“Azərbaycan-Türkiyə:
dostluq və qardaşlıq əlaqələri”
Regionumuzda sülhün, təhlükəsizliyin
daimi olması, sürətli inkişafın təmin
edilməsi, qlobal əhəmiyyətli
layihələrin reallaşması, qarşılıqlı
regional münasibətlər
sisteminin möhkəm təməllər üzərində
davam etdirilməsi üçün Türkiyə — Azərbaycan
dostluq və qardaşlıq əlaqələrinin
inkişafı böyük əhəmiyyətə malikdir. Buna görə də
tanınmış qələm sahibləri, jurnalistlər,
siyasətşünaslar kədəri və sevinci bir olan iki
qardaş ölkənin münasibətlərini diqqətdə
saxlayır, bu mövzuda müxtəlif səpkili
araşdırmalar aparır, maraqlı faktlarla zəngin olan əsərlər ortaya çıxarırlar.
Hər gününü
axtarışlara, yaradıcılığa həsr edən
yazıçı-jurnalist Afət Sadıqoğlunun zəngin
fəaliyyətinin və qazandığı böyük təcrübənin
nəticəsində ərsəyə gəlmiş “Azərbaycan
— Türkiyə: dostluq və
qardaşlıq əlaqələri” adlı yeni kitabı da bu
mövzuya həsr olunub.
Beynəlxalq siyasət və ölkəmizin
tarixi əlaqələri barədə də geniş
araşdırmalar apararaq bir
neçə əsərini oxuculara təqdim edən A.Sadıqoğlunun növbəti tədqiqat
toplusunun girişindəki “Tarixi köklər, yaxud əlaqələrimizin
tarixinə bir baxış”
bölməsində məsələyə
həm də geniş tarixi aspektdən
yanaşılmış, ümumilikdə, türk millətinin
dünya sivilizasiyasına, dövlətçilik ənənələrinin
inkişafına verdiyi misilsiz töhfələrin xüsusi rolu qeyd edilmişdir. Təbii
ki, türk coğrafi zolağında özünəməxsus
yerə malik olan Anadolu və Azərbaycan türkləri bir çox məqamlarda
ön planda yer almış, bu
iki xalq arasındakı sıx həmrəylik, birlik,
qarşılıqlı dərin məhəbbət bütün dövrlərdə
özünü göstərmiş, cərəyan edən
proseslərin müsbət məcraya yönəlməsində əsaslı rol
oynamışdır. XX əsrin
əvvəllərində məhz
Türkiyə ilə Azərbaycan
həmrəyliyi Bakını
düşmən
işğalından azad
etmişdir. 1918-ci ildə dünya xalqları öz ölkəsini
təhlükə qarşısında qoyaraq Azərbaycan Xalq
Cümhuriyyətinə köməyə gəlmiş müzəffər
Türk Ordusunun qətiyyətli yürüşünü təəccüblə
izlədi. Şanlı zəfərlə başa çatan bu
yürüş qardaşlığın, birliyin şərəfli
salnaməsinə çevrilərək tarixə
qızıl hərflərlə
yazıldı. Bu, qardaşın qardaşa köməyi, vəfa
borcu idi. Təbii ki, Azərbaycan da qardaşını darda
qoymamış, 1919-cu ildə başlayan Türk Qurtuluş
Savaşı qələbə ilə sona çatanadək hər
ay Bakıdan yüzlərlə vaqon neft və benzin, onlarla
vaqon maye qaz göndərilmişdir.
Kitabda o da qeyd edilir ki, iki ölkə
arasındakı genişmiqyaslı münasibətlərin
növbəti mərhələsi
1991-ci ildə Azərbaycan
Respublikası müstəqilliyini yenidən bərpa etdikdən
sonra başlamışdır. Təsadüfi deyil ki, Türkiyə
Cümhuriyyəti respublikamızın müstəqilliyini
tanıyan ilk ölkə olmuşdur. Bakıda ilk diplomatik
nümayəndəlik açan ölkə də məhz
qardaş Türkiyə idi. 1992-ci il yanvarın 14-də rəsmi
Ankara Azərbaycan ilə diplomatik əlaqələrini səfirlik
səviyyəsinə yüksəltdi.
Müstəqilliyinin ilk illərində kövrək
addımlar atan ölkəmiz üçün Türkiyənin
qardaşlıq dəstəyi mühüm əhəmiyyət
kəsb edirdi.
Müəllif iki ölkə arasındakı
münasibətlərin inkişafında ulu öndər Heydər
Əliyevin misilsiz xidmətlərini xüsusilə
vurğulayır. Türkiyə ilə Azərbaycanı “Bir
millət, iki dövlət” adlandıran türk
dünyasının böyük oğlu hələ
Naxçıvan Muxtar Respublikasının Ali Məclisinin Sədri
olduğu 1992-ci ildə Türkiyə rəhbərliyi ilə
birlikdə Qars müqaviləsini yenidən
imzalamış, blokada şəraitində
yaşayan qədim diyarın qardaş ölkə ilə 11 kilometrlik
hissəsində, Araz çayı üzərində “Həsrət” və “Ümid”
körpüsü adlandırılan keçid məntəqəsinin
istifadəyə verilməsini təmin etmiş, bununla
Naxçıvanı saysız-hesabsız çətinliklərdən
xilas etmişdir. Ümummilli liderimizin xeyir-duası ilə
Türkiyənin ilk təhsil müəssisəsi -
Naxçıvan Türk Liseyi fəaliyyətə
başlamış, “Zaman” qəzetinin Azərbaycana ilk gəlişi
burada baş tutmuşdur. Əlaqələrin
inkişafının Naxçıvan dövrünü
canlandıran bu və digər məqamlar
Afət Sadıqoğlunun o dövrdə yazdığı
çoxsaylı məqalələrdə də əks
olunmuşdur. Azərbaycan və
Türkiyəni biri-birinə bağlayan Bakı-Tbilisi-Ceyhan neft,
Bakı-Tbilisi-Ərzurum qaz kəmərləri,
Bakı-Tbilisi-Qars dəmir yolu
da ulu öndər Heydər
Əliyevin əsərləridir. Kitabda qeyd olunduğu kimi, sevindirici haldır
ki, ulu öndərin yolunu yeni
meyarlarla zənginləşdirərək davam etdirən Azərbaycan
Prezidenti İlham Əliyev onun başladığı işi
sona çatdırmış və bu gün məhz
ümummilli liderin göstərdiyi hədəflər istiqamətində
inamla irəliləyir. Dövlət
başçımız hər iki dünya əhəmiyyətli
neft və qaz boru kəmərlərinin əfsanədə
reallığa çevrilməsi üçün səylərini
əsirgəmədi.
Bakı-Tbilisi-Qars dəmir yolunun inşasının davam
etdirilməsi üçün hətta maliyyə imkanları
ölkəmizdən zəif olan Gürcüstana kredit
ayrılması barədə tapşırıqlar verdi.
Yeni
nəşrdə qeyd olunduğu
kimi, ötən il Azərbaycan ilə Türkiyə əbədi
dostluğu və qardaşlığı daha bir möhtəşəm layihəyə
imza atdı. 2012-ci il iyunun 26-da
Azərbaycan Respublikasının Prezidenti İlham Əliyevin
Türkiyəyə işgüzar səfəri zamanı
keçirilən görüşlər, aparılan müzakirələrdən
sonra ölkələrimiz, regionumuz və hətta ümumilikdə,
Avropa və dünya
üçün mühüm əhəmiyyət kəsb
edən sənəd - Türkiyə Respublikası və Azərbaycan
Respublikası arasında Trans-Anadolu Qaz Boru Kəməri (TANAP) üzrə Hökumətlərarası
Müqavilə imzalandı. Məsələnin
mahiyyətini daha yaxşı anlamaq üçün qeyd edək
ki, uzun müddət idi ki, Xəzər hövzəsinin qaz
ehtiyatlarının Avropa bazarlarına
çıxarılması mövzusu dünyanın əsas
aktual problemlərindən birinə çevrilmişdi. Avropa Birliyinin təşəbbüsü
ilə “Nabukko” adlı qaz layihəsinin
reallaşdırılması gündəmdə olsa da, məlum
səbəblərdən bu reallaşmırdı. Vəziyyət
belə ikən, Azərbaycan çox mühüm bir təşəbbüs
göstərərək, Trans-Anadolu qaz boru kəməri layihəsinin
reallaşdırılması təklifi ilə
çıxış etdi. Qüdrətli Türkiyə ilə
gündən-günə güclənən Azərbaycan birlikdə
bu layihənin həyata keçirilməsi üçün
hüquqi bazanı təşkil edən müqaviləni
imzalamaqla, gələcəkdə Avropa ölkələrini,
necə deyərlər, böyük bir problemdən xilas
etmiş oldular.
Araşdırma
əsərində də qeyd olunduğu kimi, ötən 21 il ərzində müstəqil Azərbaycan ilə
Türkiyə arasında mühüm əhəmiyyətə
malik 100-dən çox sənəd imzalanmış və
onlar istər qarşılıqlı faydalı əlaqələrin
inkişafında, istərsə də regional əməkdaşlığın
genişlənməsində
xüsusi rol oynamışdır.
Bəli, tarixi köklərə
söykənən, çətin sınaqlara sinə gərən,
eyni millətə, eyni dilə, eyni dinə sahib olan iki xalq
arasındakı ən təbii hisslərdən bəhrələnən,
ondan güc alan Azərbaycan – Türkiyə
qardaşlığı daim möhkəmlənir, güclənir,
zamanın diqtəsi ilə durmadan inkişaf edir, regionda əmin-amanlığın
qarantına çevrilir. Bu isə belə deməyə əsas
verir ki, bu mövzu daim tədqiqatçıların, siyasətşünasların
diqqət mərkəzində olacaq.
Rauf Kəngərli
Xalq qəzeti.- 2013.- 19 yanvar.- S. 7.