Azərbaycan
xalqı üçün Vətən, torpaq, ordu müqəddəsdir
Dövlət hər bir əsgərin həyatını
qorumağı özünün mühüm vəzifəsi hesab edir
Hər hansı bir dövlətin
regionda və dünyada aparıcı mövqelərə
yüksəlməsi üçün ictimai-siyasi sabitlik şəraitində
dinamik iqtisadi inkişafın, vətəndaş həmrəyliyinin
təmin olunması, milli maraqları daim ön planda tutan
ardıcıl və məqsədyönlü xarici siyasətin
həyata keçirilməsi ilə yanaşı yüksək
döyüş qabiliyyətinə malik ordusunun olması da əsas
şərtlərdən biridir. Sevindirici haldır ki, cəmi 21 illik müstəqillik
tarixinə malik olan Azərbaycan
Respublikası yuxarıda sadaladığımız istiqamətlər
üzrə böyük nailiyyətlərə
imza atmış, qısa dövr
ərzində Cənubi Qafqazın ən qüdrətli
silahlı qüvvələrinə malik olmuşdur.
Hazırda Azərbaycan Ordusu
öz döyüş
hazırlığına görə MDB məkanında ön sıralarda qərar tutub.
Bu amil ölkəmizə
düşmən kəsilən xarici və
daxili qüvvələrin ciddi
narahatlığına səbəb olub. Bu il yanvarın 8-də
Daşkəsən rayonunda yerləşən
“N” saylı hərbi hissədə vəfat edən Ceyhun Qubadovun ölümü ətrafında bəzi
qüvvələrin ajiotaj yaratmağa
çalışmasının səbəbi də budur.
Təkzibolunmaz faktdır ki, Azərbaycan dövləti hər bir vətandaşın taleyi ilə maraqlanır, hərbçilərimizin problemlərini diqqət mərkəzində saxlayır, bütün məsələlərin məqbul həlli üçün lazımi addımları vaxtında atır. Heç uzağa getmək lazım deyil. Azərbaycan dövləti erməni lobbisinin və Ermənistanın həyasızcasına saldığı hay-küy fonunda Qərbdəki bəzi dairələrdən etiraz səslərinin yüksəlməsinə heç bir əhəmyyət verməyərək keçən il avqustun 31-də Macarıstanda ömürlük həbs cəzasına məhkum edilmiş Azərbaycan Ordusunun zabiti Ramil Səfərovun Bakıya gətirilməsinə nail oldu. Bununla bitmədi. Prezident, Ali Baş Komandan İlham Əliyevin sərəncamı ilə hərbçimiz əfv olundu və o, Heydər Əliyev Beynəlxalq Hava Limanındaca azadlığa buraxıldı. Həmin gün sonsuz sevinc hissləri yaşayan Ramilin atasının söylədiklərində böyük həqiqət var idi. Sahib Səfərov səkkiz ildən çox davam etmiş ayrılıqdan sonra oğlunu qucaqlayaraq demişdi: “Biz bilirdik ki, Ramil gec-tez Azərbaycana qayıdacaqdır. Çünki Azərbaycanın İlham Əliyev kimi Prezidenti var. Biz əmin idik ki, dövlətimizin başçısı Ramili köməksiz qoymayacaqdır. Prezident öz vətəndaşını, zabitini unutmamışdı. Sadəcə, səbirli olmaq və bu anı gözləmək lazım idi. Bu məqam yetişdi. Mən ailəmiz adından möhtərəm Prezidentimizə dərin təşəkkürümü bildirirəm, ona möhkəm cansağlığı, çətin və məsul vəzifəsində uğurlar diləyirəm”.
Bəli, vətəndaşına,
ölkəmizi düşmənlərdən qoruyan əsgər
və zabitlərimizə diqqət və qayğının
göstərilməsi dövlətimizin əsas prioritetləri
sırasına daxildir. Məhz bu səbəbdəndir ki,
Daşkəsən rayonunda yerləşən
“N” saylı hərbi hissədə əsgər Ceyhun
Qubadovun vəfatı
ilə bağlı məsələyə yüksək səviyyədə
reaksiya verildi və baş vermiş ölüm faktı ilə bağlı
istintaqın gedişatı xüsusi nəzarətə
götürüldü. Azərbaycan Hərbi Prokurorluğunda
Cinayət Məcəlləsinin 342.2-ci (Qulluğa
səhlənkar yanaşma ağır nəticələrə
səbəb olduqda) maddəsi ilə cinayət
işi başlandı. Hadisə ilə
bağlı qısa zamanda 4 nəfər həbs
olundu. Bununla əlaqədar
Müdafiə Nazirliyi və Hərbi Prokurorluğun rəhbər əməkdaşları
müvafiq araşdırmaların
aparılması məqsədilə bölgəyə ezam olundular. Görülən tədbirlər nəticəsində
cəmiyyətdə belə bir əminlik
yarandı ki, cinayət işi
üzrə istintaq-əməliyyat qrupu tərəfindən
qısa müddət ərzində tam, hərtərəfli
istintaq aparılmaqla təqsirkar şəxslərin
cinayət məsuliyyətinə cəlb olunması təmin
olunacaqdır.
Müdafiə
Nazirliyinin mətbuat xidmətinin rəisi, polkovnik Eldar
Sabiroğlu bildirmişdir ki,
ölüm hadisəsi ilə bağlı müdafiə
nazirinin göstərişi ilə qurumun müvafiq
strukturları tərəfindən əsgər C. Qubadovun xidmət
etdiyi hərbi hissədə dərhal araşdırmalara
başlanmışdır: “ Respublika Hərbi Prokurorluğunda
ölüm faktı üzrə cinayət işi
qaldırılıb, hazırda istintaq gedir. Ölümə
səbəb olan vəziyyətin tam dəqiqləşdirilməsi üçün nazirlik Hərbi
Prokurorluqla birgə hərtərəfli
araşdırmaları davam etdirir. Nəticə barədə ictimaiyyət
bilgiləndiriləcək”. E. Sabiroğlu onu da qeyd edib
ki, əsgərin olümü
ilə bağlı aparılan araşdırmalar hərbi hissədə
müəyyən intizam qaydalarının
pozulması hallarını ortaya
cıxarıb: “Müdafiə nazirinin
müvafiq əmri ilə Şəmkir Hərbi
Birləşməsinin bir neçə
yüksək rütbəli zabiti yol verdikləri qüsurlara
və nöqsanlara, şəxsi heyətə
nəzarəti düzgün təşkil
etmədiklərinə görə intizam
qaydasında ciddi şəkildə cəzalandırılıblar”.
Mətbuat xidmətinin rəisi bildirib ki, nazirin əmrinə əsasən,
təqsirkar zabitlərə şiddətli töhmətdən tutmuş, hərbi rütbələrin endirilməsinə
qədər müxtəlif cəzalar verilib.
Eyni zamanda bəzi
zabitlər tutduqları vəzifədən azad
olunublar. Araşdırmalar nəticəsində
başqa şəxslərin də təqsiri
aşkar edilərsə, onlar
da cəzalandırılacaqlar. Bu, Azərbaycan dövlətinin hər bir əsgərin taleyinə biganə
qalmadığını göstərən əsaslı
faktdır.
Məsələyə
təkcə bir nazirlik və ya hüquq-mühafizə
orqanları reaksiya verməyib, dövlətimizin əlaqədar
bütün strukturlarının diqqəti bu məsələyə
yönəlib. Azərbaycan
Respublikasının insan hüquqları
üzrə müvəkkili Elmira Süleymanova əsgər Ceyhun
Qubadovun ölüm hadisəsi
ilə bağlı Hərbi Prokurorluğa
müraciət ünvanlayıb.
Müraciətdə baş vermiş ölüm hadisəsindən
ciddi narahatlıq ifadə olunub.
Ombudsman
hərbi qulluqçuların hüquqlarının daha etibarlı təmin edilməsi və gələcəkdə
bu kimi halların baş verməsinin qarşının alınması
məqsədilə əsgər Ceyhun Qubadovun ölüm
faktının səbəblərinin, habelə ekspertizanın
nəticələrinin tam və hərtərəfli
yoxlanılması, ölümün səbəbi
kimi zorakılıq halı təsdiqləndikdə
müvafiq tədbirlərin görülməsi
və günahkarların qanunun tələblərinə
uyğun cəzalandırılmasını
xahiş edib.
“Hər
bir əsgərin faciəli şəkildə ölümü
bizim üçün böyük itkidir. Azərbaycan Ordusunda nizam-intizam məsələlərinə
nəzarət gücləndirilməlidir”. Bunu
əsgər Ceyhun Qubadovun
ölümü ilə bağlı məsələyə
münasibət bildirərkən Milli Məclis
sədrinin birinci müavini,
parlamentin Təhlükəsizlik və
müdafiə komitəsinin sədri Ziyafət Əsgərov bildirib. O deyib ki, kimin təqsirli
olub-olmamasını istintaq araşdıracaq. Hazırda bu məsələ parlamentin
də ciddi nəzarətindədir: “Əvvəlcədən
nəsə demək istintaqa təsir kimi qiymətləndirilə bilər. Ona görə də mən hesab
edirəm ki, istintaq obyektiv aparılacaq. Buna heç kimin şübhəsi
olmasın. Bu məsələ ilə
bağlı istintaq xüsusi
nəzarətə götürülüb
və obyektiv araşdırılaraq bu barədə ictimaiyyətə məlumat veriləcək”.
Silahlı Qüvvələrdə
şəxsi heyət arasında baş verən cinayət
hallarının qarşısını almaq məqsədilə
qanunvericilikdə cəzaların sərtləşdirilməsinin
gözlənilmədiyini deyən
vitse-spiker hesab edir ki, belə halların gələcəkdə
təkrar olunmaması üçün ümumiyyətlə əsgərlərin
hərbi xidmət keçmə məsələsinə nəzarət
gücləndirilməlidir: “Belə məsələlərə
görə Cinayət Məcəlləsində kifayət qədər
cəza nəzərdə tutulub. Mən güman
etmirəm ki, bununla
bağlı konkret Cinayət Məcəlləsində
və hansısa qanunvericilik aktlarında dəyişiklik
edilsin. Amma orduda nizam-intizam məsələlərinə
nəzarət gücləndirilməlidir. İstər əsgərlər
arasında olan, istərsə də əsgərlərlə
zabitlər arasında olan münasibətlərlə
bağlı nəzarət daha da gücləndirilməlidir”.
Hadisə
ilə bağlı Yeni Azərbaycan Partiyasının İcra
katibinin müavini, millət vəkili Mübariz Qurbanlı
xüsusi qeyd edib ki, Yeni Azərbaycan Partiyası əsgərin
ölümü ilə bağlı məsələyə
ciddi reaksiya verib: “Biz əsgərin vəfat etməsindən təəssüf
hissi keçiririk. Həmçinin hökumət
nümayəndələri tərəfindən bildirilib
ki, əsgərin ölümü
ilə bağlı məsələ ciddi
araşdırılacaq və bu məsələ
ilə əlaqədar ictimaiyyət məlumatlandırılacaq.
Bəzi dairələrin, xüsusilə də radikal
müxalifət dairələrinin həmin əsgərin ölümü ilə əlaqədar geniş ajiotaj
yaratması, bu məsələ ilə əlaqədar
hay-küy qaldırmasını da biz düzgün
hesab etmirik”. YAP İcra katibinin müavini bildirib ki, hər bir həlak olan əsgər
Azərbaycanın övladıdır, bizim
övladımızdır. Onların qorunması da hamının işidir.
Bu ümummili işdir və hamı birgə olmalıdır.
Cənab Prezident, Ali Baş Komandan İlham Əliyev ordu quruculuğu prosesini daim diqqətdə saxlayır.
Azərbaycanda
fəaliyyət göstərən gənclər təşkilatları
da Daşkəsəndə Müdafiə Nazirliyinin N saylı hərbi
hissəsində əsgər Ceyhun Qubadovun ölüm
faktını siyasiləşdirilməsinin əleyhinə
çıxış edirlər. Yeni
Azərbaycan Partiyası Gənclər
Birliyinin sədri Seymur
Orucov baş verən
hadisəni pisləyərək dedi: “Vəfat
edən əsgər bizim
hamımızın qardaşıdır. Əsgərin ölümü ilə bağlı
araşdırmalar gedir və bitdikdən sonra məlumat veriləcək və bu araşdırmanın obyektivliyinə heç bir şübhəmiz
yoxdur”. Seymur Orucov onu da
bildirdi ki, bu cür hallardan
hər hansı qüvvələrin siyasi maraqlar üçün
istifadə etməsi və ya buna təşəbbüs göstərməsi
yolverilməzdir: “Allahdan vəfat edən əsgərin
yaxınlarına səbr diləyirik və bizim
şübhəmiz yoxdur ki,
bu məsələ obyektiv
şəkildə araşdırılacaq. Bildiyiniz
kimi, Yeni Azərbaycan
Partiyasının sədri, Prezident İlham Əliyevin də hər zaman ən böyük
diqqət göstərdiyi sahələrdən biri
də məhz ordu quruculuğudur”.
Azərbaycan
Tələbə Gənclər Təşkilatları
İttifaqının sədri Şahin İsmayılov da əsgərin ölüm
faktını siyasiləşdirməyin əleyhinə
çıxış edərək dedi ki, Azərbaycan
xalqı üçün Vətən, torpaq, ordu
anlayışları müqəddəs
anlayışlardır. Belə məsələdən siyasi məqsədlər üçün
istifadə etmək olmaz. ATGTİ sədri
bildirdi ki, bu hadisə araşdırılmalı, istintaqla düzgün qiymət
verilməlidir. Həlak olan əsgərin
xatirəsini yaşatmaq üçün
başqa vasitələrdən istifadə
etmək olar. Əsgər
ölümündən heç kim öz məqsədləri
üçün istifadə edə bilməz.
Bəzi
üzdəniraq qüvvələrin vəziyyətdən
istifadə edərək təxribatlara yol verməyə
çalışmasını, məsələni siyasiləşdirməsini
əsgər Ceyhun Qubadovun anası Samirə Qubadova da pisləyib. O, ictimaiyyətə müraciətində
deyib: “Mən Azərbaycan
dövlətinə, onun Prezidenti
İlham Əliyev cənablarına
inanıram və ümidvaram ki, oğlumun ölümü ilə əlaqədar
başlanmış cinayət işi obyektiv araşdırılacaq və bu işdə təqsiri olan
bütün şəxslər cinayət məsuliyyətinə
cəlb olunmaqla layiqli
cəzalarını alacaqlar... Mənim
kədərimdən, mənim qüssəmdən heç kəsin sui-istifadə etməsinə
ixtiyarı yoxdur. Xahiş
edirəm bu hadisədən siyasi məqsədlər üçün
istifadə olunmasın və bununla
bağlı hər hansı bir
aksiyanın keçirilməsinin tamamilə əleyhinəyəm”.
Bu
hadisəyə ictimai diqqətin hər gün daha da
artması, əslində, ordu ilə cəmiyyətin vahid
qüvvəyə çevrilməsinin göstəricisidir. Nə
etməliyik ki, bu cür amansız təsadüflərdən bəzən
qaçmaq olmur. Lakin istintaq başa
çatmamış, məsələyə tam
aydınlıq gətirilməmiş bəzi əsassız
ittihamların səsləndirilməsi müasir
dövrdə qəbul edilməyən haldır. Çünki istənilən hüquqi
dövlətdə, inkişaf etmiş cəmiyyətlərdə bu kimi məsələlərdə
istintaq araşdırmalarının nəticəsini,
məhkəmə qərarını gözləyirlər. Bu məsələyə gəldikdə isə
biz də əminik ki,
ölüm faktı hüquqi
çərçivədə, obyektiv
şəkildə araşdırlacaq və hadisənin baş verməsinə səbəb olan şəxslər
vəzifəsindən asılı olmayaq cəzalandırılacaqlar. Bu gün cəmiyyətdə geniş
müzakirə olunan orduya
nəzarətə gəldikdə isə qeyd
etmək yerinə düşərdi ki, bu, özlüyündə çox
geniş məna kəsb edir:
Bura
silahlı qüvvələr üzərində demokratik nəzarət, müdafiə məsələlərində
cəmiyyətin geniş təbəqələrinin
fəallaşması, orduda islahatlarla bağlı cəmiyyətin daim məlumatlandırılması, ordunun parlament və cəmiyyət
qarşısında hesabatlılığı, hərbi
büdcənin şəffaflığı, hərbi qulluqçuların, onların ailə
üzvlərinin hüquqlarının müdafiəsi, hərbi
xidmətlə bağlı ortaya
çıxan problemlərin tez bir zamanda
çözülməsi, məxfi olmayan bu və digər müdafiə xarakterli
sənədlərin hazırlanmasına ictimaiyyət nümayəndələrinin
cəlb olunması və sair məqamlar
daxildir ki,
günümüzdə bunların hamısı uğurla həyata keçirilir.
Bu
gün Azərbaycan Silahlı Qüvvələrinin regionda və
Cənubi Qafqazda ən qüdrətli güc strukturuna
çevrilməsinin təməlində də dövlətin bu
sahəyə ciddi diqqət yetirməsi, cəmiyyətin isə
bu siyasəti dəstəkləməsi dayanır. İndi Azərbaycan
Silahlı Qüvvələrində baş verən keyfiyyət
dəyişmələri xarici hərbi ekspertlərin, hərb
yönümlü nüfuzlu qurumların, araşdırma mərkəzlərinin
diqqətini cəlb edir, qazanılan uğurlar müxtəlif
aspektlərdən təhlil predmetinə çevrilir və
ordumuzun gələcəyi barədə nikbin proqnozların səsləndirilməsinə
rəvac verir.
Silahlı
qüvvələrimizin qüdrətlənməsi,
işğal olunmuş ərazilərimizi istənilən an
azad etməyə qadir mükəmməl bir orduya çevrilməsi
yönündə ölkə Prezidenti, Azərbaycan Silahlı
Qüvvələrinin Ali Baş Komandanı Prezident İlham Əliyev
tərəfindən göstərilən yüksək əzmkarlıq
cəmiyyətimizdə böyük razılıqla
qarşılanır. Qəlbində vətənpərvərlik
hissləri olan hər bir
kəsi Azərbaycanın iqtisadi
baxımdan inkişafı və buna paralel olaraq ordumuzun güclənməsi fərəhləndirir
və qürurlandırır.
Rauf Kəngərli
Xalq qəzeti.- 2013.- 12 yanvar.- S. 3.