“Ordu,
media, cəmiyyət münasibətləri
bu gün”
Dünən Beynəlxalq Mətbuat Mərkəzində
Silahlı Qüvvələrə İctimai Nəzarət
Birliyi “Ordu, media, cəmiyyət
münasibətləri bu gün” mövzusunda “dəyirmi masa”
keçirmişdir. Tədbiri giriş sözü ilə
açan Silahlı Qüvvələrə İctimai Nəzarət
Birliyinin sədri Emin Həsənli ordumuzun son illərdəki
inkişafından danışaraq bildirdi ki, hər bir dövlətin silahlı
qüvvələri həmin cəmiyyətin çox
mühüm tərkib hissəsini təşkil edir.
Media isə həm orduya, həm də
ümumən cəmiyyətə, dövlətə münasibətində
müəyyən prinsiplərə əsaslanaraq, öz
mövqeyini ortaya qoyur. Amma silahlı qüvvələr elə
sahədir ki, onların fəaliyyətini
işıqlandırarkən xüsusi yanaşma tələb
olunur. Əvvəla, silahlı qüvvələr hər bir
dövlətin ərazisinin, müstəqilliyinin, suverenliyinin
qorunmasının təminatçısıdır. Hər
hansı bir dövlətin ordusu nə qədər
güclüdürsə, həmin dövlət də bir o qədər
güclüdür. Ordu cəmiyyət içində bir cəmiyyətdir.
Orada ciddi nizam-intizam, qaydalar hökm sürür. Burada bəzi
psixoloji-mənəvi nüansları nəzərə almaq
lazımdır. Torpaqlarımızın 20 faizinin işğal
edilməsini də əlavə edəndə orduya yanaşmada
son dərəcə həssas və diqqətli olmaq zərurəti
ortaya çıxır. Əks halda düşmən ölkənin
kəşfiyyat orqanlarının
“dəyirmanına su tökmək” ilə nəticələnir.
Müharibə şəraitində olan ölkənin ordusu ilə
bağlı məlumatların yayılmasında həmişə
ehtiyatlı olmaq lazımdır”.
Qurumun
sədri çıxışında bəzi KİV-lərin fəaliyyətinə
münasibət bildirərək dedi: –Təəssüflər
olsun ki, bizdə bəzi KİV-lərin fərqli istiqamətdə
fəaliyyətinə də rast gəlinir. Bəzən müəyyən
mətbu orqanları və ictimai qurumların əsas işi Azərbaycan
Ordusu ilə bağlı yanlış informasiyalar yaymaq, orduya
qara yaxmaq, kiçik bir faktı, hər hansı hadisəni
şişirtməklə
ictimaiyyətdə yanlış fikir formalaşdırmaq
istəyi nəzərə çarpır. Müharibə şəraitində
olan bir ölkənin mətbu orqanlarında gedən orduya
yönəlik neqativ yazılar, yayılan
çaşdırıcı xəbərlər öz
ziyanımıza işləyir. Əslində isə KİV bu
sahədə fəaliyyəti tam fərqli şəkildə
qurmalı, ordu ilə cəmiyyət arasında körpü rolunu
oynamalı, vətəndaşlarımıza ordu ilə
bağlı lazımi informasiya çatdırılmasına
çalışmalı, Silahlı Qüvvələrin
nüfuzunun daha da artırılması istiqamətində
işləməlidir.
Milli
Məclisin deputatı, təhlükəsizlik və müdafiə
məsələləri komitəsinin sədr müavini
Aydın Mirzəzadə çıxış edərək, Milli Ordumuzun kifayət qədər
güclü və daim inkişafda olduğunu bildirdi. O, bəzi
neqativ hadisələrə də toxundu. A. Mirzəzadə Milli
Ordumuzun birbaşa Ali Baş Komandan, Prezident İlham Əliyevin
ciddi nəzarəti və qayğısı ilə əhatə
olunduğunu qeyd etdi. Bildirdi ki, bu il Azərbaycan Ordusuna 3,7
milyard dollar vəsait ayrılıb və bu, yeni silahların
alınmasına, ordunun müdafiə qabiliyyətinin daha da
gücləndirilməsinə və s. işlərə xərclənəcək.
Bununla da Azərbaycan dövləti özünün müdafiə
qabiliyyətini maksimum səviyyədə gücləndirəcək.
O, əlavə
etdi ki, Nazirlər Kabinetinin
2012-ci ilin sosial-iqtisadi inkişafının yekunlarına və
2013-cü ildə qarşıda duran vəzifələrə həsr
olunmuş iclasındakı çıxışında cənab
Prezident İlham Əliyev ordu ilə bağlı əhəmiyyətli
məqamlara toxundu. Ali Baş Komandan bildirdi ki, dövlət
ölkənin müdafiə qabiliyyətinin möhkəmləndirilməsinə,
ordunun qüdrətlənməsinə böyük diqqət
yetirir.
Şübhəsiz
ki, Azərbaycanın bu uğurları, hərbi qüdrəti
ilə bağlı müxtəlif beynəlxalq təşkilatlar
tez-tez informasiyalar yayırlar. Çox təəssüf, bunların arasında qarayaxmalar da
olur. Millət vəkili mövcud hadisənin də yalnız təəssüf
doğurduğunu və bu hadisədə təqsirkar
olanların artıq cəzalandırıldığını
da qeyd edərək bu işdə ictimai dəstəyin də
vacib olduğunu vurğuladı.
“Azərbaycan
bu gün necə inkişaf edirsə,
bütövlükdə ordumuzda o cür inkişaf edir.
Neqativ hallardan sui-istifadə etməyə
çalışanlar, müsbətləri də görməyi
bacarsınlar”-deyə deputat əlavə etdi.
Daha
sonra ehtiyatda olan general Məmmədhüseyin Sariyev, Qarabağ
Müharibəsi Əlilləri, Veteranları, Şəhid Ailələri
İctimai Birliyinin sədri Mehdi Mehdiyev, Demokratik Jurnalistlər
Liqasının sədri Yadigar Məmmədli və digər
ictimaiyyət nümayəndələri çıxış
edərək mövzunun əhəmiyyəti və Azərbaycan
Milli Ordusunun inkişafından, neqativ hallara qarşı birgə
mübarizədən söhbət açdılar.
Anar, Turan.
Xalq qəzeti.- 2013.- 17 yanvar.- S. 5.