Azərbaycan
Silahlı Qüvvələri gündən-günə daha da müasirləşir,
daha da güclənir
Böyük və şərəfli
yol keçən müstəqil Azərbaycan Respublikası
iqtisadi inkişaf templərinə görə təkcə
Qafqaz regionunda deyil, dünya miqyasında lider dövlətlərdəndir.
Bu gün bölgənin güc mərkəzinə çevrilən
ölkəmizin mövqeyi, xüsusilə, regional məsələlərdə
həlledici rol oynayır. Azərbaycan
dünya birliyi tərəfindən bərabərhüquqlu və
etibarlı tərəfdaş kimi tanınır.
Respublikamız bütün sahələrdəki
inkişafıyla bir çox dünya dövlətləri
üçün nümunə təşkil edir. Bütün məsələlərin
həllində təqdirəlayiq uğurlar əldə etməyimiz,
o cümlədən yüksək döyüş qabilliyətinə
malik müasir silahlı qüvvələrə malik
olmağımız rəsmi Bakının təşəbbüsləri
ilə həyata keçirilən dünya miqyaslı layihələrin
reallaşdırılması nəticəsində böyük
gələcək vəd edən Cənubi Qafqazda
sülhün, təhlükəsizliyin davamlı
olacağına ümidləri artırır.
Azərbaycan
Prezidenti, Ali Baş Komandan İlham Əliyevin qeyd etdiyi kimi,
güclü dövlətin güclü ordusu olmalıdır.
İnamla deyə bilərik ki, Azərbaycanın qüdrətli,
güclü, nizami ordusu vardır. Sevindirici haldır ki, Vətənimizin
dayağı, düşmənə göz dağı olan
ordumuza cəmiyyətdə də böyük rəğbət
bəslənilir. Daşkəsən rayonunda yerləşən
“N” saylı hərbi hissədə vəfat edən Ceyhun
Qubadovun ölümü ətrafında bəzi qüvvələrin
ajiotaj yaratmağa çalışmasının səbəbi
də, əslində silahlı qüvvələrimizi gözdən
salmağa istiqamətlənmişdi. Lakin dövlətimizin əlaqədar
strukturları əsgərin vəfatı ilə bağlı məsələyə
yüksək səviyyədə reaksiya verdi və baş
vermiş ölüm faktı ilə bağlı istintaqın
gedişatı xüsusi nəzarətə
götürüldü. Hadisə ilə əlaqədar
qısa zamanda 4 nəfər həbs olundu. Müdafiə
Nazirliyi və Hərbi Prokurorluğun rəhbər əməkdaşları
müvafiq araşdırmaların aparılması məqsədilə
bölgəyə ezam olundular. Buna görə də cəmiyyətdə
belə bir əminlik yarandı ki, cinayət işi üzrə
istintaq-əməliyyat qrupu tərəfindən qısa
müddət ərzində tam, hərtərəfli istintaq
aparılmaqla təqsirkar şəxslərin cinayət məsuliyyətinə
cəlb olunması təmin olunacaqdır.
Bundan
başqa, müdafiə nazirinin müvafiq əmri ilə Şəmkir
Hərbi Birləşməsinin bir neçə yüksək
rütbəli zabiti yol verdikləri qüsurlara və
nöqsanlara, şəxsi heyətə nəzarəti
düzgün təşkil etmədiklərinə görə
intizam qaydasında ciddi şəkildə cəzalandırıldılar.
Eyni zamanda, bəzi zabitlər tutduqları vəzifədən
azad olundular. Araşdırmalar nəticəsində başqa
şəxslərin də təqsiri aşkar edilərsə,
onlar da cəzalandırılacaqlar. Bu, Azərbaycan dövlətinin
hər bir əsgərin taleyinə biganə
qalmadığını göstərən əsaslı
faktdır. Məsələyə təkcə bir nazirlik və
ya hüquq-mühafizə orqanları reaksiya vermədi,
dövlətimizin əlaqədar bütün
strukturlarının diqqəti bu məsələyə yönəldi,
Yeni Azərbaycan Partiyası və partiyanı parlamentdə təmsil
edən deputatlar ciddi reaksiya verdilər. Onlar hadisəsi ilə bağlı
Hərbi Prokurorluğa müraciət ünvanlayaraq baş
vermiş ölüm hadisəsindən narahatlıq ifadə
etdilər. Hərbi qulluqçuların hüquqlarının
daha etibarlı təmin edilməsi və gələcəkdə
bu kimi halların baş verməsinin qarşının
alınması məqsədilə əsgər Ceyhun Qubadovun
ölüm faktının səbəblərinin, habelə
ekspertizanın nəticələrinin tam və hərtərəfli
yoxlanılması, ölümün səbəbi kimi
zorakılıq halı təsdiqləndikdə müvafiq tədbirlərin
görülməsi və günahkarların qanunun tələblərinə
uyğun cəzalandırılmasını xahiş edib.
Təbii
ki, bu kimi azsaylı hallar
silahlı qüvvələrimizdə ruh yüksəkliyinə
mənfi təsir göstərə bilməz. Fakt budur ki,
ordumuzun döyüş qabiliyyəti günbəgün
artır. Ötən illər ərzində Azərbaycanda hərbi
xərcləri 20 dəfədən çox
artırılmış, ordunun maddi-texniki bazasının
gücləndirilməsi istiqamətində də böyük
işlər görülmüşdür. Hərbçilərin
sosial müdafiəsi məsələləri daim Azərbaycan dövlətinin
diqqət mərkəzində saxlanılır, onların
sosial-məişət problemləri öz həllini tapır, əmək
haqları yüksəldilir. Təkcə bu faktı qeyd etmək
kifayətdir ki, keçən il Azərbaycan Prezidenti, Ali
Baş Komandan İlham Əliyevin imzaladığı sərəncama
əsasən hərbi qulluqçuların və hərbi
sistemdə çalışan mülki işçilərin vəzifə
maaşları müvafiq olaraq
25 və 10 faiz artırılmışdır.
Bu
gün NATO standartlarına uyğun yenidən qurulan silahlı
qüvvələrimizi ən müasir silah, hərbi texnika,
sursat və s. təmin etmək üçün yeni istehsal sahələrinin
yaradılması istiqamətində
işləri uğurla həyata keçirilir.
Respublikamızda “Qaranquş” və
“Şahin” müasir pilotsuz uçuş aparatlarının
istehsal edilməsi hər birimizdə böyük qürur hissi
doğurur. Kifayət qədər geniş ərazidə
mühüm obyektlərin kəşfiyyatını aparmağa
imkan verən bu aparatların silahlı qüvvələrimizin
sərəncamına verilməsi o deməkdir ki, bəzi mənəm-mənəm
deyən dövlətlərdən fərqli olaraq Azərbaycan
21 illik müstəqillik dövründə özünün nəhəng hərbi sənayesini, hərbi
potensialını formalaşdırmağı, gücləndirməyi
bacarmışdır.
Onu
da vurğulamaq istərdim ki, bir çox ölkələr hələ də
“Qaranquş” və “Şahin” kimi pilotsuz uçuş
aparatlarını istehsal etməyin arzusu ilə
yaşayırlar. Ona görə ki,
bu, ancaq inkişafının ən yüksək mərhələsinə
qədəm qoyan ölkələrə xas olan istehsal sahəsidir.
Cənubi Qafqaz regionunda özünün iqtisadi
inkişafı, nüfuzu, geostrateji əhəmiyyəti və
diplomatik çevikliyi ilə xüsusi seçilən ölkə
olan Azərbaycan öz imkanları ilə pilotsuz təyyarələri
istehsal edərək hərbi arsenalına qəbul etməsi bir
daha sübut etdi ki, artıq o, dünya gücləri
sırasına da yüksəlməyə qadirdir. Bu gün Azərbaycanda
müxtəlif hərbi texnika, döyüş
sursatlarını istehsal edən çox güclü hərbi
sənaye kompleksinin
yaradılması, ən əsası isə ölkəmizin
hərbi potensialını ilk növbədə daxili imkanlar hesabına gücləndirməsi
və hazırda respublikamızda
700 adda müdafiə təyinatlı
məmulatın istehsal edilməsi dediklərimizi bir daha təsdiq
edir.
Azərbaycanda
bəzi silahların müasir tələblər səviyyəsində
modernləşdirilməsi də uğurla
reallaşdırılır. Ölkəmizdə yüksək dəqiqliklə
aparılmış modernləşdirmə nəticəsində
“Kaman” zenit-raket kompleksinin maksimal vurma qabiliyyəti 35 kilometrə
çatdırılmışdır. Yüksək
hündürlükdə uçan sürətli təyyarələri,
qanadlı raketləri vurmaq üçün təyin
edilmiş “Qalxan” zenit-raket kompleksinin hədəfi məhvetmə
imkanları üfiqi və şaquli məsafələrə
müvafiq olaraq 255 və 40 kilometrə
çatdırılmışdır. “Favorit” zenit-raket sistemi
isə eyni anda saniyədə 2 min 800 metr sürətlə
uçan 6 müxtəlif hədəfə qarşı atəş
əməliyyatı aparır və 27 min metrədək
hündürlükdə hədəfləri məhv edir.
“ARI-1T” mobil avtonom zenit-raket kompleksinin ölkəmizdə
modernləşdirilməsi nəticəsində 12 kilometr məsafədə
və 7 kilometr hündürlükdə hədəfi məhv
etmək imkanına malik olmuşdur.
Ötən ayların ümumi mənzərəsinə
nəzər yetirsək görərik ki, ölkəmizdəki hərbi təyinatlı
müəssisələrdə istehsal olunmuş məhsulların
ümumi həcminin 74 faizini müdafiə və xüsusi təyinatlı,
26 faizini isə mülki təyinatlı məhsullar təşkil
etmişdir. “Matador” və
“Marauder” tipli zirehli maşınların istehsalı və
onların silahlanması tam mənimsənilmiş və
kütləvi istehsalı uğurla həyata keçirilir. Yüksək manevr imkanına malik
olan bu maşınlar tank əleyhinə minaların təsirinə
davamlılığı ilə seçilirlər və
iriçaplı müasir silahlarla komplektləşdirilmişdir.
Ölkəmizdə istehsal edilən xüsusi təyinatlı
“Gürzə” patrul maşını müsbət keyfiyyətləri
ilə diqqəti cəlb edir. O,
2,5 ton yükgötürmə qabiliyyətinə malikdir.
Ən son yeniliklərlə təchiz olunan bu maşın
“Toyota HİLOYX 12" modelinin bazasında
yaradılmışdır və yalnız Azərbaycanda
yığılır.
Göründüyü
kimi, qısa müddətdə rəqabətə davamlı
müdafiə sənayesini formalaşdıran Azərbaycan
artıq NATO standartları səviyyəsində məhsullar
istehsal etmək iqtidarındadır. Prezident, Ali Baş Komandan
İlham Əliyevin ordumuzun yeni növ silah, hərbi texnika və
döyüş sursatları ilə təmin edilməsi
üçün bütün lazımi işlərin görülməsi
barədəki tapşırıq və tövsiyyələri
dəqiqliklə yerinə yetirilir. Məhz bunun nəticəsində
daim bir sıra yeni layihələrin
reallaşdırılması istiqamətində ardıcıl
və məqsədyönlü işlər aparılır.
Hazırda üzərində işlənilən yeni layihələr
müxtəlif çaplı uzaq məsafəli artilleriya
minalarını və onların barıt atımlarını,
müxtəlif növ artilleriya mərmiləri
üçün partladıcıları, zirehli nəqliyyat
vasitələri üçün döyüş
modullarını, atıcı silahların və onların
döyüş sursatlarının daşınması və
saxlanılması üçün müasir qablaşdırma
qutularını və s. istehsalını göstərmək
olar. Bütün bunlar Azərbaycanın yeni
yaradılmış müdafiə sənayesinin
inkişafının real nümunəsidir.
Bütün
bu reallıqları nəzərə alan beynəlxalq hərbi
ekspertlər və tanınmış siyasətçilər
Azərbaycan Silahlı Qüvvələrinin regionun ən
güclü ordusu olduğunu bəyan edirlər. Yuxarıda qeyd etdiyimiz kimi, bu
gün Azərbaycan Ordusunun dünyanın müasir
ordularının sahib olduğu ən son hərbi texnika ilə
təmin edilməsi də ölkə rəhbərinin diqqəti
sayəsində mümkün olmuşdur. Bu işdə ölkə
başçısının həyata keçirdiyi tədbirlər,
tez-tez ön cəbhədə zabit və əsgərlərlə
görüşməsi, onların hazırlıq səviyyəsi,
döyüş bacarıqları, sosial təminat məsələləri
ilə maraqlanması, bu sahəyə
qayğı və diqqətlə yanaşması öz
sözünü deyir.
Azərbaycan
Prezidenti, Silahlı Qüvvələrin Ali Baş Komandanı
İlham Əliyev bəyan etmişdir ki, ölkəmizin hərbi
gücünün artırılması istiqamətində
bundan sonra da lazımi tədbirlər görüləcəkdir.
Çünki biz müharibə şəraitində
yaşayırıq. Müharibənin birinci mərhələsi
başa çatsa da, hələ bitməyib. Bu şəraitdə
yaşayan bir ölkə, ilk növbədə, ordu
quruculuğuna diqqət yetirməlidir. Təsadüfi deyil ki,
bu gün Azərbaycanın dövlət büdcəsində hərbi
təyinatlı xərclər birinci yerdədir və
torpaqlarımız işğaldan azad olunmayanadək bu, belə
olacaqdır. Artım tempinin davamlı xarakter alması da belə deməyə
əsas verir. 2003-cü ildə
hərbi büdcəmiz
160 milyon dollar idisə,
2010-cu ildə bu rəqəm 2 milyard 150 milyon dollara, 2011-ci ildə 3 milyard 413 milyon dollar,
2012-ci ildə
isə
3 milyard 474 milyon
dollar olmuşdur.
Bu gün Azərbaycanda hərbi xərclərə sərf
olunan vəsait Ermənistanın dövlət
büdcəsindən 50 faiz
artıqdır. Bu, bizim
uğurumuzdur, qələbəmizə
inamı artıran ciddi amildir. Əminik çox qısa zamanda Cənubi
Qafqazın ən qüdrətli, ən peşəkar, ən mübariz ordusu olan Azərbaycan
Silahlı Qüvvələri
döyüş meydanında
da bu arzumuzu
reallığa çevirəcəkdir.
Rauf Kəngərli
Xalq qəzeti.- 2013.- 17 yanvar.- S. 4.