2013-cü ilin 9 ayında təhsil, səhiyyə və mədəniyyət sahəsinin inkişafı istiqamətində xeyli iş görüldüyünü qeyd edərək bildirmişdir ki, Dövlət Proqramına uyğun olaraq rayonun Çallı kəndində 360, İsaqbağı kəndində 220, Aşağı Seyidlər kəndində 80 şagird yerlik məktəb binalarının tikintisi başa çatdırılmış və sentyabrın 16-da istifadəyə verilmişdir. Körpükənd kənd tam orta məktəbin binasının əsaslı təmiri başa çatdırılmış, şəhər 3 saylı tam orta məktəbin binasının fasadında isə 5 min manatlıq cari təmir işləri aparılmışdır. Şəhər 3 nömrəli körpələr evi-uşaq bağçasının və Böyük Dəkkə kənd körpələr evi-uşaq bağçasının binalarında da əsaslı təmir başa çatdırılmışdır. 2013-cü ildə 135 nəfər zərdablı məzunun respublikanın müxtəlif ali məktəblərinə qəbul olunmuşdur.

Əhaliyə göstərilən tibbi xidməti yaxşılaşdırmaq məqsədilə rayon rəhbərliyinin təşəbbüsü ilə respublikanın tanınmış həkimlərinin rəhbərliyi altında həkim briqadaları rayonumuza gələrək rayon əhalisinə yüksək səviyyədə tibbi xidmət göstərmişlər. Rayon Mərkəzi Xəstəxanasının həkim briqadaları Əlvənd, Şahhüseynli, Şəftəhal, Məlikli, Kəndəbil, Sarıqaya kəndlərində əhalinin tibbi müayinədən keçirilməsini təmin etmişlər. Mərkəzi Rayon Xəstəxanasının binasında avqust ayından təmir işlərinə başlanılmışdır. Yerli büdcə vəsaiti hesabına 2013-cü ilin 9 ayı ərzində Zərdab Mərkəzi Rayon Xəstəxanasına 113 min manatlıq inventar, 59,4 min manatlıq maşın və avadanlıq, 30,2 min manatlıq odun alınmışdır. Şahhüseynli, Kəndəbil, Qaravəlli kənd həkim məntəqələrində 39,8 min manatlıq cari və əsaslı təmir işləri aparılmışdır.

2013-cü ilin 9 ayında rayonda keçirilən mədəni-kütləvi tədbirlərin dairəsi daha da genişləndirilmiş, əhalinin asudə vaxtının səmərəli təşkili üçün Heydər Əliyev parkında və kəndlərdə maraqlı konsert proqramları təşkil edilmişdir. “Həsən bəy Zərdabi muzeyində əsaslı təmir və bədii tərtibat işləri başa çatdırılmışdır. Həmçinin 9 ay ərzində Uşaq İncəsənət Məktəbində, Rayon Mədəniyyət Evində, Rayon Mərkəzi Kitabxanasında və Tarix Diyarşünaslıq muzeyində 64 min 970 manatlıq cari təmir işləri aparılmışdır. Mədəni-maarif müəssisələrinə 56,5 min manatlıq inventar, 75 min manatlıq digər maşın-avadanlıq alınmışdır.

Dəli Quşçu kəndində 286, Dəkkəoba kəndində 288 abonentə fərdi qaz xətti çəkilmiş və sayğac quraşdırılmışdır. Gəlmə, Salahlı, Hüseynxanlı və Xanməmmədli kəndlərində qaz xəttinin çəkilişi yekunlaşmaq üzrədir. İl ərzində 11 kənddə qaz xəttinin açılışı nəzərdə tutulur. Rayonda içməli suya olan tələbatın ödənilməsi vəziyyətinin yaxşılaşdırılması istiqamətində də müəyyən işlər görülmüşdür. Ekologiya və Təbii Sərvətlər Nazirliyi tərəfindən əvvəlki illərdə 17 ədəd modul tipli su təmizləyici qurğu, 194 ədəd bulaq tikilib istifadəyə verilmişdir. Növbəti mərhələdə daha 12 kənddə belə qurğuların tikilməsi nəzərdə tutulmuşdur.

Yol təsərrüfatında da cari ilin 9 ayında işlər davam etdirilmişdir. Zərdab-Mollakənd avtomobil yolunun 26 kilometr hissəsində üst layın tikinti işləri başa çatdırılmışdır.

Əhaliyə poçt və rabitə xidmətinin keyfiyyətinin yüksəldilməsi və iş şəraitinin yaxşılaşdırılması məqsədilə Poçtamtın və Telekommunikasiya Qovşağının yerləşdiyi inzibati binada əsaslı təmir işləri yekunlaşmaq üzrədir.

Hesabat dövründə rayonda tikinti-quruculuq və abadlıq işləri davam etdirilmiş, təmizlik, səliqə-sahman işlərinə diqqət artırılmışdır.

Yığıncağın sonunda yekdilliklə bildirilmişdir ki, zərdablılar bundan sonra da Prezident İlham Əliyevin uğurla həyata keçirdiyi inkişaf strategiyasını dəstəkləyəcək, göstərilən yüksək diqqət və qayğıya əməli işləri və hərtərəfli dəstəkləri ilə cavab verəcəklər.

Yığıncaqda prezident seçkilərində parlaq qələbə qazanmış dövlət başçısı İlham Əliyevə zərdablıların təbriki də səslənmişdir.

Sonda müvafiq qərar qəbul edilmiş və ölkə Prezidentinə müraciət qəbul olunmuşdur.

Ziyəddin SULTANOV

Xalq qəzeti.- 2013.- 25 oktyabr.- S. 10.