Azərbaycan Ordusu qarşıya qoyulan bütün vəzifələri yüksək səviyyədə yerinə yetirməyə tam hazırdır

İqtisadi inkişaf göstəricilərinə görə dünya miqyasında lider dövlətlər sırasına yüksələn Azərbaycan Respublikasının hərbi gücü, müdafiə qüdrəti ildən-ilə artır. Xarici siyasətdə böyük uğurlar qazanan, BMT Təhlükəsizlik Şurasının qeyri-daimi üzvü kimi dünyanın təhlükəsizlik siyasətinin müəyyənləşdirilməsində yaxından iştirak edən, qlobal əhəmiyyətli problemlərin müzakirə olunduğu parlaq məkana çevrilən ölkəmiz ordu quruculuğu prosesində ardıcıl nailiyyətlərə imza ataraq Cənubi Qafqaz regionunun ən qüdrətli, mütəşəkkil, nizami və peşəkar silahlı qüvvələrinə malik güclü dövlətə çevrilmişdir. Yüksək maddi-texniki təminatla diqqətləri üzərinə cəlb edən, müasir texnika və silahlarla tam təchiz olunan ordumuz artıq qarşıda duran bütün vəzifələri yerinə yetirməyə tam hazırdır.

Bu gün Ermənistan — Azərbaycan, Dağlıq Qarabağ münaqişəsi öz ədalətli həllini tapmadığına, ölkəmizin beynəlxalq ictimaiyyət tərəfindən tanınan ərazi bütövlüyü təmin edilmədiyinə görə hər an müharibə başlaya, Azərbaycan Silahlı Qüvvələri müqəddəs missiyasını yerinə yetirə bilər. Yəni bizim ölkəmiz müharibə şəraitində yaşayır və bu, o deməkdir ki, bizə düşmən kəsilən xarici və daxili qüvvələr istənilən vaxt istənilən hadisədən istifadə etməklə, Azərbaycan Ordusuna qara yaxmağa, kölgə salmağa cəhd göstərə, təxribat xarakterli addımlar atmağa, məsələləri siyasiləşdirərək şişirtməyə çalışa bilərlər. Belələri xalqımızın, Vətənimizin müdafiəçisi, ərazi bütövlüyümüzün təminatının qarantı rolunda çıxış edən silahlı qüvvələrimizin imicinə zərbə vurmaqla, əslində, bizim müstəqil dövlətimizin gələcəyinə, milli maraqlarımıza zərbə vurmuş olurlar. Bu mənada, səbəb nə olursa-olsun, Azərbaycan Ordusu haqqında yalan, böhtan və şayiə xarakterli məlumat yayanlar ilk növbədə düşmən dəyirmanına su tökənlərdir.

Son günlərdə biz bunun bir daha şahidi olduq. Müdafiə Nazirliyinin Daşkəsən rayonunda yerləşən “N” saylı hərbi hissəsində əsgərimiz Ceyhun Qubadovun vəfatı xəbərindən istifadə edən daxilimzdəki antimilli, antiAzərbaycan qüvvələr bu faktı əllərində bayraq edərək əks-təbliğat kampaniyasına başladılar. Onlara ən layiqli cavabı isə Azərbaycan cəmiyyəti verdi. İctimaiyyət məsələdən öz çirkin siyasi məqsədləri üçün istifadə edərək, ölkədə hərc-mərclik yaratmaq niyyətində olanların mənfur çağırışlarına əhəmiyyət vermədi. Çünki hər kəs gördü ki, hadisə baş verəndən dərhal sonra Azərbaycan dövləti və hökuməti vəziyyətə operativ müdaxilə etdi, məsələ araşdırıldı. Dövlətimizin bütün əlaqədar orqanları vahid mexanizm şəklində fəaliyyət göstərərək hadisəyə aydınlıq gətirilməsində və günahkarların cəzalandırılmasında səylərini əsirgəmədi. Ona görə ki, öz Vətənini qoruyan, xidmət edən, dövlətinin sərhədlərində keşik çəkən hər bir Azərbaycan əsgəri bu xalqın, bu məmləkətin əziz övladıdır və Azərbaycan dövləti onların hər birinin taleyi ilə yaxından maraqlanır.

Yanvarın 15-də keçirilən Nazirlər Kabinetinin 2012-ci ilin sosial-iqtisadi inkişafının yekunlarına və 2013-cü ildə qarşıda duran vəzifələrə həsr olunmuş iclasındakı çıxışında Azərbaycan Prezidenti, Ali Baş Komandan İlham Əliyev qeyd etmişdir ki, bu gün Azərbaycan Ordusu Cənubi Qafqazda aparıcı hərbi qüvvədir və Azərbaycan cəmiyyəti silahlı qüvvələri ləkələməyə çalışanların hansı məqsədə xidmət etdiyini bilir: “Bizim ordumuz böyük nailiyyətlərə çatıb. Biz heç vaxt imkan verə bilmərik ki, antimilli ünsürlər ordumuzu qaralasınlar, ləkələsinlər, ordumuza kölgə salsınlar. Biz buna heç vaxt imkan vermərik. Mən də Ali Baş Komandan kimi buna heç vaxt imkan verməyəcəyəm. Azərbaycan xalqı da buna imkan verməyəcək, ordumuza kölgə salmaq istəyən ünsürlərə öz layiqli cavabını verəcək və verir”. Dövlət başçısı ordunun maddi-texniki təminatının xeyli gücləndirildiyini, dövlət büdcəsində bu sahəyə ayırmaların ilbəil ardığını vurğulayaraq demişdir: “Bu il büdcəmizdə hərbi sahəyə ayrılan ümumi xərclər 3,7 milyard dollar səviyyəsindədir. Müqayisə üçün deyim ki, Ermənistanın ümumi büdcəsi iki milyard dollardan azdır. Əlbəttə, bu, bizə yeni imkanlar yaradır. Biz bu imkanlardan da istifadə edəcəyik”.

Ölkə başçısı ordu quruculuğu işində təkcə maddi-texniki təchizatın rol oynamadığını, eyni zamanda, peşəkarlıq və nizam-intizamın da əhəmiyyətli olduğunu demişdir. Qeyd etmişdir ki, silahlı qüvvələrdə həm peşəkarlıq, həm nizam-intizam artmalıdır. Ordu cəmiyyətin bir parçasıdır. Orduda xidmət edən vətəndaşlar cəmiyyətin üzvləridir. Hər bir sahədə olduğu kimi, orduda da qüsurlar, nöqsanlar ola bilər. Ən önəmli məsələ ondan ibarətdir ki, bu nöqsanlar və qüsurlar vaxtında aşkarlanır və dövlət tərəfindən ciddi ölçülər götürülür. Biz gələcəkdə də ordumuzun maddi-texniki bazasının möhkəmləndirilməsi, peşəkarlığın, nizam-intizamın artırılması istiqamətində siyasətimizi aparacağıq.

Digər tərəfdən, bunu da unutmamalıyıq ki, Azərbaycan Ordusu daim atəşkəs rejimini pozmağa çalışan hiyləgər düşmənlə üz-üzə dayanıb. Azərbaycan Milli Məclisinin sədr müavini Bahar Muradovanın qeyd etdiyi kimi, Azərbaycan Ordusu 20 ildən artıqdır səngər həyatı yaşayır ki, bunun özü də bir sıra problemlər yaradır. Adi şəraitdə orduda xidmətlə səngər şəraitində xidmət tamamilə fərqli nüanslardır: “Bu mənada Azərbaycan ordusundakı vəziyyətlə dinc şəraitdə yaşayan ölkələrin orduları müqayisəyə gəlməyəcək dərəcədə fərqlidir. Çox təəssüf ki, Ceyhun Qubadov kimi əsgərlərimizin ölümü baş verir. Hər dəfə də bu hallar baş verdikcə müqəssirlər cəzalandırılır, lakin bu hallardan istifadə edib, bunu şişirdib, tamamilə başqa bir yöndən cəmiyyətə təqdim edənləri başa düşə bilmirəm. Bu, heç kimə haqq vermir ki, baş verən hadisəni tamamilə başqa bir səmtə yönəltsin və bundan da siyasi məqsədlər üçün istifadə olunsun”.

Yeni Azərbaycan Partiyasının İcra katibinin müavini, millət vəkili Mübariz Qurbanlı da qeyd etmişdir ki, bəzi radikal müxalifət dairələri və onların tabeliyində olan mətbuat orqanları baş vermiş hadisədən Azərbaycanın əleyhinə istifadə etməyə çalışdılar. Ordu hamı üçündür və hərbi xidmət ümummilli vəzifəmizdir. Ordumuzun güclənməsi, qüdrətlənməsi və psixoloji-mənəvi durumunun yüksək olması düşmən Ermənistan üzərində uğurlu qələbəmiz üçün vacibdir. Azərbaycan ordusu Cənubi Qafqazın ən güclü ordusudur. Buna görə də ordumuzda baş verən bu cür xətaları, belə faciəvi hadisələri şişirtmək və kütləviləşdirmək kiçik təfəkkürlü, aşağı səviyyəli insanların işidir. Belə faciəvi hadisələrdən siyasi kapital qazanmaq istəyənlər var. Bu cür faciələri bütövlükdə orduya qarşı yönəltmək və ordunun nüfuzuna xələl gətirən çağırışlar etmək yolverilməzdir. Xüsusilə Azərbaycan gəncliyində ordudakı vəziyyət və əsgərlərlə bağlı xof hissi yaratmaq çox təhlükəlidir.

Bu gün Azərbaycan gəncləri könüllü şəkildə ordu sıralarına yollanır, orduda böyük cəsarət və qətiyyətlə xidmət edirlər. Həmçinin ordumuzda böyük qəhrəmanlar yetişir. Belə olan şəraitdə faciəvi hadisəni şişirdərək onu bütövlükdə orduya və Azərbaycana qarşı çevirmək doğru deyil. Erməni mətbuatı bu tipli yazılar verir. Azərbaycan müxalifəti də buna oxşar yazılar yazır. Bu, bir daha onu göstərir ki, Azərbaycan müxalifəti ümumilli maraqlarda yanlış yoldadır. Ümummilli maraqları qorumaqla bağlı addımlar atmır və yaranmış vəziyyətdən məqamçı olaraq sui-istifadə etmək istəyir. Azərbaycan xalqı bunu qəbul etmir.

Gözlənilməz və ya təsadüfi bədbəxt hadisələr dünyadakı bütün dövlətlərin ordularında baş verə bilər. Bu gün ABŞ kimi supergücün ordusunda da neqativ hallara rast gəlinir. Məsələn, “Reuters” agentliyinin yaydığı məlumatlara görə, keçən il ərzində Amerika Silahlı Qüvvələrinin Piyada qoşununda 182, Hərbi Dəniz Qüvvələrində 60, Hərbi Hava Qüvvələrində 59, dəniz piyadaları korpusunda isə 48 nəfər olmaqla , ümumilkdə 349 hərbçi bilinməyən səbəblərdən özünə qəsd edib. Müqayisə üçün qeyd edək ki, ötən il Əfqanıstanda keçirilən hərbi əməliyyatlarda ABŞ Ordusu 237 nəfər itki verib. “Reuters” bildirir ki, hətta Əfqanıstan hüdudlarından kənarda hərbi əməliyyatlar zamanı həlak olanların sayını da əlavə etdikdə, ümumi itkilərin sayı yenə də intihar hadisələri qədər çox olmur. Bəzi hesablamalara görə, ABŞ Ordusundan tərxis olunmuş şəxslər arasında intihar halları daha geniş yayılıb. İndi bu və digər faktları əsas götürüb hansı ağlı başında olan bir insan deyə bilər ki, Amerika Ordusu zəifdir və ya bu orduda hərc-mərclik baş alıb gedir?

Düşmən ölkənin ordusundakı vəziyyət isə daha da dəhşətlidir. Ermənistan silahlı qüvvələrində cinayət hadisələri gündən-günə artır, intizamsızlıq baş alıb gedir, qeyri-döyüş şəraitində ölüm halları sürətlə artıb, fərarilik son həddə çatıb. Məsələn, 2005-ci ildə erməni silahlı birləşmələrində 1597 cinayət hadisəsi baş vermişdisə, 2006-cı ildə 1702, 2010-cu ildə 2 min 157, 2011-ci ildə 2 min 216, keçən il isə 2 min 500-dən çox dəhşətli hadisə baş vermişdir. Bu isə bir daha göstərir ki, Ermənistan rəhbərliyi orduda nizam-intizamın möhkəmləndirilməsi və şəxsi heyətin tərbiyəsi ilə bağlı işlərə barmaqarası yanaşır, ümumiyyətlə, əsgər və zabitlərin taleyi onları maraqlandırmır. Məhz buna görə də erməni hərbi ekspertlər belə hesab edirlər ki, son dövrlər ordu Ermənistanın hərbi-siyasi rəhbərliyinin şəxsi maraqlarının qurbanına çevrilib.

Ermənistanda ana müxalifəti sayılan Erməni Milli Konqresi həmişə ordudakı vəziyyətdən ciddi narahatlığını ifadə edib. Konqresdə belə hesab edirlər ki, bu, Serj Sarkisyan hakimiyyətinin apardığı yarıtmaz siyasətin nəticəsidir. EMK-nın koordinatoru Levon Zurabyan bildirib ki, Ermənistan ordusunda vəziyyət çox dözülməzdir. Azərbaycanla Ermənistan arasında 1994-cü ildə atəşkəs elan edilən vaxtdan bu günə kimi Ermənistan minlərlə hərbçisini qeyri-döyüş şəraitində itirib. Zurabyan bu vəziyyətin yaranmasına səbəb kimi isə ordu rəhbərliyinin özbaşınalığını göstərib. Ordu generallarının yüz min dollarlıq ciplərdə gəzdiyi, rüşvətxorluqla və şəxsi varidatını artırmaqla məşğul olduğu bir vaxtda ordu sağlam ola bilməz.

Maddi-texniki təminatdan məhrum olan erməni ordusunda yoluxucu xəstəliklər də geniş yayılıb. Erməni əsgərləri arasında xüsusən qarın yatalağı adlı xəstəliyin, dizinteriyanın, vərəmin geniş yayıldığı verilən məlumatlar arasında yer alır. Elə bu günlərdə ön mövqedə yoluxucu xəstəliklərin yayılması nəticəsində adı çəkilməyən hərbi hissənin karantinə alındığı bildirilir. Əsgərlərin bir qisminin həyatı xilas edilsə də ölənlərin olduğu barədə məlumatlar var. Gorusda yerləşən 1-ci ordu korpusunda, Karçaxpyur rayonundakı 2-ci, Vanadzordakı 3-cü, Yexeqnadzor rayonundakı 4-cü, Nubaraşen rayonunda yerləşən 5-ci korpuslarda qidadan kütləvi zəhərlənmə halları ilə yanaşı, yoluxucu xəstəliklərin də tez-tez yayıldığı bildirilir.

Bütün bunları nəzərə alan beynəlxalq ekspertlər də bu gün Azərbaycan Ordusunu Cənubi Qafqaz regionun ən güclü silahlı qüvvələri kimi dəyərləndirirlər. Bu işdə ölkə başçısının həyata keçirdiyi tədbirlər, tez-tez ön cəbhədə zabit və əsgərlərlə görüşməsi, onların hazırlıq səviyyəsi, döyüş bacarıqları, sosial təminat məsələləri ilə maraqlanması, bu sahəyə qayğı və diqqətlə yanaşması öz sözünü deyir. Bu gün Silahlı Qüvvələrimizin dünyanın müasir ordularının sahib olduğu ən son hərbi texnika ilə təmin edilməsi də Azərbaycan Prezidentinin diqqəti sayəsində mümkün olmuşdur. Ali Baş Komandanın da qeyd etdiyi kimi, Azərbaycanın hərbi gücünün artırılması üçün bundan sonra da lazımi tədbirlər görüləcəkdir. Dövlət başçısının qeyd etdiyi kimi, son 10 ildə dövlət büdcəsindən müdafiə sektoruna ayrılan vəsaitlər əhəmiyyətli dərəcədə artırılmışdır. Bu dövrdə ordunun arsenalının yeni döyüş təyyarələri, helikopterlər, döyüş maşınları, habelə müasir və uzaq məsafəli artilleriya sistemləri ilə gücləndirilməsi istiqamətində bir sıra proqramlar reallaşdırılmışdır. Azərbaycan bu sahədə, hətta Rusiya tərəfindən təmənnasız yardımlar alan Ermənistanla balansı öz xeyrinə dəyişməyə nail olmuşdur.

Hərbi ekspertlərin fikrincə, Azərbaycanın malik olduğu “Smerç”, 2C7 “Pion”, M-46, 2A36 “Giatsin”, T-122 “Sakarya”, “Lynx LAR” və “Lynx Extra” kimi artilleriya sistemləri işğal altındakı torpaqlarımızda yuvalanan Ermənistan ordusu üçün potensial təhlükədir. Bu sistemlər gözlənilməz hücum zamanı erməni hərbi birləşmələrinin ön və arxa eşelondakı möhkəmləndirilmiş mövqelərini güclü zərbələrlə sıradan çıxaracaq. Erməni ekspertləri iddia edirlər ki, Azərbaycan tərəfi hərbi əməliyyatların gedişində mülki əhali və hərbçilər arasında psixoloji gərginlik yaratmaq məqsədilə böyük dağıdıcı gücə malik uzaq mənzilli reaktiv raketlərdən Dağlıq Qarabağda insanların daha çox yaşadığı məntəqələrə qarşı istifadə edəcək. Əlbəttə, Azərbaycan dövləti humanizm prinsiplərini hər şeydən üstün tutur və əgər hərbi əməliyyatlar başlasa, əsas hədəf işğalçı qüvvələr olacaq. Və əlbəttə, Ermənistan Xocalı hava limanından təxribat xarakterli məqsədləri üçün istifadə etməyə çalışsa, Azərbaycan Silahlı Qüvvələrindən lazımi cavabını alacaqdır.

Rauf Kəngərli

Xalq qəzeti.- 2013.- 19 yanvar.- S. 5.