Azərbaycan dünyada layiqincə təmsil olunur

Ali təhsil ocağı xalqın gələcək nəslini irəli aparır və gənclərin mükəmməl ixtisaslara yiyələnmələrini təmin edir.

Gənc nəsil biz müəllimlərin onlara verdiyi bilik, göstərdiyimiz diqqət nəticəsində formalaşır. Bu gün Azərbaycan gəncləri dünyanın müxtəlif ölkələrində uğurla təhsil alır, Azərbaycanı dünyada layiqincə təmsil edirlər. Gənc nəslin yetişdirilməsində və yüksək biliyə malik olan mütəxəsis kimi dünya arenasına çıxarılmasında Azərbaycan Təhsil Nazirliyinin, Azərbaycan Mədəniyyət və Turizm Nazirliyinin, Azərbaycan Gənclər və İdman Nazirliyinin böyük rolu vardır.

Ötən il mədəniyyət və incəsənətimizin inkişafında mühüm nailiyyətlər qazanılmışdır. Milli mədəniyyətimiz dünyaya inteqrasiya yolunda böyük uğurlar əldə etmişdir. İncəsənət xadimlərimiz həm ölkəmizdə, həm də beynəlxalq miqyasda sənətsevərlərin rəğbətini qazanmışlar.

2012-ci ildə Azərbaycan Respublikasının Prezidenti İlham Əliyev və onun xanımı Mehriban Əliyevanın köməkliyi nəticəsində keçirilən yüksək səviyyəli tədbirlər ölkəmizin dünyada tanınmasında çox əhəmiyyətli rol oynamışdır. Bakı Musiqi Akademiyasında və Qəbələdə keçirilən festivallar, “Avroviziya” müsabiqəsinin Bakıda keçirilməsi, Londonda keçirilən Olimpiya oyunlarında qazanılan uğurlar bunu bir daha təsdiq edir.

Arzu edirəm ki, 2013-cü ildə Qarabağ düşmən işğalından azad olunsun , yeni ildə Şuşada, Ağdamda, Füzulidə, Laçında beynəlxalq simpoziumlar, musiqi festivalları keçirək.

Bir daha xalqımızı Dünya Azərbaycanlılarının Həmrəyliyi Günü və Yeni il bayramı münasibətilə təbrik edir, sülh, səadət arzulayıram...

Fərhad BƏDƏLBƏYLİ,

Bakı Musiqi Akademiyasının rektoru,

Xalq artisti, professor

Xalq qəzeti.- 2013.- 1 yanvar.- S. 3.