Azərbaycanlı mütəxəssislər İstanbulda təlim kursu keçmişlər

“Azərsu” Açıq Səhmdar Cəmiyyətində kadr potensialının gücləndirilməsi, işçilərin peşə hazırlığının artırılması istiqamətində həyata keçirilmiş daha bir layihə yekunlaşmışdır. Qurumun mətbuat xidməti və ictimaiyyətlə əlaqələr şöbəsinin məlumatına görə, bu yaxınlarda səhmdar cəmiyyətinin Türkiyənin “TeknoYapı” şirkəti ilə əməkdaşlığı çərçivəsində İstanbul şəhərində yekunlaşmış təlim kurslarında “Azərsu” ASC-nin 80 mütəxəssisi təlimləri uğurla başa çatdırmışdır.

Yanvarın 22-də “Azərsu” ASC-də təlim iştirakçılarına sertifikatların verilməsi mərasimi keçirilmişdir. “Azərsu” ASC-nin sədri Qorxmaz Hüseynov ölkədə gənclər siyasətinin dövlətin prioritet məqsədlərindən olduğunu xatırladaraq səhmdar cəmiyyətdə gənc mütəxəssislərin işə qəbuluna, onların fəaliyyətinə xüsusi diqqət yetirildiyini vurğulamışdır. Ölkəmizdə həyata keçirilən su təchizatı və kanalizasiya sistemlərinin yenidən qurulması layihələri barədə məlumat verən Q. Hüseynov işlərin keyfiyyətli icrasını təmin etmək məqsədilə yeni texnologiyalardan və yüksək ixtisaslı mütəxəssislərin təcrübəsindən istifadə olunduğunu diqqətə çatdırmışdır. Gənc mütəxəssislərin peşəkarlıq səviyyəsinin artırılması, bilik və bacarıqlarının, iş təcrübəsinin yüksəldilməsi istiqamətində görülən işlər barədə məlumat verən “Azərsu” ASC-nin sədri ötən il 477 əməkdaşın müxtəlif sahələr üzrə təlim-tədris proseslərinə cəlb olunduğunu bildirmişdir.

Bu sahədə Türkiyənin “TeknoYapı” şirkəti ilə əməkdaşlıq çərçivəsində daha 80 nəfər əməkdaşın İstanbul Şəhər Sukanal İdarəsində təşkil olunan təlimlərdə iştirakını xüsusi qeyd edən natiq bildirdi ki, hər qrupda 20 nəfər olmaqla 4 qrup üzrə keçirilmiş təlimlərdə kimyaçılar, bioloq, mexanik, inşaatçı, energetik, layihəçi, hidrotexnik, metroloq, hidrogeoloq və ekoloqlar iştirak etmişlər. Qeyd olundu ki, təlimlər Türkiyənin yüksək ixtisaslı alimləri və mütəxəssisləri tərəfindən keçirilmiş və istehsalat sahələrində olan əməkdaşlara texnoloji proseslərin incəlikləri əyani şəkildə izah edilmiş, İstanbul Şəhər Sukanal İdarəsi, Türkiyə Su İnstitutu və “TeknoYapı” şirkəti təlimlərin yüksək səviyyədə təşkilinə böyük dəstək göstərmişdir.

Tədbirdə iştirak edən Türkiyə Su İnstitutunun sədri Ahmet Saatçı təlimlərdə iştirak etmiş azərbaycanlı mütəxəssislərin bilik və təcrübə səviyyəsindən razı qaldığını bildirərək qeyd etmişdir ki, tədris prosesində əldə olunan uğurlar onların peşəkar kadr kimi formalaşmasına müsbət təsir göstərəcək. O daha sonra demişdir ki, iştirakçılar gənc olmalarına baxmayaraq, təlim prosesində yeni texnologiyalar və qabaqcıl təcrübələrin öyrənilməsinə böyük həvəs və maraq göstərmişlər. Qonaq, həmçinin onların təlimlərdə qazandıqları təcrübəni gələcək fəaliyyətlərində uğurla tətbiq edəcəklərinə əmin olduğunu bildirmişdir.

Türkiyənin “TeknoYapı” şirkətinin idarə heyətinin üzvü Həsən Sarıkaya təlimlərin yüksək səviyyədə təşkili üçün bütün imkanlardan istifadə olunduğunu bildirərək demişdir ki, iştirakçılara Türkiyənin su və kanalizasiya infrastrukturu barədə ətraflı məlumat verilmiş və onların istehsalat sahələrinə ekskursiyaları təşkil edilmişdir. Şirkət təmsilçisi qeyd etmişdir ki, təlimlər müxtəlif sahələr üzrə keçirilsə də, kadrların hərtərəfli bilgi əldə etməsi üçün onlara su təchizatı və kanalizasiya infrastrukturunun bütün incəlikləri barədə ətraflı məlumat verilmişdir.

Təlimlərdə iştirak etmiş Fuad Cavadzadə və Ülkər Həsənova tədris prosesində qazandıqları bilik və təcrübənin gələcək fəaliyyətlərində tətbiq edəcəklərini bildirmişlər.

Tədbirin sonunda təlimlərdə müvəffəqiyyətlə iştirak etmiş gənc mütəxəssislərə sertifikatlar təqdim olunmuşdur.

Mirbağır, Yaqubzadə

Xalq qəzeti.- 2013.- 23 yanvar.- S. 7.