“BU DAĞLARA YER DAYAQDIR, GÖY
ÇƏTİR...”
Vaxt vardı, Yardımlıya
yalnız yaz-yay aylarında getmək olurdu. Çünki
havalar bir az soyuyan kimi sel-su,
yağış-qar yolları bağlayır, dağlar
diyarını əlçatmaz edirdi. Qaz,
işıq olmur (meşələrə divan tutulur),
keçilməz yollar göz qorxudurdu. İndi vəziyyət
tam dəyişib: yollar xeyli abaddır, dolama yoxuşlar “ram”
edilib. Avtomobillərin hərəkəti
qarlı-çovğunlu havalarda da asanlaşıb. Hər
fəsildə dağlar diyarına gedib gəzmək, ulu təbiətin
seyrinə dalmaq imkanı yaranıb. Elə yerli əhalinin həyatı
da sahmandadır, rahat yaşamaq üçün burada hər
şərait var.
Qarlı qış günlərindən birində
Yardımlının ucqar Gendərə kəndinə gedirdik. Mənzil
başına yolda xeyli əziyyət çəkməklə
birtəhər yetə bildik. Bu zaman
alpinistlərin çətin peşəsini xatırladım.
Dərhal da yadıma bu dağların cəsur
oğlu, alpinist Sarvan Rəsulov düşdü. Onun ömrü dağda-daşda keçməkdədir.
Hazırda Azərbaycan Hava və Ekstremal
İdman Növləri Federasiyasının vitse-prezidentidir.
Qurumun yaradıldığı bir neçə
ildə idmançı dostları ilə Pamirin gədiklərinə,
Everestə, Antarktidaya yürüş edib. Vilson zirvəsinə qalxıb, Cənub qütbünəcən
gedib çıxaraq orada ulu öndərin “Mən həmişə
fəxr etmişəm ki, azərbaycanlıyam” və
“İlhamla irəli” şüarlarını yerləşdirib.
Afrikada Kilimancaroya qalxıb, Uhuranı fəth
edib və oraya üçrəngli bayrağımızı
asıb. Cənubi Amerikada Akonkaquaya, Türkiyədə
Ağrıdağa uğurlu ekspedisiyaları olub.
Düşündüm ki, Yardımlının aşılmaz
sıldırımlarında ilk sınaqlardan
çıxmış Sarvan kimi oğullar üçün
dünyanın heç bir dağı, qayası,
buzlağı qorxulu olmaz...
Yardımlının
ağsaqqalları deyirlər ki, yurdun indiki durumuna min
şükür, dağların növrağına min əhsən!
Rayon sakinlərinin tarixə qovuşmuş 2012-ci ili də fərəhlə xatırlamağa
haqları var. Çünki həmin il onların ömründə-günündə
xüsusilə silinməz iz buraxıb. Hansı
yöndən baxsan, dağlar diyarında həyatın daha da
canlandığının şahidi olarsan. Ölkənin dinamik inkişafı Yardmlıda da
geniş əksini tapıb. Rayonun
sosial-iqtisadi və mədəni həyatında yeni bir mərhələnin
başlanğıcı qoyulub.
Həmkarım,
Yardımlıda çıxan “Zirvə” qəzetinin redaktoru Ələsgər
Cəfər ötən ilin yekunlarını şərh edərək dedi
ki, inkişafın yeni mərhələsi ilk növbədə
özünü insan amilinə zəruri önəm verilməsi
ilə sağlam münasibətlər sisteminin qurulmasında
göstərib. İşgüzar mühit,
qarşılıqlı inam sayəsində vahid və işlək
mexanizm qurulub, ləngitmə riçaqları birdəfəlik
aradan qaldırılıb.
Qələm
dostum daha sonra bildirdi:
-Məlumdur
ki, yerlərdə əhali ilə görüşlər
keçirmək, səyyar qəbullar, dinləmələr təşkil
etmək müasir idarəetmənin ən məqbul
formalarındandır. Prezident İlham Əliyevin
vaxtaşırı bölgələrə səfər etməsi,
regional inkişaf Dövlət Proqramının icrasını
nəzarətdə saxlaması və ictimaiyyət nümayəndələri
ilə görüşərək səmimi söhbətlər
aparması hər bir rəhbər kadr üçün örnəkdir.
Rayonumuza yeni təyin olunan icra
başçısı Sevindik Hətəmov bu mexanizmin səmərəsini
fəaliyyəti ilə bir daha ortaya qoydu. Çətin
coğrafi relyefə baxmayaraq o, idarə, müəssisə və
təşkilat rəhbərlərinin iştirakı ilə
rayonun 90 yaşayış məntəqəsinin
hamısında görüşlər keçirib, problemlərlə
tanış oldu. Bu zaman rəsmi
qəbullardan fərqli olaraq, insanlar öz istək və
arzularını, narahatedici məsələləri rayon rəhbərinə
birbaşa çatdırmaq üçün real imkan
qazandılar.
Beləcə,
səmimi dialoqlar, təkliflərə, müraciətlərə
həssas və obyektiv münasibət rəhbərliklə əhali
arasında olan
inam körpüsünü daha
da möhkəmləndirdi. Sosial-iqtisadi
inkişafın bütün aspektləri işə
salındı. Sağlam atmosferdən,
işgüzar auradan ruhlanan xeyriyyəçilər,
az-çox imkanlı adamlar da qollarını
çırmalayıb ürəklə işə girişdilər.
Vərgədüz kəndində şəxsi təşəbbüslə
artezian quyusu qazıldı, 20 tonluq su anbarı tikildi. Cerinbel kəndində yeni bulaq kompleksi inşa olundu,
Yardımlı-Masallı yolunun 22-ci kilometrliyində bulaq
tikildi, körpülər atıldı və sair. Qısası, Yardımlı,
sözün həqiqi mənasında, böyük bir tikinti
meydanına çevrildi.
Rayon mərkəzini gözəl və
yaraşıqlı bir dağ şəhərinə
çevirmək istiqamətində tikinti-abadlıq işləri
sürətləndirildi. Artıq indiyədək şəhərin giriş hissəsindən
başlayaraq kilomerlərlə istinad divarı
hörülmüş və ağ
üzlük daşlarla bərkidilmişdir. İndi
həmin istiqamətdə magistral yol da genişləndirilir, su
arxları salınır, piyadalar üçün səkilər
tikilir. Piyada yollarına ornamentli
üzlük plitələr döşənir. Artıq həmin ərazidə yerləşən
Heydər Əliyev bulağında müasir zövqə
uyğun əsaslı yenidənqurma işləri
aparılmış, ətraf
abadlaşdırılmışdır. Rayon
statistika idarəsi üçün yeni ikimərtəbəli
inzibati bina və vergi terminalı inşa olunub. YAP rayon təşkilatı
üçün tikilən binada işlər tamamlanır. Şəhidlər Xiyabanında əsaslı təmir
başa çatdırılıb. Polis
şöbəsi üçün üçmərtəbəli
bina tikilir. Şəhərin ən gözəl
guşəsində Heydər Əliyev mərkəzi
yaradılır, park salınır. Bundan
başqa, şəhərin darısqal küçələrinin
genişləndirilməsi üzrə işlər
görülür.
Tikinti-abadlıq işləri kəndlərdə də
sürətlənir. Bunun ən yaxşı nümunəsi yol
infrastrukturunun abadlaşdırılmasıdır. Kənd yollarında uzun illər təmir
aparılmaması ciddi problemlər yaradırdı. Payız-qış aylarında ucqar kəndlərlə
əlaqə kəsilir, nəqliyyatın hərəkəti
müşkülə çevrilirdi. Ona
görə də rayonun yeni rəhbərliyi ilk növbədə
bu problemin həlli məsələsini qaldırdı.
Onun təşəbbüsü ilə nəqliyyat nazirliyinin
xüsusi təyinatlı texnikası (5 ədəd ağır
tonnajlı maşın, 1 ədəd ekskovator, 1 ədəd
qreyder və traktor), həmçinin 44 saylı yol istismar sahəsinin
texniki qüvvəsi cəlb olundu. Qış
mövsümünədək 30-a qədər kəndin yolu əsaslı
təmir edildi. 41 kilometrlik kəndarası
yola çınqıl örtük verildi, 19 kilometr yol isə
eni 6 metr olmaqla genişləndirildi. Dörd
kəndə gedən yolda dağ çaylarının
üstündə dəmir-beton konstruksiyalı nəqliyyat
keçid körpüləri tikildi.
Əhalinin içməli su təminatı
üçün görülən işlər
razılıqla qarşılanır. Rayon rəhbərinin
şəxsi təşəbbüsü ilə 18 kəndin tələbatını
ödəmək məqsədilə Viləş
çayının Qaraqaya qolundan su xəttinin çəkilməsi
layihələndirilməyə başlanılıb, 2 kənddə
artezian quyuları qazılıb. Bundan başqa,
Yardımlı şəhərinin içməli su tələbatının
ödənilməsi üçün 52,2 kilometrlik su, həmçinin
58,2 kilometrlik kanalizasiya xətlərinin çəkilməsinə
başlanıb.
Qazlaşdırmanın sürətləndirilməsi
meşələrin kütləvi qırılmasının
qarşısını alır. Əngövül kəndində
133 evə təbii qaz verilməsi ilə əhali üzrə
abonentlərin sayı 1218-ə çatıb. İndi 300 abonenti olan Bozayran kəndinin
qazlaşdırılması sona yetmək üzrədir. Şəhərin Daşkənd və Ünəş
küçələrinin bir hissəsi də artıq
qazlaşdırılıb. Daha 18 kəndə
mavi yanacaq verilməsi üçün texniki şərtlər
hazırlanıb. Bundan başqa, şəhərin
infrastrukturuna daxil olan binalar da xəttə qoşulub.
Rayonda sahibkarlığın inkişafına mane olan maneələr
bütünlüklə aradan qaldırılıb. İş
adamlarının fəaliyyəti üçün münbit
şərait yaradılıb. İqtisadi İnkişaf
Nazirliyi Sahibkarlığa Kömək Milli Fondunun xətti ilə
rayonda maarifləndirmə tədbiri keçirilib və iş
adamlarına kreditlər verilib.
Ötən əsrin 90-cı illərinin əvvəllərindən
Yardımlıda ən çox narahatlıq doğuran məsələlərdən
biri elektrik enerjisinin verilməsi ilə bağlı olub. Xətt təsərrüfatının
bərbadlığı, məcburi açılmalar
infrastrukturu iflic etmişdi. Gündüz
saatlarında kəndlərin işığının kəsilməsi
haqlı narazılıq doğururdu. Yeni
tikilən məktəblərdə kompyuter kabinetləri iflic
olmuş, avadanlıq bir növ yararsız əşyaya
çevrilmişdi. Bu məsələ də,
nəhayət, həllini tapdı və indi bütün kəndlər
fasiləsiz enerji ala bilir. Bundan başqa,
neçə illər ləngidilən
Masallı-Yardımlı-Lerik yüksəkgərginlikli 110
kilovoltluq hava xəttinin çəkilməsinə
başlanılıb və bu sahədə işlər sürətlə
gedir.
Rabitə sistemində də köklü dəyişikliklər
baş verib. Bütün kənd ATS-ləri elektronlaşıb.
Ocnağaran kəndində yeni EATS
quraşdırılıb. Daha 2 kənddə
quraşdırılmaq üçün EATS-lər gətirilib.
Çoxşaxəli internet şəbəkəsi
istifadəyə verilib ki, hazırda 170 abonent bu xidmətdən
lazımınca yararlanır. Əhalinin
çoxsaylı xahişləri nəzərə alınaraq
Şəfəqli və Sırıq kəndlərində
bankomatlar quraşdırılıb.
Diqqət çəkən məsələlərdən
biri də təhsildir. Rayon rəhbərliyi
bütün kəndlərdə məktəblərə
baş çəkərək təhsilin vəziyyəti ilə
maraqlanıb. Təhsil ocaqlarının maddi-texniki
bazasının yaxşılaşdırılması
üçün də ardıcıl iş gedir. Sevindik müəllim məktəb tikintilərinin
sürət və keyfiyyətlə aparılmasına
xüsusi diqqət yetirir. Son 4 ayda rayonda 4 məktəb -
360 yerlik Kürəkçi, 220 yerlik Şəfəqli və
hər biri 80 yerlik olan Gügəvar və Gendərə məktəbləri
istifadəyə verilib. Çayüzü kəndində
55 yerlik uşaq bağçası da əsaslı təmir və
yenidənqurmadan sonra istifadəyə verilib. Bundan
başqa, hazırda Ostayır, Alçabulaq, Avaş kəndlərində
220 yerlik, Anzov kəndində 180, Fındıqlı
Qışlaq, Solqard və Zenqaran kəndlərinin hər
birində 80 yerlik məktəblərin tikintisi davam edir. Yolocaq kəndində yeni uşaq
bağçasının özülü qoyulub. 4 kənddə orta məktəb tipinin dəyişdirilərək
tam orta məktəblərə çevrilməsi də təhsilə
olan qayğıdan irəli gəlir.
Yardımlının ən böyük sərvəti onun əhalisidir. Bütün işlər, sosial-iqtisadi inkişaf kursu da ona xidmət edir, insanların sosial-rifah halının yaxşılaşdırılmasına yönəlib. Ona görə də rayon camaatı ölkə başçısının sosial-iqtisadi siyasətini ürəkdən dəstəkləyir və qiymətləndirirlər. Bu günlərdə Azərbaycan Prezidentinin rayonun sosial-iqtisadi inkişafını sürətləndirmək üçün əlavə tədbirlər haqqında sərəncam imzalaması Yardımlıda böyük rəğbətlə, sevinclə qarşılanıb. Tanınmış ağsaqqal və ziyalılardan Mirmahmud Mahmudov, Şahbaz Hüseynov, Mirhəqiqət Həsənov, Feyruz Sultanov, Pənah Tağızadə, Baba Bəhruz, Hüseyn Vəliyev, Əliş Baratov, Firsənd İbayev, Həzi Məcidov, Nadir Əliyev, Məlikməmməd Əliyev və onlarla başqaları söhbətlərində cənab Prezidentin sərəncamını Yardımlı üçün tarixi qərar adlandırıb, rayon əhalisinə xüsusi qayğısı kimi qiymətləndirdilər. Belə fikir vurğulandı ki, rayonun sürətli inkişafı qədim yurd yerlərindən əsassız miqrasiyanın qarşısını alır, insanların torpağa bağlılığını artırır, cins-yaş strukturundakı fərqləri aradan götürməyə xidmət edir.
Bəli,
Yardımlı inkişaf edir və gözəlləşir.
Ölkə başçısı möhtərəm cənab
Prezidentimiz İlham Əliyevin rayona tarixi səfəri
zamanı söylədiyi bu fikirlər artıq həqiqətə
çevrilir : “Yaxın zamanlarda Yardımlı Azərbaycanın
qabaqcıl rayonlarından birinə çevriləcəkdir”.
Yardımlıda
söz əməli işə, ümid inama, inam qələbəyə
vəsilə olmaqla özünü təsdiqləyir.
Əli Nəcəfxanlı
Xalq qəzeti.- 2013.- 12 yanvar.- S. 6.