İmişlidə vədlər həqiqətə çevrilir

Burada abadlıq-quruculuq işlərinin miqyası gündən-günə genişlənir

Yeni başa vurduğumuz 2012-ci il Azərbaycanın hər yerində oduğu kimi, İmişli rayonu üçün də çox uğurlu il olmuşdur. Belə ki, ötən il sosial-iqtisadi inkişafın bütün sahələrində müsbət nəticələr əldə olunmuş, rayonun hər yerində, o cümlədən İmişli şəhərində abadlıq-quruculuq işləri yeni vüsət almışdır.

... Yolum yenə İmişli şəhərinə düşmüşdü. Burada aparılan tikinti-quruculuq işlərinin miqyası, həqiqətən, insanı heyran edir. Hara baxırdım, yeni tikili, bərpa olunan obyekt görür, hara boylanırdımsa, insanların böyük həvəslə abadlıq-quruculuq işlərinə qatıldığının şahidi olurdum.

Şəhərin mərkəzi küçələrinin birində köhnə tanışım, ağsaqqal, İmişli şəhər sakini Həsən kişi ilə rastlaşdım. O, doğma şəhərində aparılan böyük quruculuq işlərindən söz açdıqca çox sevinirdi:

- Möhtərəm Prezidentimiz İlham Əliyev ötən ilin aprelində Vilyam Hacıyevi İmişli Rayon İcra Hakimiyyətinin başçısı təyin edəndən sonra bizim rayonda olduqca çox iş görülüb, əmək kollektivlərində səmimi, işgüzar ab - hava yaranıb. Sakinlər elliklə abadlıq-quruculuq işlərinə qatılıblar. Nəticə də göz qabağındadır: İmişli elə sürətlə yeniləşir, gözəlləşir ki, 70 il burada yaşayan insan belə az qala öz şəhərini tanıya bilmir...

İmişli Rayon İcra Hakimiyyətinə gəldim. Şəhərdə gördüklərimi nəql edəndə mənə rəsmi məlumat təqdim etdilər. Orada deyilir: “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nın icrası ilə bağlı rayonda ötən il 220 şagird yerlik Çaxırlı, 180 şagird yerlik Ağaməmmədli, 360 şagird yerlik Bəcirəvan, 220 şagird yerlik Qaragüvəndikli kənd tam orta məktəbləri üçün yeni binaların tikintisi, İmişli şəhər 4 saylı uşaq bağçasının əsaslı təmiri başa çatdırılmış, məktəb binaları yeni dərs ilində istifadəyə verilmişdir. 180 şagird yerlik Hacıbabalı kənd ümumi orta məktəbi üçün yeni binanın, 180 şagird yerlik Xoşçobanlı kənd tam orta məktəbində bərpa-gücləndirmə işlərinə 2 yeni tədris korpusunun tikintisi başa çatdırılmışdır. Ağamalılar kənd tam orta məktəbinin binası təmir edilmiş, rayon Təhsil Şöbəsinin dam örtüyü dəyişdirilərək, binanın fasad hissəsi ağlay ilə üzlənmişdir. Sahəsi 570 kvadratmetrlik, 1 zal və 7 otaqdan ibarət olan Şahmat Məktəbi tikilmişdir.

Azərbaycan Respublikası Prezidentinin 30 mart 2010-cu il tarixli sərəncamı ilə Prezidentin Ehtiyat Fondundan ayrılmış vəsait hesabına əsaslı təmir olunan Rayon Mərkəzi Xəstəxanasında təmir işləri başa çatmışdır. Hazırda 2 mərtəbəli, 4 korpusdan ibarət 136 çarpayılıq xəstəxana binası müasir tibbi cihazlar, inventar və avadanlıqlarla təchiz olunmuşdur. 2012-ci ilin 9 ayı ərzində Rayon Tarix-Diyarşünaslıq Muzeyi və Mərkəzi Kitabxanasında əsaslı təmir işləri başa çatdırılmış, muzeyin dam örtüyü dəyişdirilmişdir. Hər iki bina ağlayla üzlənmiş, sahəsi 200 kvadratmetrlik, 2 zaldan ibarət olan muzeydə 4 min ədəd eksponatın yerləşdirilməsi nəzərdə tutulmuşdur.

Ötən il ərzində həmçinin emal sənayesinin inkişafı üçün görülən işlər də davam etdirilmiş, Qaragüvəndikli kəndinin ərazisində damazlıq yumurta istehsal edən “Araz damazlıq quşçuluq” MMC-nin yeni sexləri, Bəhrəmtəpə qəsəbəsində 50 min tonluq taxıl anbarı və Xəlfəli kəndi ərazisində yeni asfalt zavodu tikilib istifadəyə verilmişdir. Gündə 200 ton kəllə qənd istehsal etmək gücündə olan İmişli şəkər zavodunun nəzdində kəllə qənd zavodunun tikintisi başa çatmışdır.

Rayonun Bəcirəvan kəndində inşa edilən baytar sahə məntəqəsinin binasında tikinti işləri başa çatmışdır. İmişlidə ötən il Qarabağ müharibəsi əlilləri və şəhid ailələrinin mənzil şəraitinin yaxşılaşdırılması məqsədilə Əmək və Əhalinin Sosial Müdafiəsi Nazirliyi tərəfindən tikiləcək 6 mərtəbəli 54 mənzilli yaşayış binasının tikintisi üçün torpaq sahəsi ayrılmışdır. Rayonda məskunlaşmış məcburi köçkünlərin mənzil şəraitini yaxşılaşdırmaq məqsədi ilə Bəhrəmtəpə qəsəbəsində 550 məcburi köçkün ailəsi üçün yeni evlərin tikintisi nəzərdə tutulmuş, bunun üçün 100 hektar torpaq sahəsi ayrılmışdır. 325 məcburi köçkün ailəsi üçün fərdi yaşayış evlərinin tikintisi başa çatmış, qəsəbədə 360 şagird yerlik 2 mərtəbəli yeni məktəb binası tikilmişdir. Qəsəbəyə elektrik və su xətləri çəkilmiş, hazırda təbii qaz xəttinin çəkilişi aparılır".

İcra hakimiyyətində bildirdilər ki, 2012-ci ilin 9 ayında rayon üzrə 1058 iş yeri açılmışdır ki, onun da 403-ü daimidir. Ötən ilin müvafiq dövrü ilə müqayisədə açılmış yeni iş yerlərinin sayı 47,6 faiz artmışdır.

RİH-in binasından çıxandan sonra yenidən şəhərin tanış küçə və meydanları ilə gəzməyə, burada aparılan tikinti-quruculuq işləri ilə yaxından tanış olmağa başladım. Şəhərdə görülən işlərə baxdıqca sevinirdim.

Hər bir imişlili üçün əziz olan Heydər Əliyev parkı xüsusi zövqlə inşa edilib. Burada qısa vaxt ərzində abadlıq və yenidənqurma işləri aparılmış, parkın ərazisindəki ictimai və inzibati binalar ağlay daşlarla üzlənmişdir. Binaların dam örtükləri dəyişdirilmiş, parkda müasir işıqlandırma sistemi, fəvvarələr quraşdırılmış, yaşıllıqlar salınmışdır. Parkın ərazisində görünüşü uzaqdan diqqəti cəlb edən Heydər Əliyev Mərkəzi tikilmişdir. Sahəsi 2000 kvadratmetr olan 2 mərtəbəli mərkəzdə konfrans zalı, elektron kitabxana, dərnəklər, internet klublar, xarici dil kursları nəzərdə tutulmuşdur. “Gənclər Mərkəzi”ndə də konfrans zalı, kinoklub, kitabxana, kafe, çayxana və digər xidmət növləri fəaliyyət göstərəcəkdir.

Heydər Əliyev prospekti, 20 Yanvar, M.Əzizbəyov və H.Aslanov küçələrindəki bütün yaşayış və inzibati binaların, ticarət obyektlərinin dam örtüyünün dəyişdirilməsi, fasad hissələrinə ağlay daşların qoyulması, qapı və pəncərələrin yeniləri ilə əvəz olunması işi aparılırdı. Heydər Əliyev prospektindəki magistral qaz xətti, polietilen borularla əvəz olunur, yeraltı qaz və elektrik xətləri çəkilirdi.

Sonra Vağzal meydanına getdim. Burada sahəsi 8300 kvadratmetr, hündürlüyü 100 metr olan Bayraq Meydanı salınmışdır. Şəhər ərazisindəki M.Sabir və Nizami adına parklarda da oldum. Burada da yenidənqurma və abadlıq işləri aparılırdı.

İmişlidə bu dəfə gördüklərim məndə olduqca xoş təəssürat yaratmışdı. Şəhəri gəzdikcə rayon icra hakimiyyətinin başçısı Vilyam Hacıyevlə İmişlidə ilk dəfə görüşdüyüm zaman onun dərin inamla dediyi bu sözləri xatırladım: “İmişli camaatı çox işgüzardır. Burada dövlətçiliyimizə, cənab Prezidentimiz İlham Əliyevin həyata keçirdiyi müdrik siyasətə dərin inam və ehtiram var. Biz İmişli camaatı ilə birlikdə hələ çox işlər görəcəyik”.

Bu sözlərin İmişlidə qısa zaman çərçivəsində həqiqətə çevrildiyinin şahidi olduğum üçün bir daha məmnun qalmışdım. Gələn dəfə burada daha möhtəşəm abadlıq-quruculuq işlərinin həyata keçiriləcəyinə isə zərrə qədər şübhə etməyərək İmişlidən ayrıldım.

Səməd Hüseynoğlu,

Xalq qəzeti.- 2013.- 11 yanvar.- S. 6.